Tau Mena ne Moua he Fekafekauaga ha Tautolu
1. Fefe e kitekiteaga ha Iehova ke he fekafekauaga ha tautolu, mo e ko e heigoa e tali he tau tagata?
1 Kua fakamaama he Kupu he Atua kua kautu e tau Kerisiano he foleni ke he fekafekauaga ha Iehova, ke tuga he foleni ha kua kautu. (2 Kori. 2:14-16) He fakailoa e tautolu e iloilo he Atua, ko e tau poa ha tautolu he fekafekauaga kua tuga e tau mena manogi ki a Iehova. Ko e falu tagata kua futia ke he humelie he tala mitaki; falu kua fakaheu ai. Ka e ko e tali fakakelea he laulahi kua nakai kakano kua nakai kautu e gahua ha tautolu. Kikite la ke he tau mena ne moua he fekafekauaga ha tautolu.
2. Ko e heigoa ne omoomoi he fekafekauaga ha tautolu a tautolu ke fakatata?
2 Fakatokoluga a Iehova: Ne paleko e Satani mena fekafekau ni e tau tagata ki a Iehova ha ko e tau kakano lotokai. (Iopu 1:9-11) Kua ta mai he fekafekauaga faka-Kerisiano ki a tautolu taha puhala ke fakatata kua moli e fakamoli katoatoa ha tautolu ke he Atua. Tokologa e tagata fakailoa kua matutaki ke omaoma ke he poaki ke fakamatala mo e taute tutaki pete he uka e tau tutuaga fakatagata po ke fekehekeheaki he tau tagata. Ko e fakauka fakamoli pihia kua fakafiafia e loto a Iehova!—Fakatai 27:11.
3. Ko e ha ne aoga lahi ai ma tautolu ke matutaki ke fakailoa e higoa mo e finagalo he Atua?
3 Lafi ki ai, kua fai vala e fekafekauaga ha tautolu he fakakatoatoaaga he finagalo he Atua. He matutaki atu ke he moumouaga he lalolagi ha Satani hane hau, pehe a Iehova: “To iloa foki he tau motu kehe ko au ni ko Iehova.” (Eseki. 39:7) Ma e tau motu ke iloa e mena nei, kua aoga lahi ke matutaki e tau fekafekau he Atua ke fakapuloa hana higoa mo e finagalo ke he “tau motu kehe oti, mo e tau magafaoa, mo e tau vagahau kehekehe, mo e tau motu.”—Fakakite. 14:6, 7.
4. Puhala fe he gahua fakamatala kua eke mo matapatu he fakafiliaga?
4 Matapatu he Fakafiliaga: Ko e fakamatala he tala mitaki kua eke foki mo matapatu he fakafiliaga. Ne talahau he aposetolo ko Paulo to taui e Keriso Iesu ki a “lautolu kua nakai iloa e Atua, mo lautolu kua nakai omaoma ke he vagahau mitaki he Iki ha tautolu ko Iesu Keriso.” (2 Tesa. 1:8, 9) To fakafili e tau tagata ke he puhala ne tali atu a lautolu ke he tala mitaki. Kua hokulo ha e matagahua ia kua fakalago ke he tau fekafekau he Atua! Ke kalo mai he fakamaligi toto, kia nakai mataofi a tautolu he fakapuloa e fekau fakahao moui he Kautu.—Gahua 20:26, 27.
5. Fakaata fefe e fakaalofa hofihofi noa he Atua he fekafekauaga ha tautolu?
5 Ko e lali tumau ha tautolu ke lagomatai e tau katofia ha tautolu ke moua e taliaaga he Atua ko e fakakiteaga he fakaalofa noa ha Iehova. (1 Timo. 2:3, 4) He iloa kua hane hikihiki tumau e tau momoui he tau tagata, kia o tumau a tautolu ki a lautolu mo e omoi a lautolu ke kumi a Iehova he fai magaaho agaia. He taute pihia, kua fakaata e tautolu e “fakaalofa hofihofi noa he Atua,” ne “nakai finagalo a ia ke malaia taha, ka kia hohoko oti kana ke he tokihala.”—Luka 1:78; 2 Pete. 3:9.
6. Aoga fefe ki a tautolu e gahua tumau ke he fekafekauaga ha Iehova?
6 Aoga ki a Tautolu: He gahua tumau ke he fekafekauaga ha Iehova ko e puipuiaga ma tautolu. Kua lagomatai ki a tautolu ke “fakatalitali mo e foli atu kia hoko mai e aho he Atua” mo e ke kalo mai neke ilaila he fakatokaaga kelea he lalolagi nei. (2 Pete. 3:11-14; Tito 2:11, 12) Ko tautolu mogoia, ‘kia tumau mo e nakai fagahuatia, kia fakamakai nakai noa ke he gahua he Iki,’ he iloa e tautolu to nakai noa mo e fua ha tautolu a tau laliaga he fekafekauaga faka-Kerisiano ha tautolu.—1 Kori. 15:58.