Puha Huhu

◼ Ko e heigoa ka tokaloto e tautolu ka fakaaoga e tau telefoni uta fano mo e tau fakahoko fekau eleketoniki?

Kua fakaata he tau koloa pihia a tautolu ke matutaki ke he falu he ha matakavi ka ha ha i ai a tautolu. Ha kua liga aoga e mena nei, kia fakaeneene a tautolu ke nakai fakaata e fakaaoga he tau telefoni uta fano mo e tau fakahoko fekau he tau magaaho nakai tutonu ke tauhele a tautolu he fekafekauaga po ke tau feleveiaaga Kerisiano. Maeke fefe e mena nei ke tupu?

Manamanatu la ke he mena ka tupu ka tagi e telefoni uta fano po ke fakahoko fekau ha tautolu ka ko tautolu hane fakamatala ke he fekafekauaga he fonua. Ko e heigoa he tagata he kaina ka manatu ki ai? Ko e heigoa e kitiaaga kua liga toka e tautolu mo e tagata he kaina ka fakamanou a tautolu ke tali e fekau? Nakai manako moli a tautolu ke taute taha mena ke tauhele e falu he fanogonogo ke he fekau he Kautu. (2 Kori. 6:3) Ka e, ka uta e tautolu e telefoni po ke fakahoko fekau, kua lata ia tautolu ke fakatoka ke nakai fakalavelave a tautolu po ke falu hane gahua he fekafekauaga he fonua.

Ka e kua he magaaho ka fakatali a tautolu ka e fakamatala e falu? Ka toka kehe e tautolu e magaaho ma e gahua he fonua, nakai kia hagaaki ni e tau manamanatuaga ha tautolu ke he gahua ia? Mai ni he fakalilifu ke he gahua tapu ha tautolu, fakamolemole toka e tau mena fakapisinisi po ke fakafiafia nakai lata ke he magaaho kehe. (Roma 12:7) Moli, nakai ke tiaki e tautolu e fakaaoga he telefoni ke hea po ke taute e fakatokaaga ke fakamatala atu.

Kia lata pauaki a tautolu ke mataala he fakaaoga e tau telefoni ka fakaholo, ha kua fakakite he falu kumikumiaga ko e taute pihia kua malikiti ki mua e hagahagakelea he pakia. Kua lata ke mailoga fakahokulo e tautolu ha fakatufono kua fakakaupa e fakaaoga he tau telefoni uta fano ka e fakaholo.

Kua o mai a tautolu ke he tau feleveiaaga, tau toloaga, mo e tau fonoaga Kerisiano ke tapuaki ki a Iehova mo e fakaako mai e ia. Nakai kia ko e ha tautolu a loto fakaaue ma e tau mena tapu he tau magaaho pehenai kua omoi a tautolu ke fakatoka e tau telefoni uta fano mo e tau fakahoko fekau ke nakai fakalavelave a tautolu po ke falu? Kaeke ke ha ha i ai e fekau mafiti kua lata ke fakamafiti a tautolu ki ai, kia hagaaki ki ai i fafo he matakavi he feleveiaaga. Ka nakai pihia, kua lata ke fakatoka e tautolu ke taute e tau mena fakatino mo e tau mena fakalalolagi he tau magaaho kehe ka e nakai he magaaho ma e tapuakiaga.​—1 Kori. 10:24.

Kia fakakite tumau e manamanatuaga ma e falu mo e loto fakaaue hokulo ke he tau mena fakaagaga ke he puhala kua fakaaoga e tautolu e tau telefoni uta fano po ke ha koloa eleketoniki.