Aoga Katoatoa Mai he Fonoaga Fahimotu “Tau Tagata Fakapuloa Fakamakai he Kautu”

¹ Ko e Fakaholoaga Fakamalolo: Ko e fakalagalaga ha ia he fakaholoaga ne olioli ai e tautolu he fonoaga fahimotu kua mole! Ne fakapotopoto a tautolu ke he taha e kakano, ke fakakoloa fakalahi atu ke fakapuloa fakamakai e Kautu he Atua. Manatu nakai e koe e puhala ne fakamaama aki he tagata ne lauga fakamua e tau kupu “ke fakapuloa”? Manatu nakai e koe ko e heigoa e kumikumiaga ne fakamafana a tautolu ke taute mai he lauga “Kia Nakai Matakutaku he Iloa ko Iehova Hanai mo Tautolu”? Ko e heigoa e tau talahauaga moui moli kua kumikumi a koe ki ai ke hoko mai ke he magaaho nai?

² Ko e fufuta lauga “Kua Kamatamata e Alito he Tua ha Tautolu Mai he Tau Kamatamata Kehekehe” ne foaki mai tolu e matapatu kakano ne fakaata e Iehova e favaleaga. Maeke nakai ia koe ke fakamaama ko e heigoa e tau mena ia? Ko e heigoa e fakaveaga faka-Tohiaga Tapu ma e tu uho faka-Kerisiano ha tautolu? Ko e heigoa ne fakamafana mai ki a tautolu ke taute ke mau amaamanaki ma e tau paleko ke he tuaga tu uho ha tautolu? Tamai fefe he fakauka fakamoli ha tautolu ke he tau kamatamata e fakahekeaga ki a Iehova?

³ Ko e tau vala fe he taute tala “Kia Tumau he Tau Magaaho Hagahagakelea” ne lahi e fakamalolo ki a koe? Maeke fefe a tautolu ke tuga a Ieremia?

⁴ Ko e lauga ke he toloaga, “Ko e Tuaga he Lalolagi Nai Hane Hiki,” ne fakamatafeiga mai ko e heigoa e tau hikihikiaga uho hane fakatoka mai i mua mo e kua takitaki atu ke he aho matakutakuina he Atua? He fanogonogo ke he lauga fakahiku, “Puke ke he Tau Gahua Mitaki ko e Tau Tagata Fakapuloa Fakamakai he Kautu,” kua fakaaoga fefe e koe e tau vala tala ia ke he hau a fekafekauaga fakatagata he fonua?

⁵ Tau Matapatu Manatu ke Fakagahua: Tuga ne fakamaama mai he lauga “Kia Fakakite a Mutolu kua Fakaaue,” maeke fefe a tautolu ke fakakite e hokulo he fakaaue ha tautolu ki a Iehova? Ke he lauga taute pauaki, “Tau Tagata Fakapuloa ne Puhopuho e Fakamakai,” ko e ha hai e fakamakai ne fakamafana a tautolu ke fifitaki? Ko e heigoa e kamatamata fakatagata ne ole mai ke taute ni e tautolu?

⁶ Ko e fufuta lauga “Perofetaaga ha Mika kua Fakamalolo a Tautolu ke O ke he Higoa ha Iehova,” ko e heigoa e tau mena tolu ne fakamaama mai kua lata ia tautolu ke hokotia ki ai ke moua e taliaaga ha Iehova? Maeke nakai e tau mena nai ke moua? (Mika 6:8) Hagaao ke he lauga “Fakatumau e Mahani Mea he Leveki e Loto,” ko e tau puhala fe kua lata a tautolu ke leveki e mahani mea? Ko e heigoa e tau vala he lauga “Puipui Mai he Fakavaia” kua hataki mai ki a tautolu ke nakai lauia he fakavaia mo e nakai fakavaia e falu?

⁷ Ha e fe e tau manatu aoga mai he fufuta lauga “Tau Tagata Fakapuloa he Kautu Nukua Fakalilifu ha Lautolu a Fekafekauaga” kua kamata a koe ke fakagahua ke he fekafekauaga hau? Ne filifilia e tohi a Filipi 4:8 he lauga “Ati Hake e Fakatutalaaga Fakaagaga.” Lagomatai fefe he kupu tohi ia a tautolu ke fakave fakaagaga e tau fakatutalaaga ha tautolu, mo e magaaho fe kua lata ke taute pihia e tautolu?

⁸ Ko e lauga “Falanaki Katoatoa ki a Iehova he Tau Vaha Matematekelea” ne fakatutala e puhala ke fehagai a tautolu mo e tau matematekelea fakaofo, taufetului fakatupe, nakai tino malolo, tau lekua fakamagafaoa, mo e kaumahala tumau. Fakakite fefe e tautolu e falanaki ki a Iehova he fehagai mo e tau tutuaga pehenai?

⁹ Tau Koloa Uho Fakaagaga Fou: Ne fiafia lahi a tautolu he moua e tohi fou Worship the Only True God. Lauia fefe a koe he fakailoaaga ne fakamaama e kakano he tohi nai? Ko e ha to lagomatai lahi ai ke he ha tautolu a gahua taute tutaki he eke mo tohi ke uaaki ka fakaako ki ai?

¹⁰ Ne moua foki e tautolu e tohi fulufuluola Fakatata Atu ki a Iehova. Ko e heigoa e falu vala pauaki he tohi? Tau fakatai fe kua fiafia lahi a koe ki ai? He totou a koe ki ai kua futia fakatata lahi atu nakai a koe ki a Iehova? Ko hai foki ka liga ke moua e aoga mitaki mai he tohi?

¹¹ Ko e Fonoaga Fahimotu “Tau Tagata Fakapuloa Fakamakai he Kautu” kua foaki mai ma tautolu e tau fakamafanaaga fakaagaga kua latatonu mo tautolu ke fehagai mo e tau vaha uka nai. Ti ke aoga katoatoa mai he tau foakiaga fakaagaga kua kehe lahi nai, kia ukufakina a tautolu ke manatu e tau mena kua lauga mai, fakaaue ke he tau mena kua moua, mo e fakagahua e tau mena ne ako e tautolu. (2 Pete. 3:14) He taute pihia to fakamalolo a tautolu ke tumau fakamoli mo e ke fakamakai ko e tau tagata fakapuloa he Kautu he fifitaki ke he ha tautolu a Iki ko Iesu Keriso, ko e tau mena oti ma e fakatokolugaaga ha Iehova.​—Filipi 1:9-11.