Setulu he Magafaoa—Gahua Fakamagafaoa he Fonua
1 Kua fiafia lahi a Iehova ke kitia e tau fuata he fakaheke e higoa hana. (Sala. 148:12, 13) He vaha ha Iesu ne ‘fakaheke he tau tama mukemuke mo e tau tama kai huhu’ e Atua. (Mata. 21:15, 16) Kua pihia foki e mena ne tupu he vaha nei. Tau matua, maeke fefe ia mutolu ke lagomatai e fanau ha mutolu ke eke mo tau tagata makutu he fakaheke a Iehova ke he fekafekau Kerisiano? Ke tuga ne peehi he vala tala i luga ke he tau feleveiaaga he fakapotopotoaga, ko e puhala aoga lahi ko e hau a fakafifitakiaga. Taha e matua tane ne vagahau ma e tau matua oti he magaaho ne pehe a ia: “Nakai taute he fanau e tau mena ne talahau e koe; kua fifitaki e lautolu e tau mena ne taute e koe!”
2 Ne manatu he matakainaga fifine ne feaki he tau matua matakutaku Atua: “Ne nakai aala hake a mautolu he pogipogi Faiumu ke huhu ko e o nakai he fekafekauaga. Iloa e mautolu to o a mautolu.” Pihia foki, maeke ia koe ke fakaako ke he fanau hau e aoga he gahua fakamatala he fakatoka e setulu he tau fahi tapu oti ke fakalataha tumau ke he gahua he fonua ko e magafaoa. To nakai ni taute he mena nei e fanau hau ke ako he kitekite ki a koe ka e taute foki a koe ke mailoga e aga, tau mahani, mo e lotomatala ha lautolu.
3 Fakaako Tumau: Ke fiafia e fanau ke he fekafekauaga, lata ia lautolu ke tauteute tuai ke lauia mitaki e tau mena ka talahau. Ne pehe foki e matakainaga fifine i luga: “Kua nakai o tuli a mautolu mo hoa e tau matua ke he gahua ha laua. Iloa e mautolu e vala ha mautolu ka taute, pete ni ke ta e logo mo e toka e laupepa fakailoa. He tauteute tuai he tau matahiku fahi tapu takitaha, ne iloa e mautolu e mena ka talahau.” Maeke ia koe ke fakaako e fanau hau he fakaaoga falu minuti he tau fahi tapu takitaha ke tauteute a lautolu ma e fekafekauaga, he magahala he fakaakoaga fakamagafaoa po ke he taha magaaho ni.
4 He fakamatala auloa ko e magafaoa ka foaki ki a koe e magaaho ke tuku e kupu moli ke he fanau hau. Taha e matua tane Kerisiano ne uta e tama fifine hana he magaaho ne fano hui a ia ke he tau maaga ke tufa e tau tuleke ke 10 e kilomita he o ki ai mo e 10 e kilomita ka liliu. “Ko e tau magahala o hui ia,” he manatu fiafia e ia, “ne tuku he matua tane haku e kupu moli ke he loto haku.” (Teu. 6:7) Kia fakamonuina foki pihia a koe he taute e gahua he fonua mo vala he setulu he magafaoa hau ma e tau fahi tapu takitaha.