Tau Mamatua​—Fakamahani e Fanau Hau Mai he Mukemuke

¹ “Kia fakaako a e tama ke lata mo e hana puhala; ka hoko foki ke he vaha ke motua ai a ia, nakai ni fano kehe ai a ia.” (Fakatai 22:6) Tau mamatua, kaeke nakai manako a mutolu ke he tau fanau ha mutolu ke “nakai ni fano kehe” mai he puhala he kupu moli, ti kua lata ke kamata a fe e fakamahaniaga ia? He magaaho ne mukemuke ai!

² He magaaho ne pehe a Paulo ko e fakaakoaga fakaagaga ha Timoteo tali mai he “vaha tote,” ne kakano moli a ia tali mai he tama mukemuke. (2 Timo. 3:14, 15) Ti ko e fua, ne tupu a Timoteo mo tagata fakaagaga mitaki lahi mahaki. (Filipi 2:19-22) Tau mamatua, kua lata foki ia mutolu ke kamata mai he “vaha tote,” ke foaki ke he tau fanau ha mutolu e fakamahaniaga kua lata ia lautolu ke ‘tupu ki mua a Iehova.’​—1 Samu. 2:21.

³ Foaki e Vai kua Lata ia Lautolu ke Tupu: Tuga ni e tau akau ikiiki kua lata mo e foakiaga he vai ke tutupu hake mo tau akau mitaki, kua lata foki e tau fanau he tau tau momoui kehekehe ke puke he vai he kupu moli he Tohi Tapu ke tupu mo tau fekafekau momotua he Atua. Ko e matapatu puhala ke fakaako e kupu moli ke he tau fanau mo e lagomatai a lautolu ke moua e fakafetuiaga mo Iehova kua puhala mai he fakaako Tohi Tapu tumau fakamagafaoa. Ka e ma tau mamatua, mailoga e puhala fanogonogo he tau tama takitaha. Ma lautolu e tau fanau ikiiki, ko e tau magaaho fakaako kuku ka lauia mitaki mai he tau fakaakoaga gahoa hololoa.​—Teu. 11:18, 19.

⁴ Aua neke uta fakateaga e lotomatala he fanau hau ke fakaako. Tala age ki a lautolu e tau tala hagaao ke he tau tagata he Tohi Tapu. Fakaata a lautolu ke ta e tau fakatino ke he tau tuaga he Tohi Tapu po ke taute e tala ke he tau mena ne tupu he Tohi Tapu. Fakaaoga fakamitaki e tau vitio mo e tau autiokasete ha tautolu, putoia foki e tau taute tala faka-Tohi Tapu. Hikihiki e fakaakoaga fakamagafaoa ke he tau tau moui kehekehe mo e tau puhala iloa mena he tau fanau hau. Fakamukamuka e fakamahaniaga fakamua, fakakuku ai; ka e he tupu hake e tama, kua lata e fakamahaniaga hana ke fakalaulahi atu mo e taute tumau. Kia fakaalaala mo e fakakehekehe e fakaakoaga Tohi Tapu. Manako a koe ke he tau fanau hau ke “manako lahi” ma e Kupu, ti taute e fakaakoaga ke fiafia.​—1 Pete. 2:2.

⁵ Fai Vala a Lautolu he Fakapotopotoaga: Fakatoka e tau foliaga fakaholo ki mua ma e tau fanau hau ke maeke a lautolu ke fai vala he fakapotopotoaga. Liga ko e heigoa e foliaga fakamua ha lautolu? Ko e tau matua he tau fanau ikiiki tokoua ne pehe: “Ne kamata tokoua ke fakamahani ke nonofo fakaeneene he Fale he Kautu.” Fakamui, lagomatai e tau fanau ke tali he tau feleveiaaga ke he tau kupu ni ha laua, ti taute ai mo foliaga ha laua ke hu he Aoga Fekafekau Fakateokarasi. He fekafekauaga he fonua, ke moua e tau foliaga mitaki ka foaki e tuleke he gutuhala, ke totou e kupu tohi, ke talahau hagaao ke he mekasini, mo e fakalataha e tau tagata he kaina ke he tau tutalaaga fai kakano.

⁶ Fakatoka e Fakafifitakiaga Fakamakai: Fa logona nakai he tau fanau hau a koe he tau aho takitaha kua tutala hagaao ki a Iehova mo e liogi ki a ia? Kitia nakai e laua a koe ne fakaako e Kupu hana, fina atu ke he tau feleveiaaga, fakalataha ke he fekafekau he fonua, mo e fiafia he taute e finagalo he Atua? (Sala. 40:8) Kua aoga ka kitia e lautolu ti maeke ia koe ke taute auloa e tau mena nei. Ne talahau he tama fifine lahi hagaao ke he matua fifine hana, ne feaki ono e tama ke eke mo Tau Fakamoli tua fakamoli: “Ko e mena ne fakamalolo lahi ki a mautolu ko e tau fakafifitakiaga ni ha Matua Fifine​—kua malolo lahi ia ke he tau kupu.” Ko e matua he tama ne fa e tau he moui, ne talahau: “Nakai ko e talahauaga noa ni e ‘tuku fakamua a Iehova’ ka ko e puhala ne momoui a mautolu ki ai.”

⁷ Tau mamatua, kamata tuai ke fakamahani e tau fanau ha mutolu, fakaako a lautolu ke he kupu moli mai he Kupu he Atua, fakatoka e tau foliaga fakaholo ki mua, mo e foaki e fakafifitakiaga kua mua ue atu. To fiafia a koe ka taute e tau mena ia!