Fakamakona Hau a Manako Fakaagaga
1 Ko e ha tautolu a Fonoaga Fahimotu “Tau Tagata Fakapuloa Fakamakai he Kautu” hane hau kua tuku mai ki a tautolu e magaaho homo ue atu ke fakamakona ha tautolu a tau manako fakaagaga. Tuga e mena kai lolo he tino, kua mavehe mai e fakaholoaga ke fagai a tautolu fakaagaga “ke he tau kupu he tua.” (1 Timo. 4:6) To maeke ai ke futia fakatata lahi a tautolu ki a Iehova. Ti amaamanaki a tautolu ke moua mai e tau hatakiaga mo e tau fakamafanaaga ke lagomatai aki a tautolu ke fahia mai he tau kamatamata ke he tau moui ha tautolu. Kua fakamafana e Iehova a tautolu: “To fakaako e au a koe, mo e fakakite kia koe e puhala ke fano ai a koe; to fakatonu e au kia koe, mo e kitekite au kia koe.” (Sala. 32:8) Kua fakamonuina ha a tautolu ke moua hana takitakiaga fakaalofa ke he tau moui ha tautolu! Manamanatu ke he falu lakaaga ka taute e tautolu ke maeke ke moua e aoga lahi mai he fakaholoaga he fonoaga.
2 Lata ke Tauteute e Tau Loto ha Tautolu: Igatia oti a tautolu mo e matagahua ke leveki ha tautolu a tau loto fakatai. (Fakatai 4:23) Kua lata ai a tautolu ke fakagahua e akonaki fakatagata mo e mahani fakamoli a tautolu ki a tautolu ni. Ko e fonoaga ko e magaaho ke manamanatu fakahokulo ke he fakafetuiaga ha tautolu mo Iehova, ko e magaaho ke ‘kikite ke he fakatufono kua katoatoa e mitaki kua ha i ai e tokanoaaga.’ Ke tauteute e tau loto ha tautolu ke ‘talia e kupu ne to,’ kua lata a tautolu ke ole ki a Iehova ke kumikumi mai ki a tautolu, ke fakakite mai ki a tautolu e ha “mahani ke mamahi ai” kua lata ke fakahako, mo e ke takitaki a tautolu ke he “puhala tukulagi.”—Iako. 1:21, 25; Sala. 139:23, 24.
3 Fanogonogo mo e Manamanatu Fakahokulo: Ne nava e Iesu a Maria ha kua fanogonogo fakamakutu ke he hana tau kupu, he pehe: “Kua fifili foki e Maria e mena uho, nakai maeke he uta kehe ia ia.” (Luka 10:39, 42) Kaeke ha ha ia tautolu e manamanatuaga pihia, to nakai fakaata e tau mena ikiiki ke fakatauhele aki a tautolu. To lali a tautolu ke nonofo mo e fanogonogo fakamitaki ke he fakaholoaga katoa. Kalo mai a tautolu he tutala po ke o fano teao ti fakaeneene ke ua fakatauhele e falu aki e tau telefoni uta fano, tau fakahoko fekau, tau pokiata, mo e tau pokiata vitio.
4 Magaaho ka fanogonogo a tautolu ke he tau lauga, kua mitaki ke fakamau fakaku hifo e tau manatu ke lagomatai a tautolu ke filifilia hane fakalaulahi fefe e matapatu he lauga. Kua lata a tautolu ke fakamatutaki e tau mena kua logona e tautolu mo e tau mena kua fita he iloa e tautolu. To lagomatai he mena nai a tautolu ke maama mo e tokaloto e lauga. Ka liu kitekite ke he tau manatu ne fakamau e tautolu, kua lata ke taute pihia e tautolu mo e onoonoaga ke fakagahua ai. Lata a tautolu ke igatia mo e huhu: ‘Lauia fefe e mena nai ke he fakafetuiaga haku mo Iehova? Ko e heigoa e tau hikihikiaga kua lata ia au ke taute ke he haku a moui? Fakagahua fefe e au e tau vala tala nai ke he haku a tau fakafehagaiaga mo e falu? Fakaaoga fefe e au ke he haku a fekafekauaga?’ Tutala mo e falu hagaao ke he tau manatu kua mua atu e fiafia ki ai a tautolu. He taute e tau mena nai to lagomatai a tautolu ke taofi e tau talahauaga ha Iehova ‘ki loto he tau loto ha tautolu.’—Fakatai 4:20, 21.
5 Kia Fakagahua e Tau Mena ne Ako e Tautolu: He mole e finatu ke he fonoaga fahimotu, ne pehe e taha hukui: “Ko e fakaholoaga kua to lahi e lauia fakatagata, kua fakalagalaga e taha ke kumikumi ke he tuaga he loto hana mo e he hana magafaoa, mo e foaki e tau lagomatai fakaalofa faka-Tohiaga Tapu kua lata. Kua taute he mena ia au ke mataala ke he haku a kotofaaga ke foaki fakalahi e lagomatai ke he fakapotopotoaga.” Liga tokologa a tautolu ne logona pihia foki. Ka e nakai koenaia ma tautolu ke o kehe mo e logonaaga atihake mo e hahau. Ne pehe a Iesu: “Kaeke kua iloa e mutolu e tau mena nai, uhoaki a mutolu kaeke kua eke e mutolu.” (Ioane 13:17) Kua lata a tautolu ke ukufakina ke fakagahua e tau valavala kua lauia ki a tautolu fakatagata. (Filipi 4:9) Ko e tali anei ke fakamakona katoatoa e tau manako fakaagaga ha tautolu.
[Puha he lau 3]
Manamanatu Fakahokulo ke he Tau Mena kua Logona e Koe:
■ Lauia fefe ai mo e haku a fakafetuiaga mo Iehova?
■ Fakaohooho fefe ai e haku a tau fakafehagaiaga mo e falu?
■ Fakagahua fefe ai e au ke he haku a moui mo e ke he haku a fekafekauaga?