Kia Tumau a Mutolu ke Fefakamafanaaki
1 Ne taute he aposetolo ko Paulo e tau mena oti kua fahia a ia ki ai ke fakamalolo e tau matakainaga talitonu. (Gahua 14:19-22) Pihia foki, kua lata ia tautolu ke manamanatu ke he tau matakainaga ha tautolu ka fehagai a lautolu mo e tau tutuaga uka, ti manako a tautolu ke lagomatai a lautolu. Kua fakakite mai he Tohi Tapu kua lata e tau tagata oti, nakai ko e tau motua hokoia, ke fakakite e fiafia ke he falu. (Roma 15:1, 2) Manamanatu ke he ua e puhala ke maeke ia tautolu ke talia e fakatonuaga fakaalofa: “Kia fetomaaki a mutolu, mo e fefakamafanaki a mutolu.”—1 Tesa. 5:11.
2 Mailoga e Tau Manako he Falu: Ne talahau he Kupu he Atua ko Toreta “kua loga hana tau gahua mitaki mo e tau mena fakaalofa.” (Gahua 9:36, 39) Ne mailoga e ia a lautolu ne manako lagomatai ti taute e mena kua fahia a ia ke lagomatai a lautolu. Kua mitaki ha e fakafifitakiaga ne fakatoka e ia ma tautolu! Liga iloa e koe a ia ne motua ne manako puhala ke he feleveiaaga. Po ke liga ko e paionia kua nakai fai tagata ke fakatau gahua he fekafekauaga he pale la he vaha tapu. Ka mailoga e koe kua manako lagomatai pihia mo e foaki e lagomatai, manamanatu la ke he fakamaloloaga ka logona e ia!
3 Tau Fakatutalaaga Fakaagaga: Maeke foki ia tautolu ke atihake falu he tau puhala tutala ha tautolu. (Efeso 4:29) Ne talahau he motua ne lahi e iloaaga: “Ka manako a koe ke fakamalolo atu, tutala ke he tau mena fakaagaga. Ke kamata e fakatutalaaga atihake, liga fakaaoga e koe e huhu mukamuka tuga e, ‘Moua fefe e koe e kupu moli?’” Fakakite e fiafia moli ke he tau fuata ikiiki he fakapotopotoaga. Fiafia ki a lautolu ne loto lolelole mo lautolu ne liga ma. (Fakatai 12:25) Kia nakai fakaata e tutala ke he tau fakafiafiaaga he lalolagi ke maluia e fakatutalaaga fakaagaga mitaki mo e tau matakainaga talitonu ha tautolu.—Roma 1:11, 12.
4 Ka e, ko e heigoa hau ka talahau ke atihake falu? He hau a totou fakatagata ke he Tohi Tapu mo e fakaako, kua moua fou nakai e koe taha matapatu fakaakoaga ne fakahokulo atu e loto fakaaue hau ki a Iehova? Kua omoomoi nakai a koe he taha mena ne logona e koe he lauga ke he tau tagata oti po ke he Fakaakoaga Kolo Toko? Po kua amohia nakai e loto hau he taha mena tupu ne fakamalolo e tua? Kaeke tokiofa e koe e tau mena fakaagaga uho pihia, to fai mena fakamalolo tumau a koe ke tutala mo e falu.—Fakatai 2:1; Luka 6:45.
5 He foaki e lagomatai fakatino mo e fakaaoga fakapulotu e alelo ha tautolu, kia tumau a tautolu ke fefakamafanaaki.—Fakatai 12:18.