Taute e Magaaho Fakaako ke Holo ki Mua e Fiafia mo e Aoga
Maeke fēfē a tautolu ke holo ki mua e fiafia ka fakaako e Tohi Tapu? Maeke fēfē a tautolu ke taute e tau magaaho fakaako ha tautolu ke aoga lahi? O mai la ke fakatutala fakakū ke he tolu e lakaaga aoga ka lagomatai a tautolu ke fakalaulahi atu e aoga he fakaako fakatagata ke he Tohi Tapu.
1 LIOGI: Ko e lakaaga fakamua ke taute ko e liogi. (Sala. 42:8) Ko e ha? Kua lata ia tautolu ke manamanatu ko e fakaako he Kupu he Atua ke eke mo vala he tapuakiaga ha tautolu. Ko e mena ia, kua lata ia tautolu ke ole ki a Iehova ke foaki mai e loto manamanatu mitaki mo e foaki mai haana agaaga tapu. (Luka 11:13) Pehē a Barbara, ko e taha misionare kua leva e gahua: “Na liogi tumau au to kamata ke totou po ke fakaako e Tohi Tapu. Ka oti e liogi, kua logona e au e fakalataha mai a Iehova mo au ti kua talia e ia e gahua haaku ne taute.” Ko e liogi to kamata e fakaako ka hafagi e loto mo e tau manamanatuaga ha tautolu ke talia katoatoa e tau mena kai fakaagaaga loga kua ha ha i mua ha tautolu.
2 MANAMANATU FAKAHOKULO: Ha ko e temotemoai he tau magaaho, kua fakakaupā ni he falu a lautolu ke totou holo noa ni e Kupu he Atua. Ka kua nakai moua e lautolu e aoga kua tupu mai ha ko e fakaakoaga ke he Tohi Tapu. Ko Carlos, kua molea e 50 e tau tau he fekafekau ki a Iehova, ne mailoga e aoga he fakatoka taha magaaho ke manamanatu fakahokulo ke maeke e fakaako haana ke aoga lahi. Pehē a ia: “He mogonei kua gahoa ni e tau lau he Tohi Tapu ka totou he taha e magaaho—kavi ke he ua e lau he aho. Ti maeke au ke lahi e magaaho ke manamanatu fakahokulo ke he tau mena haaku ne totou ke iloa e tau fakaakoaga aoga.” (Sala. 77:12) Ka fakatoka e tau magaaho ke manamanatu fakahokulo, to holo ki mua e iloilo mo e maamaaga ha tautolu ke he finagalo he Atua.—Kolo. 1:9-11.
3 FAKAGAHUA: Ka kitia e tautolu e aoga lahi he matagahua, to aoga ai ki a tautolu. Kua mooli e mena ia ke he fakaako he Tohi Tapu. “Lagomatai he fakaako au ke kautū mai he tau lekua he moui he tau aho takitaha, ti mautali au ke lagomatai e falu,” he talahau e Gabriel, ko e matakainaga taane fuata ne fai fakaholoaga ke fakaako tumau e Tohi Tapu. Lafi e ia ki ai: “Lali au ke fakagahuahua he moui haaku e tau mena oti ne fakaako e au.” (Teu. 11:18; Iosua 1:8) E, lahi mahaki e iloilo faka-Atua kua maeke ke moua mo e fakagahua e tautolu.—Fakatai 2:1-5.
LIU KITEKITE: Ko e monuina hā ia kua maeke ia tautolu ke kumikumi ke he pulotu mai ia Iehova, ko e Punaaga he tau iloilo oti kana! (Roma 11:33) Ko e mena ia, ka liu foki a koe ke fakaako, manatu ke liogi fakamua ki a Iehova ti ole ki a ia ke foaki atu ki a koe e loto manamanatu mitaki mo e haana agaaga tapu. Ti fakamaoki he falu magaaho ke manamanatu fakahokulo ke he tau mena haau ne totou. Lafi ki ai, muitua mo e fakagahua ke he moui haau he tau aho oti e tau mena ne fakaako e koe. Ka taute e koe e tau lakaaga aoga nei, to moua e koe e fiafia mo e aoga lahi ha ko e fakaako ke he Tohi Tapu.