Fefakamafanaaki he Gahua he Fonua
1 Loto fakaaue oti a tautolu he moua e fakamalolōaga ke he “tau kupu kua vagahau mo e lata ai.” (Fakatai 25:11) He magaaho ka gahua a tautolu mo e falu he fonua, iloa mooli fēfē e tautolu kua fakamalolō e tautolu e falu?
2 Fakatutalaaga Atihake: Ko e atihake ha ia ke putoia e tau mena fakaagaaga he fakatutalaaga ha tautolu he taute e gahua fakamatala! (Sala. 37:30) Maeke a tautolu ke tutala hagaao ke he fakataitaiaga po ke talahau e tau iloaaga atihake he gahua ke he fonua ne olioli laia e tautolu. (Gahua 15:3) Moua nakai e tautolu e manatu fiafia mai he totou fakatagata he Tohi Tapu, tau mekasini foou, po ke feleveiaaga he fakapotopotoaga? Liga fakatutala a tautolu ke he tau manatu ne talahau he lauga ke he toloaga ne logona foou e tautolu he Fale he Kautu.
3 Liga lolelole e logonaaga ha tautolu ka totoko e tagata he kaina ti nakai maeke ia tautolu ke fahia ki ai. To aoga ha ia ma tautolu ka oti e tutala he gutuhala ti tutala mo e hoa ha tautolu ke he puhala kua lata ke taute aki e tuaga pihia he vahā i mua, liga he fakakia ke he tohi Reasoning. Ti ka loto fakaaue a tautolu ke he taha mena hagaao ke he fakataitaiaga he hoa ha tautolu, maeke ia tautolu ke foaki e fakamalolōaga mooli.
4 Kia Fakalotomatala: Fai nakai he matakau fakaako tohi ha tautolu ne nakai la gahua mo tautolu foou nei? He uiina a ia ke gahua he fonua mo tautolu ka liga fua mai e “fefakamafanaaki.” (Roma 1:12) Kua loto fakaaue e tau paionia tumau mo e fakakū ke he falu ne gahua mo lautolu, mua atu he tau magaaho pogipogi kī po ke he magaaho afiafi lahi, ne fa gahoa lahi e tau tagata fakailoa ne fakalataha ke he fekafekauaga. Lalago e tautolu e tau paionia he ō mo lautolu he fonua. Fai tagata fakailoa nakai ne fakakaupā he malolō tino e mena haana kua maeke ke taute he fekafekauaga? He fakatoka mo lautolu ia ke ō mo tautolu, liga ke he fakaakoaga Tohi Tapu, kua liga lagomatai lahi.—Fakatai 27:17.
5 Ko e navaaga mo e tau talahauaga he loto fakaaue kua atihake tumau, pihia ke he tau mena ikiiki. Kua lata ia tautolu ke tokaloto e mena ia ka gahua mo e falu he fonua, ha kua manako a tautolu “kia . . . fefakamafanaaki a [ta]utolu.”—1 Tesa. 5:11.