Kia Eke mo Tagata Matutaki!
1 Ke taute e poakiaga ha tautolu ke fakamatala mo e taute tutaki, kua lata ia tautolu ke fakahoko e vala tala ke he falu. (Mata. 24:14; 28:19, 20) Maeke e matutakiaga ke uka ti hoko foki ke he vahaloto he tau kapitiga. Ko e heigoa kua lagomatai a tautolu ke hokotia e tala mitaki ke he tau tagata kehe?
2 Mai he Tagata Kehe ke Eke mo Kapitiga: Lali ke tuku e koe a koe he tuaga ha lautolu kua finatu a koe ki ai he fekafekauaga. He lalolagi he vaha nei, kua maama ai na fai ne liga tuaha, po ke matakutaku foki, he tau tagata kehe. Maeke he mena nei ke fakalolelole e matutakiaga. Maeke fefe ia koe ke fahia mai he tuaha tuai ki a lautolu ne feleveia mo koe? Fakamua to vagahau a tautolu, ko e taha puhala ke matutaki a tautolu ko e tauteuteaga fakatagata nukua gali. Ko e ha tautolu a tauteuteaga maopoopo mo e lilifu kua lagomatai ke fakatote aki e tau matakutaku.—1 Timo. 2:9, 10.
3 Ko e taha lagomataiaga ke he matutakiaga ko e mahani kapitiga ne fakatotoka. Lagomatai he mena nei e falu ke totoka mo e taute a lautolu ke fanogonogo. Ko e tauteuteaga mitaki kua lata mo e mena nei. Ka ha ha he tau manamanatuaga ha tautolu e mena kua amanaki a tautolu ke talahau, kua fa mahani ke fakatotoka hifo a tautolu. Ti ko e tuaga mafola nei he manamanatuaga he vala ha tautolu kua maeke ke futia mai e falu ke he fekau ha tautolu. Taha e fifine ne pehe hagaao ke he ahi atu he Fakamoli: “Ko e mena ne manatu e au ki a ia ko e mata mamali hana e mafola. Ne fakalagalaga ai au.” Kua hafagi he mena nei e puhala ma e fifine ke fanogonogo ke he tala mitaki.
4 Tau Mahani kua Futiaki: Lata ia tautolu ke ha ha ai e fiafia fakatagata moli ke he falu. (Filipi 2:4) Taha puhala ke taute e mena nei ko e nakai pule lahi ke he fakatutalaaga. Moli ai, ko e matutakiaga kua putoia foki e fanogonogo. Ka uiina e tautolu e tau tagata fanogonogo ha tautolu ke talahau e tau manatu ha lautolu ti ka fanogonogo mo e fiafia a tautolu ke he tau talahauaga ha lautolu, logona e lautolu kua manamanatu a tautolu ki a lautolu. Ti ka tutala e tau tagata fanogonogo hau, ua mafiti ke fuluhi ke he fakataitaiaga hau kua taute. Nava fakamoli ki a lautolu, ti lali ke fakalaulahi e iloaaga hau ke he tau mena ne talahau e lautolu. Ka fakakite he tau talahauaga ha lautolu e mena kua mokoina ke he tau loto ha lautolu, hikihiki e fakataitaiaga hau ke felauaki mo e tau kapaletu ha lautolu.
5 Ko e fakatokolalo mo e loto holoilalo kua fakamalu e matutakiaga. (Fakatai 11:2; Gahua 20:19) Ne tafe atu e tau tagata ki a Iesu ha kua “totonu mo e loto holoilalo” a ia. (Mata. 11:29) He taha fahi, kua totoko e aga fakatokoluga. Ti, pete nukua iloa mauokafua e tautolu kua moua e tautolu e kupu moli, kia fakapulotu a tautolu he nakai vagahau fakamao.
6 Ka e kua ka fakaata he tau talahauaga he tagata e tau taofiaga nukua nakai lagotatai mo e mena ne fakaako he Tohi Tapu? Ha ha kia ia tautolu e malolo ke fakatonu a ia? E, to pihia, ka e aua neke lali a tautolu ke taute pihia ka ahi atu fakamua. Fa mitaki ke atihake e tau manatu kua mahani mau ki a tautolu mo e tau tagata fanogonogo ha tautolu, ato fakalataha ke he tau fakaakoaga he Tohi Tapu ne kua liga uka lahi a ia ke talia. Kua lata ai mo e fakauka mo e fakailoilo. Ne fakatoka e Paulo e fakafifitakiaga mitaki ke he mena nei he fakamatala ke he tau fakafili i Areopako.—Gahua 17:18, 22-31.
7 Mua atu ai, ko e fakaalofa nakai lotokai ka lagomatai a tautolu ke eke mo tau tagata matutaki lauia mitaki. Tuga a Iesu, kua lata ia tautolu ke fakaalofa hofihofi ke he tau tagata “ne fakafita a lautolu, mo e tiaki atu ai, tuga e tau mamoe nakai fai leveki.” (Mata. 9:36) Kua peehi he mena nei a tautolu ke ta atu e tala mitaki ki a lautolu mo e lagomatai a lautolu ke o he puhala he moui. Ko e fekau he fakaalofa ha tautolu, ti fakatumau ke talahau atu ke he puhala fakaalofa. He taute pihia, kua fifitaki e tautolu a Iehova ko e Atua mo Iesu Keriso—ko e tau Matutaki mua ue atu he lalolagi mo e lagi katoatoa.