Tau Mena Kai Fakaagaga he Magaaho Tonu
1. Kua fakamoli fefe e Esekielu 36:29 he vaha nei?
1 “To ui age foki e au ke he tau saito, mo e fakatupu fakaloga ai e au, ka e nakai tuku atu e au e hoge kia mutolu,” he talahau he Iki Pule Katoatoa ko Iehova. (Eseki. 36:29) Hagaao e tau kupu fakaperofeta ia ke he tau tagata he Atua he vaha nei. He vagahau fakatai, ne fakatupu fakaloga e Iehova e tau saito ke leveki aki e tau momoui he tau tagata hana. Ko e tau mena kai fakaagaga he magaaho tonu kua mai he tau fonoaga he fahimotu ha tautolu kua fakakite e moli he mena nei.
2. Fakaaoga fefe e Iehova e tau fonoaga he fahimotu ke tufatufa e tau mena kai fakaagaga he magaaho tonu?
2 He fonoaga i Columbus, Ohio, he 1931, ne talahau e Iehova ke he tau tagata tapuaki hana ke hiki ke he higoa fou—ko e Tau Fakamoli a Iehova. (Isaia 43:10-12) He 1935 ne fakakite fakahako e moto tagata tokologa he Fakakiteaga 7:9-17. He 1942, ne taute he Matakainaga Knorr e lauga “Mafola—Maeke Kia ke Tumau?” Ne fakamalolo he lauga ia e gahua fakamatala he lalolagi katoa ti takitaki atu ke fakatu e Aoga Tohi Tapu a Kiliata he Kolo Toko. Pete kua mua atu pauaki falu fonoaga, ne igatia oti mo e fakamoli ko e laulau kua olatia lahi he tau mena kai fakaagaga huhua mitaki ne fakatoka mai he magaaho tonu.—Sala. 23:5; Mata. 24:45.
3. Ko e heigoa ha tautolu ka taute ke aoga mai he galue fakaagaga he ha tautolu a fonoaga he fahimotu?
3 Mitaki Fefe e Puhala Kai Hau? Kua maeke ke agaagai e tau mena kai ka e nakai tupuaki e tino ka nakai lali a tautolu ke kai. (Fakatai 26:15) Pihia tonu foki ke he tuaga fakaagaga. He falu fonoaga gahoa, ne kitia kua tokologa ne o fano teao po ke tutala ke he falu he magaaho fonoaga. Pete ko e taha vala aoga lahi he fonoaga ko e lafiaga atihake, ko e magaaho ma e mena nei ko e ato kamata mo e ka hili e tau fakaholoaga takitaha. (Fakama. 3:1, 7) Kaeke nakai nonofo a tautolu he tau nofoa ha tautolu mo e fanogonogo, to liga to noa ia tautolu e manatu aoga lahi. Ko e tau leveki matagahua he fonoaga mo e tau matakainaga fai kotofaaga ne fa fakatutala ke he tau mena he fonoaga he magaaho fono. Ka nakai gahua, kua lata ia lautolu ke fakatoka e fakafifitakiaga ke fanogonogo katoa ke he fakaholoaga. Nakai fai ia tautolu ne manako ke to noa ha mena kai fakaagaga kua foaki mai.—1 Kori. 10:12; Filipi 2:12.
4. Fakakite fefe e tautolu e fakaaue ha tautolu ke he tau mena kai loga kua foaki mai e Iehova?
4 Kua fiafia ha a tautolu he loga e kupu moli fakaagaga kua foaki mai e Iehova, he fakatatai ke he tau fakaakoaga pikopiko ha Kerisitenitome! (Isaia 65:13, 14) Taha puhala kua maeke ia tautolu ke ‘fakakite e fakaaue ha tautolu’ he onoono ke he fonoaga ko e magaaho ka fakaako e Iehova. (Kolo. 3:15) Kia nakai onoono ni ke he matakainaga ne taute e lauga, ka e mailoga ko e fekau mai he “Faiaoga Homo Ue Atu.” (Isaia 30:20, 21, NW; Isa 54:13) Fanogonogo fakamakutu. Tohi fakakuku e tau manatu uho. Liu kikite e tau vala uho he fakaholoaga he tau afiafi takitaha. Fakagahua e tau mena hau ne ako.
5. Ko e heigoa e tau kakano fiafia kua foaki mai he tau fonoaga he fahimotu ki a tautolu?
5 He tau fonoaga takitaha he fahi nei ha Amaketo, pete e taute he kemu he tau tagata paea, he tau motu ne hane felakutaki, po ke he toloaga tokologa mo e milino lahi, ko e kautuaga ki luga ia Satani! Ha ko e fakamatakainaga kaufakalataha, kua tokiofa e tautolu e tau magaaho ke fakapotopoto auloa he tau fonoaga he fahimotu. (Eseki. 36:38) Kua mauokafua a tautolu to liu a Iehova ke foaki fakaalofa mai ma tautolu e ‘tau mena kai he magaaho tonu.’—Luka 12:42.
[Puha he lau 4]
Fakakite e Loto Fakaaue ma e Laulau ha Iehova
◼ Fanogonogo fakamakutu
◼ Tohi hifo e tau manatu uho
◼ Fakamanatu e tau mena uho he fakaholoaga he tau afiafi oti
◼ Fakagahua e tau mena hau ne ako