Tutala Hagaao ke he “Maama he Lalolagi”
1. Ko e heigoa e maama lahi ne talahau tuai he Kupu he Atua, ti ko e heigoa e magaaho ne taute e fakamatalaaga uho ke he maama nei?
1 Puhala he perofeta ko Isaia, ne talahau tuai e Iehova: “Ko e motu ne o ke he pouli kua kitia e lautolu e maama lahi; ko lautolu ne nonofo ke he motu he ata he mate, kua kikila mai kia lautolu e maama.” (Isaia 9:2) Ko e “maama lahi” ia kua kitia ke he tau gahua he Tama ni he Atua, ko Iesu Keriso. Ko e tau gahua haana he nofo agaia he lalolagi mo e tau monuina ne fua mai he poa haana kua atihake a lautolu he pouligia fakaagaaga. Kua latatonu e maama pihia mo e tau tagata he tau vahā pouligia nei. Kua foaki he Kaiaga Afiafi he Iki e magaaho uho ma tautolu ke fakamatala atu hagaao ke he “maama he lalolagi.” (Ioane 8:12) He tau kua mole, ne fakakite he totou miliona e tua he fakalataha mo tautolu he omaoma ke he poaki ha Iesu: “Kia eke e mutolu e mena nai mo fakamanatuaga kia au.” (Luka 22:19) Ha kua tata mai e Fakamanatuaga he tau nei, maeke fēfē ia tautolu ke putoia ke he fakamatalaaga hagaao ke he maama lahi ne fakakikila mai e Iehova?—Filipi 2:15.
2. Maeke fēfē ia tautolu ke fakatolomaki e loto fakaaue hokulo ha tautolu ma e poa lukutoto, ti ko e heigoa e lauiaaga he taute pihia?
2 Atihake e Loto Fakaaue: Ko e vahā he Fakamanatuaga ko e magaaho mitaki lahi ke manamanatu fakahokulo ke he fakaalofa mua ue atu ne fakakite e Iehova mo Iesu he foaki mai e poa lukutoto ma e tau tagata. (Ioane 3:16; 2 Kori. 5:14, 15) He taute pihia ka fakatolomaki mooli e loto fakaaue ha tautolu ma e magaaho tapu nei. Ko e tau tagata oti kana he Atua to manako ke tuku kehe taha magaaho ke totou mo e manamanatu fakahokulo ke he totouaga pauaki he Tohi Tapu he Fakamanatuaga, ne fakakite mai he Kumikumi e Tau Tohiaga Tapu he Tau Aho Takitaha. He manamanatu ke he tau mahani mua ue atu ha Iehova, ne kitia maali ke he lukutoto ne foaki e ia, kua taute a tautolu ke fiafia ke eke a ia mo Atua ha tautolu. He manamanatu atu ke he kakano he lukutoto ma tautolu takitokotaha kua fakatolomaki e fakaalofa hokulo ha tautolu ma e Atua mo e Tama haana mo e omoi a tautolu ke eketaha he taute e finagalo he Atua.—Kala. 2:20.
3. Maeke fēfē ia tautolu ke fakatātā e loto fakaaue ha tautolu ma e Fakamanatuaga?
3 Kaeke kua fakahokulo e loto fakaaue ha tautolu ma e foakiaga a Iehova he fakamouiaga, to kikila atu e fakamakutu ha tautolu ma e Fakamanatuaga ke he tau tagata fakaako Tohi Tapu, tau liu aahi atu, tau magafaoa, tau tuuta kaina, tau kapitiga aoga, tau kapitiga gahua, mo e falu ka uiina e tautolu ke he magaaho uho nei. (Luka 6:45) Ko e mena ia, kia taute e laliaga pauaki ke uiina a lautolu pihia, he foaki age taha uiina kua lomi he Fakamanatuaga ke nakai nimo e lautolu. Ti ke nakai pokia ha tagata, kua tokologa ne mailoga kua aoga lahi ke fakamau hifo e tau tagata ne uiina tumau e lautolu ke he Fakamanatuaga, ti lafi ki ai e kau foou he tau tau takitaha. He fakatokatoka fakamitaki mo e fakamakai ke uiina a lautolu ne fiafia ko e puhala homo lahi ke fakakite e oue tulou ha tautolu ki a Iehova ko e Atua ke he ‘mena foaki noa hana nakai maeke ke fakamatala.’—2 Kori. 9:15.
4. Ko e heigoa ka lagomatai a tautolu ke fakamalikiti e fakalataha ha tautolu ke he fekafekauaga ia Mati mo Aperila?
4 Fakamalikiti e Gahua he Fekafekauaga: Maeke nakai ia koe ke fakamalikiti e fakalataha haau ke he fekafekauaga ia Mati mo Aperila? He lali ke talahau ke he falu e “vagahau mitaki he lilifu a Keriso” ka tamai mooli e monuina he Atua. Ne poaki e Iehova, ko e Punaaga he tau maama fakaagaaga oti: “Kia kikila mai e maama he pouli.” (2 Kori. 4:4-6) Ka lata ai, to taute he tau motua e tau feleveiaaga ma e gahua he fonua he tau magaaho lafi ki luga mo e he tau matakavi. Liga putoia ki ai ke gahua he puhalatu he mogo pogipogi po ke tau fakaholoaga ke taute e fonua pisinisi mo e fakamatala he telefoni he pale laā po ke afiafi. Ko e lagomatai ke fakamalikiti e fakalataha haau ke he fekafekauaga, fakatoka e tau matahola ke foli ki ai, mo e gahua fakalahi ke moua ai. Ma e tokologa, he foaki katoatoa ki a Iehova kua putoia ai e kotofaaga ke paionia fakakū.—Kolo. 3:23, 24.
5. Puhala fe ne aoga e tokologa mai he tuku hifo e tula kua lata ma e paionia fakakū?
5 Maeke Nakai a Koe ke Paionia Fakakū? Kua molea e fitu tau tali mai he tuku hifo e tula kua lata ma e paionia fakakū. Ko e hikiaga nei ati maeke he tokologa atu foki ke kitia e tau monuina he gahua paionia fakakū. Kua fakatai nakai e koe? Kua taute tumau he falu mo mena taute mau ha lautolu ke he tau tau takitaha. He falu fakapotopotoaga kua tokologa e tagata fakailoa ne taute fakamatakau e fekafekauaga nei, ti eke ai mo matagahua ne olioli he fakapotopotoaga he magahala he tau. Maeke nakai a koe ke fakaatā taha magaaho ke olioli e paionia fakakū he vahā Fakamanatuaga? Liga mitaki lahi e mahina a Aperila ma e falu, he lima e matahiku faahi tapu.
6. Ko e heigoa e tau foakiaga fiafia ne kua fakaatā mai?
6 Kua setulu kia e fakapotopotoaga haau ma e ahiahi he leveki takaiaga ia Mati po ko Aperila? To liga hafagi ki a koe e monuina lafi ki luga. Tuga kua fitā he fakailoa, he tau he fekafekauaga 2006, kua uiina a lautolu oti ne paionia fakakū he mahina ne ahiahi he leveki he takaiaga ke nonofo he vala fakamua he feleveiaaga ma e tau paionia he faahi tapu ia. Nakai fakauaua to fakamalolō fakaagaaga he tau fakaakoaga he feleveiaaga nei e tau paionia fakakū tokologa ke lali fakalahi ke eke mo tau paionia tumau. Lafi ki ai, to moua e tautolu e fiafia ia Mati he lagomatai e tau tagata ke o mai ke he maama fakaagaaga kakano he tohi fakaako foou Ko e Heigoa ne Fakaako Moli he Tohi Tapu? Fēfē he eke mo foliaga haau ke kamata e fakaakoaga Tohi Tapu ke he tohi foou?
7, 8. (a) Ko e heigoa ka lagomatai a tautolu ke taute e setulu ke paionia fakakū? (e) Maeke fēfē he kauauloa he magafaoa ke lagomatai, mo e puhala fe ne aoga ai e magafaoa katoa?
7 He manamanatu a koe ke he 50 e tula kua lata ma e paionia fakakū, fifili e setulu ka fakaatā a koe ke fakakikila e maama he kupu mooli ke kavi 12 e matahola he tau faahi tapu takitaha. Tutala ki a lautolu ne kautū ki ai, pihia foki ke he falu. Liga to fakamalolō he mena nei a lautolu ke paionia mo koe. He pulega fakamitaki, ne mailoga he tau tagata fakailoa kua papatiso, ne fuata mo e momotua, kua nakai uka lahi ke hokotia ke he foliaga aoga nei. Liogi hagaao ki ai. Ti, ka maeke, taute e tau pulega haau, mo e olioli e paionia fakakū!—Mala. 3:10.
8 Ne mailoga he tau magafaoa tokologa kua maeke he tau laliaga kauauloa ke taute e taha mai he magafaoa ke hokotia ke he foliaga nei. Ne fifili he taha magafaoa ko e tokolima ne papatiso ka hūhū ke eke mo tau paionia fakakū. Ko e kau tokoua ne toe ne nakaila papatiso, ne lali fakalahi ke fakamalikiti e gahua ha laua. Aoga fēfē e magafaoa mai he taute e tau laliaga lafi ki luga? Ne tohia e lautolu: “Ko e mahina fiafia lahi, ti logona lahi e mautolu e malolō he pipiaga he magafaoa. Ne fakaaue a mautolu ki a Iehova ma e tau monuina homo ue atu!”
9. Maeke fēfē ia tautolu ke toka e maama ke kikila ke he vahā Fakamanatuaga nei?
9 To eke nakai e matagahua pauaki ha tautolu ia Mati mo Aperila ke fakalagalaga, he fakatata fakalahi a tautolu ke he ha tautolu a Matua he lagi? To falanaki lahi ke he laliaga fakatagata ha tautolu ke fakatolomaki e fakaalofa ma e Atua mo e Tama haana mo e fakamalikiti e fakalataha ha tautolu ke he fekafekauaga. Kia eke e fifiliaga ha tautolu ke tuga he salamo, ne lologo: “To fakaaue fakalahi au kia Iehova ke he haku a gutu, to fakaheke atu e au kia ia ki mua he tokologa.” (Sala. 109:30) To fakamonuina e Iehova e matagahua fakamakutu ha tautolu he vahā Fakamanatuaga nei. Ti kia toka e tautolu e maama lahi ke kikila ke maeke he tokologa atu foki ke o mai ki fafo he pouligia ke ‘moua e maama he moui.’—Ioane 8:12.