Puha Huhu

◼ Magaaho fe ka latatonu ke fakatu e matakau vagahau kehe?

Ka lahi e puke tagata vagahau kehe ne nonofo ke he matakavi he fakapotopotoaga, kua lata e tau motua ke taute e mena kua fahia a lautolu ki ai ke fakatokatoka e gahua fakamatala he vagahau ia. (km 7/02 lau 1; km 2/98 lau 3-4) Liga ko e tau tagata vagahau kehe kua nonofo fano ke he ua po ke molea atu e tau matakavi he tau fakapotopotoaga tata mai. Ke he tau tutuaga pihia, ko e (tau) leveki takaiaga ka foaki e tau fakatonuaga kua lata, ti lagomatai e tau fakapotopotoaga ne putoia ke kaufakalataha ke he gahua fakamatala. Ke he taha magaaho mo e taha magaaho, ko e lauga ma e tau tagata po ke Fakaakoaga Kolo Toko to liga fakatokatoka ke kitia ko e tokologa nakai kua lagomatai e tau feleveiaaga he vagahau kehe ia.

Maeke e matakau vagahau kehe ke fakatu ka hokotia ke he tau mena nei: (1) Fai tagata fakailoa po ko lautolu ne fiafia ne kua maama lahi e tala mitaki he vagahau kehe ia. (2) Fai motua kua lata po ke fekafekau lagomatai ke takitaki mo e taute kavi ke taha e feleveiaaga he fahi tapu. (3) Fai kau he tau motua kua fiafia ke lagaki e matakau. Ka hokotia ke he tau mena nei, kua lata e tau motua ke fakailoa ke he la ofisa ke maeke ke fakamailoga fakamitaki e matakau mo e maeke ke foaki fakalaulahi atu e tau fakatonuaga.

Laulahi he tau matakau ne kamata he taute e Fakaakoaga Tohi he Fakapotopotoaga ke he tau fahi tapu takitaha. He levaleva, ko e tau motua ne liga talia ke lafi atu foki e falu feleveiaaga, tuga e Feleveiaaga ma e Tau Tagata mo e Fakaakoaga Kolo Toko. Ko e kotofaaga Nu. 2, 3, mo e 4 he Aoga Fekafekau Fakateokarasi kua lata ke taute he poko kehe kaeke fai motua kua lata po ke fekafekau lagomatai ne vagahau e vagahau ia ke eke mo tagata fakatonu. Ka e, ko e matakau ia to lafi mo e fakapotopotoaga katoa ma e lauga he alito he vagahau, lauga fakaako, tau fakamaamaaga mai he totouaga he Tohi Tapu, mo e Feleveiaaga Fekafekau. Maeke foki ke fakatoka e tau feleveiaaga ke lata mo e gahua he fonua ma e matakau.

Ko e tau tagata oti he matakau to gahua auloa ki lalo hifo he levekiaga he kau he tau motua. Ko e tau motua kua lata ke foaki e tau takitakiaga lagotatai mo e fakakite e hakahakau he leveki e tau manako he matakau. Ka ahiahi atu e leveki takaiaga ke he fakapotopotoaga ne lagaki e matakau, to maeke a ia ke fakatoka ke gahua mo e matakau ke ati hake ai fakaagaga. Mo e fakamonuinaaga ha Iehova, to hoko ke he taha vaha to eke e matakau vagahau kehe ia mo fakapotopotoaga.