Malolo he Tau Vitio kua Fakamatala Atu
1 “Kua kitekite he tama tane ha maua e vitio tali mai he tote ato maeke ke fano e tau hui. Ne kitekite tafeliuaki e ia. Ko e homo ue atu ha ia ke fai kanavaakau ne kua to e fakaalofa ha Iehova i loto he tau fanau ha tautolu!” Ko e vitio fe a ia kua fakamaama he matua Kerisiano nei? Ko e vitio ne mataulu Noah—He Walked With God. Ko e matua fifine nakai Fakamoli ne kitekite e vitio ki a Noah he kaina he taha tagata ne fakafano ke he la ofisa US$90 mo e huhu kaeke ke fai vitio foki ma e tau fanau. Ko e tau vitio ne taute he fakatokatokaaga ha Iehova kua fakalagalaga malolo ke he tau fanau ikiiki mo e lalahi.
2 I Loto he Magafaoa: He mole e kitekite he magafaoa Fakamoli e vitio Jehovah’s Witnesses Stand Firm Against Nazi Assault, ne talahau he matua fifine: “Kua manamanatu hokulo au he aho katoa ke he puhala kua fakamalolo e Iehova e tau tagata noa ke fakauka ke he tau mena kehe lahi mahaki! Manamanatu ai ke he mena ia ne kua fakamanatu mai ki a au e puhala nukua mena noa e tau lekua haku fakatagata. He kitekite e vitio nei mo e tau fanau ha maua kua lagomatai a lautolu ke kitia maaliali e lata ke falanaki ki a Iehova. He fakatutala auloa ai mo lautolu he magaaho fakamui, kua lagomatai e maua e tau tama fifine ha maua ke mautali ke fehagai mo e tau pehiaaga mo e tau favaleaga kua felauaki mo e tau momoui ha laua.”
3 He Aoga: Ko e taha vala he talahauaga, ne maeke he Fakamoli fuata mui ke fakakite e tama vala he vitio Stand Firm ke he vahega hana. Fakamua, na pehe e faiaoga ko e mena nakai fiafia a ia ke he Tau Fakamoli. He mole e kitekite ke he vitio, ne pehe a ia: “Kua hiki katoatoa he mena nei e puhala he onoonoaga haku ke he Tau Fakamoli a Iehova. Kua mavehe e au ka liliu mai a lautolu ke he gutuhala haku, to fanogonogo au ki a lautolu mo e kamata e fakaakoaga Tohi Tapu mo lautolu!” Ko e heigoa ne hiki hana onoonoaga ki a tautolu? Ne pehe a ia ko e ha tautolu a “fakaalofa moli mo e mahani fakamoli.”
4 He Fekafekauaga: Ne feleveia he matakainaga fifine e fifine kua fakauaua ke talia e tohi, ka e ha ha ia ia e tau huhu hagaao ki a tautolu mo e tau taofiaga ha tautolu. Kua liu atu e matakainaga fifine mo e vitio Jehovah’s Witnesses—The Organization Behind the Name mo e fakakite age ke he fifine mo e tane hana. Ne nava lahi a laua ti talia ke fakaako e Tohi Tapu. Ti ko e fua he fakamatala mitaki atu ki a laua, kua kamata a laua ke fakalautatai e tau momoui ha laua mo e finagalo he Atua.
5 Ha ne fakaaoga katoatoa fakamitaki kia e koe e tau vitio ha tautolu?