Fifitaki e Aga Manamanatu ha Iesu
1. Ko e heigoa e aga manamanatu ne fakakite e Iesu?
1 Pete kua nakai kitia mata e tautolu e Tama he Atua, ka e kua puhala mai he tau fakamauaga he moui mo e fekafekauaga ha Iesu, ati maeke moli ia tautolu ke moua e fakaalofa ki a ia. (1 Pete. 1:8) He omaoma ke he finagalo he Matua hana, ne toka e ia e tuaga tokoluga hana he lagi mo e hifo mai ke he lalolagi. He moui ko e tagata, ne foaki noa a ia ke fekafekau ke he falu mo e foaki e moui hana ke hukui aki e tau tagata oti. (Mata. 20:28) Kua fakamafana mai he Kupu he Atua ki a tautolu: ‘Kia toka foki ia mutolu e aga manamanatu ia ne toka ai ia Keriso Iesu.’ Puhala fe kua maeke ia tautolu ke fifitaki e aga foaki noa hana?—Filipi 2:5-8.
2. Ko e heigoa e paleko ne tokologa e tau Kerisiano ne fehagai ki ai, mo e ko e heigoa ka lagomatai a lautolu ke kautu mai ai?
2 Ka Lolelole: Pete ni e mitaki katoatoa a Iesu, ne lolelole agaia a ia. Taha e magaaho ne “nakai fahia a Iesu ke he hana fenoga,” ne foaki e ia e fakamatala mahino ke he fifine Samaria. (Ioane 4:6) Tokologa e tau Kerisiano he vaha nei kua fehagai foki mo e paleko pihia. He oti e fahi tapu he gahua, kua liga uka ke moua e malolo ke fakalataha ke he gahua fakamatala. Pete ia, ka taute tumau e tautolu, to moua e tautolu e fekafekauaga Kerisiano nukua fakahauhau a tautolu fakaagaga.—Ioane 4:32-34.
3. Puhala fe kua maeke ia tautolu ke fifitaki e fakamakai ha Iesu ke fakaako?
3 Ke he taha magaaho, ne o atu a Iesu mo e tau tutaki hana ke he taha mena ogoogo noa ke okioki ai. Pete ia, ne iloa he moto tagata tokologa ti tafepoi atu ki mua ke feleveia mo lautolu. He nakai hogohogo manava, ko Iesu ne “hohofi hana fakaalofa kia lautolu” ti kamata ai ke “fakaako a lautolu ke he tau mena loga.” (Mare. 6:30-34) Ko e kamata mo e taute he tau fakaakoaga Tohi Tapu kua lata ke moua e aga pihia. Kua lata ai mo e laliaga tumau mo e fakaalofa moli ma e tau tagata. Kaeke nakai fai fakaako Tohi Tapu a koe mogonei, kia nakai fiu he lali ke moua taha.
4. Maeke fefe e paionia fakaku ke lagomatai a tautolu ke fifitaki e aga manamanatu he Keriso?
4 Tuku Fakamua e Tau Mena Fakaagaga: Ko e paionia fakaku ka maeke ke lagomatai a tautolu ke hagaaki fakalahi ke he tau gahua fakaagaga. Taha e matakainaga fifine fuata tote ne tohi: “Ko e matua fifine he taha he tau kapitiga haku ne fakamalolo a maua tokoua ke paionia fakaku mo ia he taha e mahina. Kua fakaaue au he o a maua mo ia. Ne fiafia au he maeke ke iloa e tau matakainaga tane mo e fifine, ti nakai leva kua tuga e magafaoa a lautolu ki a au. Kua fiafia foki au ha kua lahi e magaaho ke tutala mo e falu hagaao ki a Iehova mo e fakaako a lautolu ke he tau kupu moli homo ue atu he Kautu. Ko e tau mena oti nei kua taute ai au ke logona hifo e tata lahi ki a Iehova mo e hana fakatokatokaaga.”—Sala. 34:8.
5. Ko e ha kua latatonu ia tautolu ke matutaki ke lali ke fifitaki e aga manamanatu ha Iesu?
5 Kua fehagai a tautolu oti ke he taufetului he tino nakai mitaki katoatoa ha tautolu mo e manako ha tautolu ke fakafiafia a Iehova. (Roma 7:21-23) Kua latatonu ia tautolu ke totoko e aga nakai fakamakamaka he lalolagi. (Mata. 16:22, 23) Maeke ia Iehova ke lagomatai a tautolu ke kautu ke he mena nei ha ko e hana agaga tapu. (Kala. 5:16, 17) He fakatali a tautolu ke he laveakiaga ke he lalolagi fou tututonu he Atua, kia fifitaki e tautolu e aga manamanatu ha Iesu he tuku fakamua e tau manako he Kautu mo e tau manako he falu ke he ha tautolu.—Mata. 6:33; Roma 15:1-3.