Fakaako e Fanau Haau ke Fakaheke a Iehova
1. Maeke nakai e tau tama ikiiki ke fakaheke a Iehova?
1 Kua fakamalolō e Salamo 148:12, 13 ke he tau tama taane mo e tau tama fifine ke ‘fakaheke e higoa a Iehova.’ Kua ha ha he tau Tohiaga Tapu e tau fakafifitakiaga loga he tau fanau ikiiki ne taute pihia. Ma e fakatai, ‘ko Samuela, ne fekafekau ai a ia ki mua a Iehova, ko e tama.’ (1 Samu. 2:18) Ko e “tama fifine tote” ne tala age ke he hoana a Naamanu na maeke e perofeta ha Iehova i Isaraela ke fakamalolō e lepela ha Naamanu. (2 Patu. 5:1-3) Magaaho ne hu atu a Iesu ke he faituga mo e taute e tau gahua malolō ue atu, ko e “tau tama” ne tauhea atu: “Hosana ke he tama a Tavita!” (Mata. 21:15) Fakaako fēfē he tau matua e tau fanau ha lautolu ke fakaheke a Iehova?
2. Ko e ha kua aoga ma e tau matua ke fakatoka e fakafifitakiaga mitaki ma e tau fanau ha lautolu?
2 Fakafifitakiaga: Ato feaki e kupu mooli ke he tau loto he tau fanau ha lautolu, kua lata ke fakaako mua e tau matua taane Isaraela ke fakaalofa ki a Iehova mo e toka mau e tau poaki haana he tau loto ha lautolu. (Teu. 6:5-9) Kaeke ke tutala fiafia a koe hagaao ke he fekafekauaga mo e taute mo vala he setulu fakafaahi tapu haau, to hihiga e tau fanau haau ke kitia kua aoga mo e fiafia e fekafekauaga.
3. Aoga fēfē e taha matakainaga fifine he fakafifitakiaga he tau matua haana?
3 Taha e matakainaga fifine ne liu manatu mafanatia: “He lahi hake au, ne putoia ke he fakaholoaga he magafaoa ha mautolu e fakalataha ke he fekafekauaga he tau matahiku faahi tapu oti. Ne kitia e au kua olioli mooli e tau matua haaku ke fakamatala. Ne lalahi hake a mautolu mo e mailoga e fekafekauaga ko e taha mena fiafia lahi.” Ne eke e matakainaga fifine nei mo tagata fakailoa nakaila papatiso he fitu e tau tau he moui ti kua teitei 33 e tau he gahua mau a ia.
4. Ko e heigoa e kakano ke fakamahani fakahaga e tau fanau?
4 Fakamahani Fakahaga: Putoia e tau fanau ha mutolu he fakalataha a mutolu ke he fekafekauaga he fonua. Liga maeke a lautolu ke fakatagi e logo, age e tuleke ke he tagata he kaina, po ke totou e kupu tohi. To lafi e mena nei ke he fiafia ha lautolu mo e lagomatai a lautolu ke moua e mauokafua na maeke ia lautolu ke fakapuloa e fekau he Kautu. He lalahi hake a lautolu, kua lata e putoiaaga ha lautolu ke he fekafekauaga ke lahi fakahaga. Ko e mena ia, lagomatai a lautolu ke tupu fakahaga mo e ke manamanatu ke he tau foliaga fakaagaaga.
5. Ko e heigoa kua lata ke moua he tama ke maeke ke hokotia ke eke mo tagata fakailoa nakaila papatiso?
5 Tutala ke he tau motua he magaaho ka logona hifo e mutolu kua hokotia tuai e tau fanau ha mutolu ke eke mo tau tagata fakailoa nakaila papatiso mo e ka talahau e lautolu kua manako tuai ke taute pihia. He eke mo tagata fakailoa to peehi ai ki a lautolu e kotofaaga fakatagata ha lautolu ke fakaheke a Iehova. Kia tokaloto, na nakai lata he tama ke lahi e mena ka iloa ke tuga e tagata lahi kua papatiso ato lata a ia ke fakamatala. Kua maama nakai he tama haau e tau matapatu fakaakoaga he Tohi Tapu? Kua omaoma nakai a ia ke he tau tuaga he mahani i loto he Tohi Tapu? Kua manako nakai a ia ke fakalataha ke he fekafekauaga mo e ke iloa ko e taha he Tau Fakamoli a Iehova? Ka pihia, to liga fifili mogoia he tau motua e lata haana ke eke mo tagata fakailoa nakaila papatiso.—Kikite Organized to Do Jehovah’s Will, lau 79-82.
6. Ko e ha kua aoga lahi ma e tau matua ke fakamahani e tau fanau ha lautolu?
6 Ke fakaako e tau fanau ke fakaheke a Iehova mai he tau loto ha lautolu kua lata ni ke gahua ki ai. Ka e gahoa e tau mena kua fakafiafia mooli aki e tau matua ka kitia e tau fanau ha lautolu kua tupu ki mua fakaagaaga. Mua atu e aoga, kua fiafia a Iehova ka talahau atu he tau fanau e tau gahua homo ue atu haana.