Fakaako e Tau Fanau Haau ke Eke mo Tau Fekafekau
1. Ko e heigoa ne omoomoi he Salamo 148:12, 13 e tau matua Kerisiano ke taute?
1 Uiina e Iehova a lautolu ne ikiiki ke fakaheke a ia. (Sala. 148:12, 13) Ko e tau matua Kerisiano mogoia kua nakai fakaako ni e tau fanau ke he tau kupu mooli he Tohi Tapu mo e tau fakatufono he mahani Atua. Kua fakaako foki a lautolu ke eke mo tau tagata fakamatala he tala mitaki. Taute fēfē e mena nei ke holo ki mua?
2. Lauia fēfē e tau fanau ha ko e fakafifitakiaga mitaki he matua?
2 Fakafifitaki Mitaki: Ne tala age e Ikifakafili ko Kiteona ke he tau tagata toko 300 haana: “Kia kitekite mai a mutolu kia au, mo e fifitaki ai.” (Fakafili 7:17) Na mukamuka pauaki e tau fanau ke onoono mo e fifitaki ke he tau matua ha lautolu. Taha e matua taane ne gahua po, nakai hau a ia ki kaina ke mohe he pogipogi Faiumu, ka e uta e ia haana tau fanau ke he gahua fekafekau pete ni kua lolelole lahi a ia. Ha kua nakai talahau ha kupu, kua fakaako e ia a lautolu ko e fekafekauaga ko e mena ne mua. (Mata. 6:33) Kitia nakai he tau fanau haau e fiafia haau he fakalataha ke he tau puhala kehekehe he tapuakiaga, tuga e liogi, totou Tohi Tapu, fai tali, mo e fakamatala? Mooli, to nakai eke a koe mo fakafifitakiaga mitaki katoatoa. To hihiga lahi e tau fanau haau ke talia e tau laliaga haau ke fakaako a lautolu ke tapuaki ki a Iehova ka kitia e lautolu e makutu haau he fekafekau ki a ia.—Teu. 6:6, 7; Roma 2:21, 22.
3. Ko e heigoa e tau foliaga holo ki mua fakaagaaga kua lata he tau matua ke lagomatai e tau fanau ha lautolu ke fakatoka mo e hokotia ki ai?
3 Tau Foliaga Holo ki Mua: Nakai lolelole e tau matua ke fakaako e tau fanau ha lautolu ke laka, ke tutala, ke tauteute ne lautolu a lautolu, mo e falu mena foki. Ka hohoko e tau fanau ke he tau lakaaga kehekehe he tau momoui ha lautolu, to tuku age falu foliaga foou ki a lautolu. Kaeke ko e tau matua Kerisiano, to lagomatai foki e lautolu e tau fanau ha lautolu ke fakatoka mo e ke hokotia ke he tau foliaga fakaagaaga kua felauaki mo e tau tau moui mo e tau lotomatala ha lautolu. (1 Kori. 9:26) Kua fakaako nakai e koe e tau fanau haau ke tali he tau kupu ni ha lautolu mo e ke tauteute e tau lauga ha lautolu he Aoga Fekafekau Fakateokarasi? (Sala. 35:18) Kua fakaako nakai e koe a lautolu ke taute e tau vala kehekehe he fekafekauaga? Kua fakatoka nakai e koe ki mua ha lautolu e foliaga ke papatiso mo e gahua mau ke he fekafekauaga? Kua lali fakalahi nakai a koe ke matutaki a lautolu mo e tau tagata fakamatala ne fiafia mo e hakahakau ka fakamafana a lautolu?—Fakatai 13:20.
4. Aoga fēfē e tau fanau ha ko e tau matua ne kamata fakaako a lautolu ke he fekafekauaga he vahā ikiiki?
4 Pehē e salamo: “Ko e Atua na e, kua fakaako e koe au tali mai he vaha tote; kua hoko mai foki ke he vaha nai kua fakakite gaia au hāu a tau mana.” (Sala. 71:17) Kamata fakaako e tau fanau haau mai he vahā ikiiki ke eke mo tau tagata fakamatala. Ko e fakavēaga fakaagaaga ne lagomatai e koe a lautolu ke fakatoka to aoga mooli ki a lautolu ka hoko ke he vahā motua ha lautolu!—Fakatai 22:6.