Hane Fakagahua Nakai e Koe e Tau Mena ne Ako Mai he Fonoaga Fahimotu “Tau Faiaoga he Kupu he Atua”?
1 Ko e ha tagata kua fina atu ke he fonoaga fahimotu he tau nei nukua kitia ko e foliaga he tau tagata ha Iehova ke fakamoli e poakiaga ha lautolu ke eke mo tau faiaoga he Kupu he Atua. (Mata. 28:19, 20) He liu a koe ki kaina, ko e heigoa e tau manatu pauaki he fakaakoaga ne fifili e koe ke fakagahua ke he moui ni hau mo e ke he fekafekauaga he fonua?
2 Aoga e Tau Tohiaga Tapu ma e Fakaakoaga: Ko e matapatu fakatutalaaga he aho fakamua ko e 2 Timoteo 3:16. Ko e lauga pauaki ne fakakite e mena ia ke “Mauokafua Katoatoa ko e Tau Faiaoga he Kupu he Atua,” kua lata ke tuku fakatokoluga e tautolu e Kupu he Atua, fakalilifu atu mai he ha manatu fakatagata po ke fakamotu, ti fakaaoga tumau ai. Kua lata foki ia tautolu ke liogi ma e agaga tapu he tau aho takitaha ke lagomatai a tautolu he fekafekauaga mo e gahua ha tautolu ke feaki e fua mua ue atu—ko e fakaalofa. Ti kua lata ia tautolu ke fakaata e fakatokatokaaga ha Iehova he lalolagi ke fakamahani a tautolu ko e tau fekafekau puhala mai he tau feleveiaaga oti he fakapotopotoaga.
3 Ko e fufuta lauga he Aho Faraile, “He Fakaako a Tautolu he Magaaho Taha Ha ne Fakaako e Falu,” ne fakamaama kua lata ia tautolu ke eke mo fifitakiaga he (1) pipiki mau ke he fakatufono he Atua he tau puhala kehekehe oti he mahani Kerisiano, (2) fakatumau e aga kumikumi makutu he fakaako, mo e (3) tiaki e tau aga mo e tau tuaga he loto mo e manamanatuaga kua maeke he Tiapolo ke fakahehe ai. Holo atu, ne ako e tautolu e tau puhala aoga ke puipui e tau magafaoa ha tautolu mai he malaia fakalalolagi he tau tohi fakatino telefua. Ne fakamalolo ke he tau matua ke fakatoka e fakafifitakiaga he tiaki e onoono fakaku ke he ata mahani fakatane mo e fifine mo e ke leveki e tau fanau ha lautolu he fakaaoga e Internet mo e kitekite televisoni. Ha fe e tau manatu he fakaholoaga he Aho Faraile kua kamata a koe ke fakagahua?
4 Ko e lauga fakahiku he aho ne fakamaama e fifiliaga ha tautolu ke tokiofa e maama ha Iehova, ke nonofo fakatata ke he vahega fakauku fakamoli he Atua, mo e gahua he fakatupu ke he mafola he tau tagata ha Iehova. Kua totou nakai e koe e Isaiah’s Prophecy—Light for All Mankind II?
5 Lata Moli ke Fakaako e Falu: Ko e mataulu ma e kupu he aho ke ua ko e 2 Timoteo 2:2. He fanogonogo a koe ke he fufuta lauga he pogipogi Faiumu, fakamau hifo nakai e koe e tau manatu he puhala ke (1) kumi a lautolu kua lata, (2) feaki e fiafia ha lautolu, mo e (3) fakaako a lautolu ke taute e tau mena oti ne poaki he Keriso? Ha ne fakagahua kia e koe e tau mena ne ako e koe—ke fakakite ke he tau tagata he kaina kau ke taha e manatu he tau Tohiaga Tapu mo e ke fakatoka e fakaveaga ma e liu ahi atu he magaaho i mua?
6 Ko e fakaholoaga he magaaho afiafi ne peehi e aoga he fifitaki e Faiaoga ne Mua, ko Iesu. Ko e heigoa e tau puhala kua manako a koe ke eke ke tuga a ia? Mai he mena ne iloa e koe he fufuta lauga ke ua he aho ia, fefe e logonaaga hau kua maeke ia koe ke “Aoga Katoatoa Mai he Fakaakoaga Fakateokarasi”? Ko e heigoa e tau manatu ne fakagahua e koe ke fakalahi hake e magaaho manamanatu hokulo hau ka fakaako fakatagata mo e tau feleveiaaga he fakapotopotoaga?
7 Nakai fakauaua, ko e foakiaga mai i mua Benefit From Theocratic Ministry School Education ka lagomatai a tautolu ke tupu lotomatala ke he tau iloaaga ha tautolu ko e tau tagata vagahau mo e tau faiaoga he Kupu he Atua. To hagaaki lahi atu ke he tau mahani vagahau nukua fakakite e tau fekafekau fakamoli he Atua he tau vaha Tohi Tapu. Ko e tau fakaakoaga takitaha he tohi fou kua ha ha ai e puhala kua fakakite fakamahino e mena kua lata ia tautolu ke taute, kakano kua aoga, mo e puhala ke taute aki. Kua putoia ai e tau fakamahaniaga aoga. Ko e 29 la e tau fakatokaaga ke fifili mai he tau matakainaga fifine he magaaho ka taute e tau kotofaaga ha lautolu. Magaaho ia, to taute e tau hikihikiaga he fakailoa e fakatokaaga he aoga. Ha ha nakai ia koe e fakaholoaga mitaki he fakaako mo e tauteute ke maeke ke aoga katoa mai he Aoga Fekafekau Fakateokarasi he tau fahitapu takitaha?
8 Eke mo Tau Faiaoga ke Lata mo e Magaaho: Ne fakatoka he Heperu 5:12 e manatu ma e Aho Tapu. Ko e fufuta lauga he magaaho pogipogi, ko e “Perofetaaga ha Malaki kua Mautauteute a Tautolu ma e Aho ha Iehova,” nukua fakamalolo a tautolu ke foaki katoatoa ke he Atua mo e fakavihia e tau puhala oti he taute lagatau ke maeke ia tautolu ke hao he aho lahi mo e matakutakuina ha Iehova. Ko e taute tala, “Fakalilifu e Pule ha Iehova,” ne fakakite malolo e puhala he fakaikaluga, talahaua, mahekeheke, mo e nakai mahani fakamoli ha Koru mo e hana tau ekegahua ne takitaki ke taute e totokoaga kelea ki a ia ko Iehova. Ko e tau lauga ka mui mai ne hagaaki ai ke he manako he vaha fou nei ke muitua ke he pule mahani Atua i loto he magafaoa mo e fakapotopotoaga. Ko e lauga ke he toloaga, “Ko Hai Ha ne Fakaako e Kupu Moli ke he Tau Motu Oti Kana?,” ne foaki e fakamoliaga ko e Tau Fakamoli a Iehova ha ne taute ai, kua kehe mamao mo e Kerisitenitome, ne talahau teao ke fakaako e kupu moli he Tohi Tapu.
9 Maali ai, kua fakamahani e Iehova a tautolu ke eke mo tau faiaoga mitaki he hana Kupu. O mai a tautolu ke fakagahua e tau mena ne ako e tautolu, ko ‘tautolu, katoa mo e ha tautolu a fakaako atu, kia tumau ki ai; ha ko e mena ka eke e tautolu e mena ia ti fakamoui ai a tautolu, katoa mo lautolu kua fanogonogo mai ki a tautolu.’—1 Timo. 4:16.