Fakatumau e Aga Fakamafiti!
1 Ne iloa e Iesu kua ku lahi e magaaho hana he ha ha he lalolagi ke fakakatoatoa e gahua he Matua hana. (Ioane 9:4) Ti, ne taute e ia e fekafekauaga hana mo e aga fakamafiti, mo e fakamahani e ia hana tau tutaki ke taute pihia foki. (Luka 4:42-44; 8:1; 10:2-4) Ko e tau koloa fakatino e tau mena aoga ke uaaki ki a ia. (Mata. 8:20) Ti, ne maeke ia ia ke fakakatoatoa e gahua ha Iehova ne tuku age ki a ia.—Ioane 17:4.
2 Ku e Magaaho: Ko e magaaho ke fakamatala e tala mitaki “ke he lalolagi oti” kua ku lahi foki. (Mata. 24:14) Kua fakakite he perofetaaga he Tohi Tapu kua nonofo muatua a tautolu he vaha he fakaotiaga. Nakai leva ko “lautolu kua nakai iloa e Atua, mo lautolu kua nakai omaoma ke he vagahau mitaki he Iki ha tautolu ko Iesu Keriso . . . ke fakahala ke he mahaikava tukulagi.” (2 Tesa. 1:6-9) Ko e fakafiliaga ia to hau fakalutukia lahi. (Luka 21:34, 35; 1 Tesa. 5:2, 3) Kua lata e tau tagata ke mataala ke he ha lautolu a tuaga hagahagakelea. Ko e matagahua ha tautolu ke lagomatai a lautolu ke kumi e taliaaga ha Iehova he fai magaaho agaia.—Sefa. 2:2, 3.
3 Taute e Tau Mena Oti kua Maeke ia Tautolu: He mailoga “kua gahoa e tau aho,” kua tuku mua he tau fekafekau he Atua e gahua fakamatala. (1 Kori. 7:29-31; Mata. 6:33) Kua toka he falu e tau tuaga fakatupe po ke falu tutuliaga fakatagata ke maeke ke fakalahi e gahua ke he fekafekauaga. (Mare. 10:29, 30) Kua matutaki e falu ke “fakamakai nakai noa ke he gahua he Iki” pete ne tau kamatamata. (1 Kori. 15:58) Tokologa ne fakapuloa e tala mitaki ke he tau hogofulu tau mo e mauokafua. (Hepe. 10:23) Kua uho lahi e tau poa pihia ki a Iehova he lalago e tau mena he Kautu.—Hepe. 6:10.
4 He matapatu e tau momoui ha tautolu ke tapuaki ki a Iehova, nukua putoia e gahua fakamatala, kua lagomatai a tautolu ke tokaloto e aho a Iehova. Kua puipui a tautolu mai he fakatauhele he lalolagi ha Satani mo e fakamalolo e fifiliaga ha tautolu ke fakatumau e mahani kua tapu. (2 Pete. 3:11-14) Moli, ko e taute e fekafekauaga ha tautolu mo e aga fakamafiti kua eke mo fakamouiaga, ki a tautolu ni mo lautolu kua fanogonogo ki a tautolu.—1 Timo. 4:16.