Kia Fakamoli a Koe ke Liu Aahi Atu!
1 “Kua mitaki ha e tutalaaga ia! To tokaloto e au mo e liu aahi atu.” Na talahau pihia nakai a koe, ti fakahiku ai ke nimopo e kaina he tagata ne nofo ai? Ka pihia, ti iloa e koe ko e puhala ni ke fakamoli kua liu aahi atu a koe ka eke ke fakamau hifo.
2 Fakamau Hifo Fakaeneene: He fou agaia ke he loto e fakatutalaaga mo e tagata ne fiafia, fakamau hifo oti e tau mena ne lata hagaao ke he tagata. Fakamau hifo e higoa he tagata mo e puhala kua maeke ia koe ke mailoga a ia. Fakamau hifo e kaina hana, ka e aua tali manatu—kikite kua tonu moli e mena hau ne tohi. Mailoga e mena ne matutaki ai a mua, tau kupu Tohi ne totou e koe, mo e ha tohi ne foaki.
3 Kaeke toka hifo mo e tagata e huhu ke matutaki ki ai ka liu aahi, ti fakamau hifo. Mailoga nakai e koe ha mena hagaao ke he tagata, hana a magafaoa, po ke hana a lotu? Ka pihia, ti fakamau hifo e mena nei. He magaaho ka liu atu a koe, he totoku ai e koe e mena nei, to fakakite e fiafia fakatagata hau ki a ia. He fakahikuaga, fakamau hifo e aho mo e tula ne feleveia fakapa ai mo koe mo e magaaho ne pehe to liu atu a koe. Ka fakamau hifo fakamitaki, to fakamanatu moli ki a koe ti nakai nimo e mavehe hau ke liu atu.—1 Timo. 1:12.
4 Ka katoa e fakamauaga hau, tuku fakalataha mo e tau mena fakatokatoka hau he fekafekauaga—he kato, Tohi Tapu, tohi Reasoning, mo e tau tohi—ti mukamuka ke aaki. Kua mitaki lahi ke fakamau hifo ka ai fai i kaina he tau lau fakamau fale-ke he-taha-fale ke vevehe kehe mo lautolu ne fakaaoga e koe ka liliu aahi atu. Ka e moli, pete e gahua ne taute e koe ke mauloto ke liu aahi atu, kua mua atu ke fakamoli e koe ke liu aahi atu!
5 Manamanatu ke he Tagata: He tauteute ke gahua he fekafekauaga, liu totou hau a tau fakamauaga ke liu aahi atu. Manamanatu takitokotaha ki a lautolu mo e puhala ne mitaki ke fakaaoga ka liu aahi atu. Fili manatu e puhala ke fevagahauaki mo e tagata ne fiafia ke kamata e fakaako Tohi Tapu he kaina. Ko e tau fakatokatokaaga pihia kua maeke ke fakatolomaki hau a gahuaaga ko e tagata fakamatala he tala mitaki mo e, pihia foki, e olioli fakatagata hau.—Fakatai 21:5a.
6 Ti, he magaaho i mua ka feleveia a koe mo e taha ne fakateliga mai, aua manatu kua mukamuka ia koe ke tokaloto ke liu aahi atu. Nakai, kia fakamau hifo, liu totou e tau fakamauaga hau, fakatumau ke manamanatu ke he tagata, ti fakamoli kua liu a koe ke aahi atu!