Ko e Lagomatai kua Mautali ke Moua
1. Maeke fēfē e tuaga fakaagaaga he taha ke lolelole?
1 Ko Anna, ko e matakainaga fifine ne nakai talitonu e taane, kua lahi mahaki e gahua ti taufetului ke fakatumau ke he tau feleveiaaga Kerisiano, ke fano ke he fonua, mo e fakaako e Kupu he Atua. Pete he fakaalofa agaia ki a Iehova, ne nofo tua a ia. Fiafia ai, kua lagomatai he tau motua loto manamanatu a ia.
2. Ko e heigoa e puhala kua maeke he tau Kerisiano oti ke eke mo lagomatai ne mautali ke moua?
2 He talia e lagomatai fakaagaaga ne foaki puhala he fakapotopotoaga Kerisiano ka fakatātā e falanaki ki a Iehova. He fifitaki e leveki fakaalofa ha Iesu Keriso, ne lali e tau patu he fakapotopotoaga ke fakamalolō mo e lagomatai mooli a lautolu hane fakafitā ke he tau mena vihi fakaagaaga. (1 Tesa. 5:14) Fa mahani, kua lata mo e kupu totonu ne fakavē ke he tau Tohiaga Tapu ke fakamalolō. Ke fakaloa atu ke lagomatai a lautolu he tuaga lolelole ko e tupetupe he tau Kerisiano oti, nakai ni he tau motua. Mooli kua mailoga e tautolu takitokotaha e malolō he “tau kupu [atihake] kua vagahau mo e lata ai.”—Fakatai 25:11; Isaia 35:3, 4.
3, 4. Ko e heigoa ne putoia he lagomatai e falu, mo e puhala fe ka taute ai e tautolu?
3 Kia Fakaaoga e Manamanatuaga: He fakakite e fakaalofa fiafia ki a lautolu ne manako lagomatai kua lata ke fakaaoga e manamanatuaga, fakakite e fakaalofa, ti fakamooli. He magaaho ne iloa e Ionatana e fakaagitau ha Tavita, ne ‘matike a ia mo e finatu kia Tavita ke he vao motua, kua fakamalolo e ia a ia.’ (1 Samu. 23:15, 16) Kia fakaaoga e puhala totonu he lali ke lagomatai falu. Ko e tau kupu ne omoi he fakaalofa mooli kua fakatupu e tau fua mitaki lahi mahaki. Taha mena foki, ne fakakite fakamahino e Iesu kua lata ma e laliaga makutu, malolō ke liuaki mai e matakainaga fakaagaaga. (Luka 15:4) Ko e manako mooli ke lagomatai taha tagata ka taute a tautolu ke fakauka he foaki e lagomatai pete kua nakai kitia vave e lauiaaga.
4 Ko e fakamalolō mooli ka fakaaoga e tautolu e manamanatuaga ke uiina falu, tuga a lautolu he fakaakoaga tohi, ke fakatauo mo tautolu ke he fekafekauaga! He lagomatai e tautolu e taha fekafekau ha Iehova ke fakalataha ke he fekafekauaga, liga lata ia tautolu ke fakaaoga e magaaho ia ke fakamalolō e lima haana. Kua mafanatia lahi e tau magaaho olioli pihia ne fakalataha auloa ke he fekafekauaga ha Iehova ki a lautolu ne fa e malolō fakaagaaga.
5. He falu tutuaga, ko e heigoa e lagomatai ka foaki he tau motua?
5 Ko e Foakiaga Fakaalofa: Ko lautolu ne fai magaaho ne nakai fakalataha ke he gahua fakamatala po ke o ke he fakapotopotoaga kua latatonu ke moua e lagomatai lafi ki luga ke ati e tua ha lautolu. Ti liga lata ni ke fakaako fakatagata e Tohi Tapu ke he tohi tuga e Tapuaki ke he Atua Moli Tokotaha, Fakatata Atu ki a Iehova, po ke Ko e Heigoa ne Fakaako Moli he Tohi Tapu? Ha kua fitā e tagata he papatiso, fa mahani ke nakai lata ke loa e magaaho ka fakaako ai. Kua lata he Komiti Fekafekau he Fakapotopotoaga ke mataala ke he tagata ka liga aoga mai he foakiaga nei.—Kikite e tau Puha Hūhū he Ha Tautolu a Fekafekauaga he Kautu ia Novema 1998 mo e Novema 2000.
6. Puhala fe ne liu malolō fakaagaaga e taha matakainaga fifine?
6 Ko Anna, ne totoku fakamua, ne talia fiafia e lagomatai he tau motua ke taute he taha matakainaga fifine motua fakaagaaga e fakaakoaga Tohi Tapu mo ia. Ne laga fa ni e fakaakoaga ati lagomatai a ia ke liu fakatata atu ki a Iehova. Ne liu a ia finatu ke he tau feleveiaaga he fakapotopotoaga mo e liu ati e manako ke fakaheke a Iehova ko e Atua ke he tau tagata. Ne lagomatai foki he matakainaga motua fakaagaaga a ia ke he fekafekauaga he uta a ia ke he tau fakaakoaga Tohi Tapu haana ato malolō lahi a ia ke fakamatala ke he taha fale mo e taha fale. Ko e lima lagomatai ni kua lata ke liu a ia ke hakahakau fakaagaaga!
7. Ko e heigoa e tau aoga mai he fakamalolō fakaagaaga e falu?
7 He fakamalolō a lautolu ne lolelole ka tamai e tau monuina ki a tautolu oti. Ti olioli e ia ne moua e lagomatai e fiafia he fakatata atu ki a Iehova mo e fakalataha ke he tau matagahua he fakatokatokaaga Haana. Ti fiafia e tau motua he kitia e atihakeaga fakaagaaga pihia. (Luka 15:5, 6) Kua fetataaki mo e kaufakalataha e fakapotopotoaga he manamanatu fakaalofa e tau tagata oti ke he taha mo e taha. (Kolo. 3:12-14) Kua moua e tautolu e tau kakano mitaki ke fifitaki a Iehova, ko e lagomatai ne mautali ke moua!—Efeso 5:1.