Setulu he Magafaoa—Ko e Kupu he Aho
1 Kua taute he tau matua fakaalofa he tau aho takitaha e gahua lahi ke fagai e magafaoa aki e tau mena kai mitaki. Ka e kua mua atu e aoga he fagai a lautolu aki e tau mena mitaki fakaagaga mai he Kupu he Atua. (Mata. 4:4) Taha puhala kua maeke ia koe ke lagomatai e fanau hau ke feaki e manako fakaagaga mitaki mo e ‘tutupu ke he fakamouiaga’ he toka taha magaaho he tau aho takitaha ke fakatutala ko e magafaoa ke he kupu he aho. (1 Pete. 2:2) To liga lafi e koe a fe e mena nei ke he setulu he magafaoa hau?
2 He Tau Magaaho Kai: He kamata e aho hau mo e fakatutala ke he kupu he aho ka lagomatai e magafaoa hau ke manatu tumau a Iehova ke he aho katoa. (Sala. 16:8) Taha e matua fifine ne fifili ke totou mo e tutala ke he kupu he aho mo e tama tane hana he kai e tama he kai pogipogi mo e ke liogi mo ia ato fano he aoga. Ne fakamalolo he mena nei a ia ke nakai fakahui ka fehagai mo e tau mena fakamotu, ke totoko e tau mahani kelea, mo e ke fakamatala ke he tau tama aoga mo e tau faiaoga. Pete ko ia ni tokotaha e Fakamoli he aoga, ne nakai logona e ia e matimati.
3 Ka nakai hagahaga mitaki ke fakatutala e kupu he aho he mogo pogipogi, liga manatu a koe ke fakatutala auloa mo e magafaoa he taha magahala he aho, liga he kaiaga he magaaho afiafi. Ne tutala falu he magaaho nei ke he tau mena tutupu he gahua he fonua mo e tau manatu ne fiafia a lautolu ki ai he totouaga Tohi Tapu fakatagata ha lautolu. Tokologa ne manatu e tau magaaho kai afiafi pihia ko e tau magaaho fiafia lahi he magafaoa.
4 He Po: Ma e falu magafaoa, ko e magaaho mitaki ke taute e kupu he aho ka tauteute ke o ke momohe. Ko e magaaho mitaki foki anei ke liogi auloa. He logona he fanau hau a koe ne tutala hagaao ki a Iehova mo e liogi ki a ia he tau aho oti, to moli a Ia ke he fanau.
5 Kia fakamonuina e Iehova e tau laliaga hau ke tuku e kupu moli ke he fanau hau he fakaaoga fakamitaki e koe e Kumikumi e Tau Tohiaga Tapu he Tau Aho Takitaha.