Liu Aahi a Lautolu Oti kua Fai Fiafia ne Fakakite
1 Tokologa a tautolu he kupu mooli he vahā nei ha kua fai tagata ne mailoga e talia fiafia ha tautolu ke he fekau he Kautu mo e fakauka—he liu atu lagaloga—ke feaki e fiafia ia. Kua lata pihia foki a tautolu ke liu aahi atu tumau ki a lautolu oti ne fai fiafia ne fakakite. Ko e taute e tau liu aahi atu mooli kua putoia e poakiaga ke “eke e tau motu oti kana mo tutaki.”—Mata. 28:19, 20.
2 Manamanatu ke he Fiafia: Pete he nakai talia he tagata e tohi, ka e liga fakakite he fofoga, puhala he leo, po ke tau kupu ne fakaaoga e ia na fai loto fakaaue ke he fekau he Kautu. Ha ko e fiafia ia, ati liu aahi atu ai a tautolu. Taha e matakainaga taane ne liu aahi atu ke he tagata ke lima e faahi tapu katoa ka e nakai fai tohi ne toka. He aahi atu ke lagaono aki, ne talia he tagata e tohi, ti fakahiku kamata e fakaakoaga Tohi Tapu.
3 Ka mailoga e koe e fiafia, ti liu mafiti, liga gahoa e aho he mole. Nakai fakaatā “a ia ne kelea” ke hamuti e mena kua gana ke he loto he tagata. (Mata. 13:19) Fakamooli ke he kupu haau kaeke kua fakatoka a koe ke liu atu he magaaho pauaki.—Mata. 5:37.
4 He Gahua he Puhalatū: Kua lali nakai a koe ke liu aahi atu ke he fiafia ne moua e koe he hane gahua ke he puhalatū po ke gahua fakamatala nakai mautali? He matahiku he fakatutalaaga haau, maeke ia koe ke pehē: “Fiafia au ke he fakatutalaaga ha taua. Ko e matakavi fe ke moua e au a koe ke liu a taua ke tutala foki?” Ka lata, fa fifili falu tagata fakailoa ke age e numera telefoni po ke manako ke tautui e tau numera telefoni ha lautolu mo e tagata fiafia. Ka kitia tumau he tau tagata a koe he gahua ke he puhalatū he matakavi agaia, to nakai fakauaua a lautolu ke atu e numera telefoni po ke kaina ha lautolu. Pete ka nakai atu e lautolu e vala tala ke matutaki ki ai, maeke ia koe ke lali foki ke fakalaulahi e fiafia ha lautolu he liu a koe feleveia mo lautolu he puhalatū.
5 Ka kitia e tautolu e tau akau ne kua fakamalū mo e feaki fakamitaki e tautolu, kua tamai ai e olioli ki a tautolu. Pihia foki, maeke ia tautolu ke olioli lahi he taute e tau liu aahi atu mo e lagomatai a lautolu ke tupu fakaagaaga ki mua. (1 Kori. 3:6) Eke mo foliaga haau ke liu aahi atu ki a lautolu ne fakakite e fiafia.