Feaki e Fakafetuiaga Tata mo Iehova
1. Ko e heigoa ne mailoga he taha matakainaga fifine hagaao ke he hana a fakaholoaga fakaagaga?
1 “Kua leva tuai e nofo au he kupu moli ke he 20 po ke molea atu e tau tau kua mole he fano noa ni ke he tau feleveiaaga mo e taute e fekafekauaga he fonua,” he talahau he taha matakainaga fifine Kerisiano. Pete ia, he matutaki atu e ia: “Kua hoko mai au ke fakakatoatoa ko e pete he aoga e tau mena nei, nakai maeke he tau mena ia hokoia ke tumauokafua ai au ka kamata ke uka e tau tutuaga. . . . Kua mailoga e au mogonei kua lata ia au ke hikihiki haku a tau manamanatuaga mo e kamata e fakaakoaga fai kakano ke maeke ia au ke iloa moli a Iehova mo e fakaalofa ki a ia mo e loto fakaaue ke he mena ne foaki mai he hana Tama ma tautolu.”
2. Ko e ha ne aoga ai ke feaki e fakafetuiaga tata mo Iehova?
2 Ke atihake e tata lahi he fakafetuiaga fakatagata mo Iehova kua lata ia ma e laliaga. Kua lahi atu ke he muitua noa ni ke he fakaholoaga he gahua Kerisiano. Ka kaumahala a tautolu ke tutala tumau mo Iehova, to fakahiku ai kua tatai a ia ki a tautolu tuga e kapitiga tata he taha vaha ka kua nakai matutaki ki ai. (Fakakite. 2:4) Kia kumikumi la a tautolu ke he puhala kua maeke e fakaakoaga fakatagata ke he Tohi Tapu mo e liogi ke lagomatai a tautolu ke feaki e fakafetuiaga mo Iehova.—Sala. 25:14.
3. Ko e heigoa e onoonoaga ke he fakaakoaga fakatagata ka lagomatai a tautolu ke fakatata atu ke he Atua?
3 Aoga e Liogi mo e Manamanatu Fakahokulo: Ko e fakaakoaga fakatagata ne fagai e loto kua lahi atu e mena ne putoia ki ai mai he vate noa ni he tau matapatu manatu i loto he tohi ka fakaako ki ai mo e kumi e tau kupu tohi ne fakakite mai ai. Kua lata he fakaako fakatagata ha tautolu ke manamanatu ke he tau vala tala ne fakakite e tau puhala, tau tutuaga, mo e aga ha Iehova. (Esoto 33:13) Ko e hokotia ke maama e tau mena fakaagaga kua amohia ai e tau logonaaga ha tautolu mo e fakaohooho e tau manamanatuaga ha tautolu ke manamanatu hagaao ke he tau momoui ha tautolu ni. (Sala. 119:35, 111) Kua lata e fakaakoaga fakatagata ke taute mo e manatu ke fakatata fakalahi ki a Iehova. (Iako. 4:8) Ko e fakaako fakamakutu kua lata ke lahi e magaaho pihia mo e takatakaiaga hagahaga mitaki, mo e kua lata ke fakamahani ke fakaako tumau. (Tani. 6:10) Pete ni e lavelave lahi mahaki e moui hau, kua fakatoka nakai e koe taha magaaho he tau aho takitaha ke manamanatu fakahokulo ke he tau aga homo ue atu ha Iehova?—Sala. 119:147, 148; 143:5.
4. Maeke fefe he liogi he fakaakoaga fakatagata ke lagomatai a tautolu ke feaki e fakafetuiaga tata mo Iehova?
4 Ko e liogi mai he loto ko e vala kua aoga lahi ke he fakaakoaga fakatagata ne fai kakano. Ma e tau kupu moli he Tohi Tapu ke fakaohooho e tau loto ha tautolu mo e omoomoi a tautolu ke ‘fekafekau ke he Atua mo e maimaina mo e matakutaku faka-Atua,’ kua lata ke moua e tautolu e agaga tapu he Atua. (Hepe. 12:28) Ko e mena ia, kua lata ia tautolu ke hafagi e tau fakaakoaga takitaha he ole ki a Iehova ma e hana agaga. (Mata. 5:3) He manamanatu a tautolu ke he tau Tohiaga Tapu mo e fakaaoga e tau tohi lagomatai nukua foaki mai he fakatokatokaaga ha Iehova, kua fakatokanoa e tautolu e tau loto ha tautolu ki a Iehova. (Sala. 62:8) He taute e fakaakoaga ke he puhala pehenei ko e puhala tapuaki nukua fakakite e fakamoliaga ha tautolu ki a Iehova mo e fakamalolo e pipiaga ha tautolu ki a ia.—Iuta 20, 21.
5. Ko e ha kua aoga ai ma tautolu ke manamanatu fakahokulo ke he Kupu he Atua he tau aho takitaha?
5 Ke tuga ni e tau fakafetuiaga oti, ko e fakafetuiaga ha tautolu mo Iehova kua latatonu ke fakatumau ke feaki ke maeke ai ke tupu hololoa ke he tau momoui katoa ha tautolu. Ko e mena ia, kia fakaaoga e tautolu e tau magaaho he tau aho takitaha ke fakatata atu ke he Atua, he iloa ai, to fakatata mai a ia ki a tautolu.—Sala. 1:2, 3; Efeso 5:15, 16.