Mahomo Atu he Nakai ko e Hoa Fakanono Hokoia
1. Maeke fēfē a tautolu ke fifitaki e puhala he aposetolo ko Paulo ka gahua mo e falu he fonua?
1 Ne onoono e aposetolo ko Paulo ke he magaaho haana ne fakamole mo e haana a tau matakainaga ko e mogo ke “fefakamafanaaki.” (Roma 1:12) Ka gahua a koe mo e taha tagata fakailoa he fonua, fakaaoga nakai e koe e magaaho ia ke fakamafana mo e lagomatai a ia? He nakai ko e hoa fakanono hokoia, he ha he talahau e mena ne lagomatai a koe ke eke mo tagata fakamatala lauia mitaki?
2. Ko e heigoa ha tautolu ka taute ke atihake e mauokafua he hoa fakamatala ha tautolu, ti ko e ha ne aoga ai?
2 Fakamalolō Atu e Mauokafua: Falu tagata fakailoa ne nakai mauokafua, liga fakakite he foliga he mata po ke leo ha lautolu. Maeke a tautolu ke atihake e mauokafua ha lautolu he nava mooli ki a lautolu. Ko e heigoa falu puhala ke fakamalolō e mauokafua? Taha e leveki faifano ne tala age fakamahino ke he hoa haana hagaao ke he tau mena ne matakutaku a ia ki ai mo e liogi tumau a ia ma e lagomatai ke utakehe e tau logonaaga pihia. Taha foki e matakainaga ne talahau e puhala ne lagomatai a ia ke fakakite e mauokafua: “Ne kamata aki e mamali. Falu magaaho ne lata au ke liogi ke moua e lagomatai ke taute e mena mukamuka ia.” Fai mena nakai ne lagomatai a koe ke mauokafua he gahua he fonua? Tala age ke he hoa haau ne gahua tokoua he fonua.
3. Ko e heigoa ha tautolu ka tutala mo e hoa ke lagomatai a ia ke lauia mitaki atu he gahua he fonua?
3 Kia Felagomataiaki: Kua moua nakai e koe e taha talahauaga po ke hūhū mukamuka, ke hafagi fakamitaki aki e fakatutalaaga ke he taha mena tupu he matakavi? Kua logona nakai e koe e tau fua mitaki ha kua lalafi e koe e tau puhala fakatagata ke he tau fakatātāaga fakataitai? Tala age ke he hoa haau. (Fakatai 27:17) He liliu aahi atu, maeke ia koe ke talahau e kakano he aahi atu mo e puhala kua fakatoka e koe ke taute aki. Ka oti e fakaako, liga fakamaama e koe e kakano ne fifili e koe e taha matakupu pauaki, kupu Tohi Tapu, po ke puhala fakaako ke tali aki e manako he tagata fakaako.
4. Ko e ha kua lata ia tautolu ke fiafia ke lagomatai e tau matakainaga fakamatala?
4 Ko e tau tagata fakamatala he senetenari fakamua ne nakai fiafia hokoia ni ke lagomatai a lautolu ne nakai talitonu. Ne kitia foki e lautolu e aoga he fakamafana mo e fakamalolō e falu. (Gahua 11:23; 15:32) Ne fakaako he aposetolo ko Paulo e fuata ko Timoteo ti fakamafana a ia ke talahau atu foki e tau mena kua iloa e ia ke he falu. (2 Timo. 2:2) Ka nakai nimo ia tautolu ke mahani mitaki atu ke he tau matakainaga Kerisiano ka haia he fonua, kua nakai ni fakalahi e tautolu e fiafia mo e lauia mitaki ha lautolu ka kua fakafiafia foki e tautolu e ha tautolu a Matua he lagi.—Hepe. 13:15, 16.