Fakaholoaga Fou he Toloaga he Takaiaga
1 He tuokafua ke he tua he lalolagi maueue nei, kua lata ia tautolu ke falanaki ki a Iehova. Ko e heigoa e kakano aoga he mena nei ke he ha tautolu a tau momoui? Maeke fefe he falanaki ki a Iehova ke lauia a tautolu takitokotaha mo e moui magafaoa? Lagomatai fefe a tautolu ke totoko e puhala he lalolagi a Satani? Ko e fakaholoaga he toloaga he takaiaga ma e tau he fekafekauaga he 2003 kua tali e tau huhu nei. Ko e hana mataulu “Tua kia Iehova mo e Eke e Mahani Mitaki.”—Sala. 37:3.
2 Ko e tua ha tautolu kia Iehova kua nakai fakakite ni ke he tau magaaho pauaki po ke magaaho hagahagakelea. Kua lauia katoa e tau momoui ha tautolu he tau aho takitaha. Kua peehi e mena nei he lauga hafagi, “Kia Tua a Mutolu ki a Iehova he Tau Vaha Oti.” (Sala. 62:8) Ko e tau fufuta lauga ne fa “Fakakite e Tua kia Iehova” ka fakakite ki a tautolu e puhala ke kumi mo e fakaaoga e vala tala fakave ke he Tohi Tapu ke lagomatai aki a tautolu ke ati hake e fakamauaga kua kautu, ke fakamafola e tau lekua kua puna mai he magafaoa, mo e fakamakona e tau manako fakatino ha tautolu.
3 Kua lali e lalolagi ha Satani ke fakatu mai ki a tautolu e onoonoaga keukeu ke he mena kua hako mo e hepe mo e fakatupu e malokiloki ke he mena kua aoga mo e nakai aoga. (Isa 5:20) Ko e lauga “Puipui Mai he Tau Mena Fakateaga he Moui” mo e “Tiaki e Kelea—Eke mo Tau Tagata he Mitaki” ka fakamalolo e fifiliaga ha tautolu ke tapiki mauokafua ke he tau tutuaga tokoluga ha Iehova.—Amosa 5:14.
4 Ka fakaotioti e Iehova e fakatokaaga kelea nei, to lata e tau fekafekau he Atua ke tua katoatoa ki a ia. Kua fakamaama mai e mena nei he lauga ke he toloaga, “Tata e Fakahaoaga Mai he Lalolagi Tupetupe.” Ka mole e mena ia, to uiina a tautolu ke kumikumi hifo ni a tautolu ke he vala “To Totoku Kia a Koe kua Latatonu ma e Kautu he Atua?” To fakahiku e fakaholoaga mo e fakamafanaaga ke “Tua ke he Tau Maveheaga ha Iehova.”
5 Ko e fakakatoatoa he tau toloaga oti ko e lauga papatisoaga. Ko e ha tagata kua manako ke papatiso kia tala age mafiti ke he fekafekau leveki he fakapotopotoaga ke maeke ke taute e tau fakatokaaga kua lata.
6 He tau magaaho hikihikifano nei, ko Iehova ni e punaaga moli he mauokafua mo e tumau. (Sala. 118:8, 9) Kia igatia a tautolu mo e fakamalolo e tua ha tautolu ia ia he fakalataha ke he fakaholoaga katoa he toloaga he takaiaga.