Puha Hūhū

◼ Ko e heigoa e tau matapatu fakaakoaga he Tohi Tapu kua felauaki mo e fakaaogaaga he tau telefoni utafano he tau feleveiaaga Kerisiano mo e gahua he fonua?

“Ko e Mena mo e Hana Ni a Tau.” (Fakama. 3:1): Maeke he tau telefoni utafano ke fakaaoga he tau tagata ke tohitohi po ke tutala ke he taha tagata he ha magaaho ni. Ka kua fai magaaho ne lata e tau Kerisiano ke ua fakatauhele he tau telefoni ha lautolu. Ke fakatai, ko e tau feleveiaaga ha tautolu ko e tau magaaho ke tapuaki ki a Iehova, moua e tau fakamaamaaga fakaagaga, mo e fiafia ke fefakamafanaaki. (Teu. 31:12; Sala. 22:22; Roma 1:11, 12) Maeke nakai a tautolu ke tamate e tau telefoni ka hohoko mai mo e fakakia e tau fekau ha tautolu ka oti e feleveiaaga? Ka liga fai fekau mafiti mai he telefoni, kua lata ia tautolu ke tuku he tuaga ke ua fakatauhele e falu.

‘Eke e Tau Mena Oti Nai ha Ko e Vagahau Mitaki.’ (1 Kori. 9:23): He falu magaaho kua fai kakano uho ati lata ke fakaaoga e telefoni utafano ka gahua he fonua. Ke fakatai, liga fakaaoga he matakainaga ne leveki e gahua ke fakakia aki a lautolu kua fakamatala he taha matakavi he fonua. Kua fakaaoga he tau tagata fakailoa he falu magaaho e tau telefoni utafano ke hea ke he tagata ne fiafia po ke tagata fakaako Tohi Tapu ato fina atu a ia, mua atu ka nofo mamao e tagata. Ka fai telefoni mo tautolu, kua lata ke fakaeneene ke ua fakatauhele a tautolu ka tutala mo e tagata he kaina. (2 Kori. 6:3) Ka fakatali ke he falu tagata fakailoa, mitaki nakai ke ua hea po ke tohitohi ke he kapitiga ka e hagaaki katoa a tautolu ke he gahua he fonua mo lautolu kua gahua mo tautolu?

Kia Fakalilifu ke he Falu. (1 Kori. 10:24; Filipi 2:4): Aua neke fakateaga a tautolu ke hohoko atu tuai ke he tau feleveiaaga ma e gahua he fonua, mo e manatu na maeke a tautolu ke hea po ke tohitohi he telefoni ke he taha matakainaga ke iloa e matakavi kua gahua ai e matakau. Ka mule a tautolu, fa mahani ke liu fakatokatoka e matakau. Mooli, falu magaaho ha ha i ai e tau tuaga kua nakai amanaki a tautolu ki ai ati mule ai. Pete ia, ka fakamahani ke hohoko atu tuai, kua fakakite e tautolu e fakalilifu ke he fakaholoaga ha Iehova, ke he matakainaga ne leveki, mo e ke he tau matakainaga ha tautolu.