Fakalaulahi e Fakamatalaaga ha kua Tata Tuai e Fakaotiaga
1 Ko e vaha helehele ko e magaaho olioli. Ko e magaaho foki a ia ke gahua malolo ai. Na kaupa ni e magaaho ke helehele ai e tau fua. Kua nakai fakateaga e tau tagata ke he gahua ha lautolu.
2 Vagahau fakatai ai, ne fakatatai e Iesu e ‘fakaotiaga he lalolagi’ ke he vaha helehele. (Mata. 13:39) Kua nonofo a tautolu he fakaotiaga he lalolagi, mo e tote lahi mahaki e magaaho ne toe ke fakamatala “ke he lalolagi oti.” (Mata. 24:14) He tata lahi mahaki mai e fakaotiaga, kua lata ia tautolu ke fakalaulahi ha tautolu a taute ke he fekafekauaga. Ko e ha? Ne fakamaama e Iesu: “Kua loga e tau saito ke helehele, ka ko e tau tagata gahua, kua tokogaogao a lautolu.”—Mata. 9:37, 38; Roma 12:11.
3 Kia Fakamafiti ki Ai: He kamata e Iesu hana gahua fakamatala mua ue atu, ne tolu ni mo e hafa e tau hana ke fakakatoatoa e mena ne kotofa ki a ia ke taute. Ne fakamatala a ia mo e manatu fakamafiti, he talahau: “Ko e mena lata ke fakamatala e au e vagahau mitaki he kautu he Atua ke he falu a māga foki; ha ko e mena ia ne fakafano mai ai au.”—Luka 4:43.
4 Ne tuku e Iesu he hana tau tutaki e fakamafiti pihia. (Mareko 13:32-37) Ko e mena haia “nakai oki foki e tau aho oti he fakaako atu e lautolu, mo e fakamatala atu ke he faituga, ke he taha fale foki mo e taha fale, e tala mitaki kia Iesu Keriso.” (Gahua 5:42) Nakai tuku fakamua e tau gahua ne tote e aoga ke he tau momoui ha tautolu. Pete ni e tokogahoa a lautolu, ne kautu a lautolu he fakamatala e tala mitaki “ke he tau tagata oti ke he lalolagi.”—Kolo. 1:23.
5 Fai kakano mua atu foki ma tautolu ke feaki e fakamafiti pihia he magaaho nei, “kua tata mai tuai e fakatulakiaga he tau mena oti.” (1 Pete. 4:7) Kua fita he fakatoka e Iehova e aho mo e magaaaho ma e fakaotiaga he tau mena nei. (Mata. 24:36) To matutaki ni e gahua fakamatala he vala magaaho ne toe. Ko e kakano haia kua matutaki a tautolu ke fakalahi e tau laliaga ha tautolu ke hokotia ke he tau tagata tokologa e tala mitaki.
6 He fakamalolo a tautolu ke he gahua fakamatala ha kua tata mai e fakaotiaga, to ha ha ia tautolu e makona he talahau ki a Iehova, tuga he talahau e Iesu: “Kua fakaoti e au e gahua ne tuku mai e koe kia au, ke eke e au.”—Ioane 17:4.