Lagomatai e Iehova a Lautolu kua Falanaki ki a Ia

¹ Tokologa e tau tagata kua onoono ke he tupe, pule, mo e iloilo he tagata ko e tau matapatuaga ke kautu ai. (Sala. 12:4; 33:16, 17; 49:6) Pete ia, ko lautolu kua matakutaku ki a Iehova mo e falanaki atu ki a ia kua ha ha ai e mauokafua he Tohi Tapu “ko ia ni ko e ha lautolu a lagomatai, mo e akau punuti ha lautolu.” (Sala. 115:11) O mai ke manamanatu ke he ua e fahi kua lata ia tautolu ke fakatata e falanaki ki a Iehova.

² Mo Tau Fekafekau Kerisiano: He ha magaaho ka taute e tautolu e tau kotofaaga he fakapotopotoaga po ke fakaako ke he fekafekauaga he fonua, kua lata ia tautolu ke mauokafua ke he Atua ha tautolu. Manamanatu la ke he fakafifitakiaga ha Iesu. Pete ko e Tama he Atua a ia, ne nakai falanaki a ia ke he pulotu po ke lotomatala ni hana ka e mauokafua katoatoa a ia ke he Matua hana he lagi. (Ioane 12:49; 14:10) Ti mahomo atu mogoia e lata lahi ha tautolu ke pihia foki! (Fakatai 3:5-7) Fakalataha ai mo e monuina ha Iehova ka fakalilifu he tau laliaga fakatokolalo ha tautolu a ia mo e aoga ai e falu.​—Sala. 127:1, 2.

³ Fakatata e tautolu e mauokafua ha tautolu ia Iehova he liogi ma e hana takitakiaga mo e lagomataiaga he hana agaga tapu. (Sala. 105:4; Luka 11:13) He lafi ki ai, kua fakakite e tautolu e falanaki ha tautolu ke he Atua he fakave e fakaakoaga ha tautolu ke he hana Kupu, ko e Tohi Tapu. Ko e fekau kua toka ai e malolo ke hokotia ke he tau loto mo e hikihiki e tau momoui. (Hepe. 4:12) Ka “fekafekau [a tautolu] kia fakalata ke he malolo kua foaki mai he Atua,” kua fakaheke tuai ki a Iehova.​—1 Pete. 4:11.

⁴ Fehagai mo e Tau Lekua: Kua lata foki a tautolu ke ono ki a Iehova ma e lagomatai ka fehagaaoaki a tautolu mo e tau peehiaga mo e tau lekua. (Sala. 46:1) Ma e fakatai, kua liga tehatehaua e takitaki gahua ke tuku mai e magaaho ke o atu a tautolu ke he takaiaga, po ke liga fehagaaoaki a tautolu mo e tuaga paleko he moui magafaoa ha tautolu. Fakakite e tautolu e falanaki ki a Iehova he ole fakamakutu ki a ia mo e fakagahua e takitakiaga kua foaki e ia mai he Kupu hana mo e fakatokatokaaga. (Sala. 62:8; 119:143, 173) He taute pihia, kua moua he tau fekafekau ha Iehova e lagomataiaga hana ke he tau momoui ha lautolu.​—Sala. 37:5; 118:13, 16.

⁵ Kua fakamalolo mai ni e Iehova ki a tautolu: “Uhoaki e tagata kua tua kia Iehova, ko ia kua eke a Iehova mo amaamanakiaga hana.” (Iere. 17:7) Kia fakatata e tautolu e falanaki ha tautolu ki a ia ke he tau mena oti kua taute e tautolu!​—Sala. 146:5.