‘Kia Fakamatala Fakamafiti Atu e Kupu’
1 Ka moua e koe taha mena ne tu ai “MAFITI,” fefe e onoonoaga hau ki ai? Ko e kupu “mafiti” kua kakano “ke fakavave e tali atu.” Mo e kakano mitaki, ne hataki he aposetolo ko Paulo ke he tau Kerisiano ‘kia fakamatala fakamafiti atu e kupu.’ (2 Timo. 4:2) Kua tali fakavave atu nakai a koe ke he gahua nei?
2 Liga kua hokotaki age ki a Paulo ko e falu he hana tau matakainaga ne fakatata e aga ke “fakateaga ke he ha lautolu a tau gahua” ko e tau Kerisiano. (Roma 12:11, fakatatai NW) Kua fakatote he mena nei e tau fua he tau gahua ha lautolu ti pihia mo e olioli ne kua lata ia lautolu ke moua mai he lagomatai e falu.
3 Onoonoaga a Iesu ke he Fekafekauaga: Ko e fiafia ha ia ha Iesu he taute e fekafekauaga hana! Ne talahau e ia: “Ko e haku a mena kai hanei, kia eke e au e finagalo hana ne fakafano mai au, mo e fakaoti hana gahua.” Ko e fakafifitakiaga ha Iesu ne fakaohooho hana tau tutaki, ne fakamalolo e ia a lautolu he tala age ki a lautolu kua ‘hina e fonua ke helehele.’ (Ioane 4:34, 35) Ko e fakamafitiaga ne fakatata e ia he hana fekafekauaga katoa ne fakamoli ai he magaaho ne tala age a ia ke he tau tutaki hana ke “olelalo atu ai a mutolu ke he Iki hana e tau saito ke helehele, kia fakafano mai e ia e falu ke gahua ke he tau saito hana ke helehele.” (Mata. 9:38) Ne loto fakaaue a Iesu ha ko e poakiaga hana ke fakamatala, mo e ne fifili a ia ke nakai toka ha mena ke taofi a ia he taute ai.
4 Ka e Kua a Tautolu? He vaha nei, kua lahi mahaki atu e fakamafitiaga nakai pihia fakamua ke holo ki mua e gahua fakamatala. He tau kalakala loga he lalolagi, kua momoho e tau fonua ke helehele. Pihia foki ke he tau motu ne tuga kua fakamatafeiga e gahua fakamatala, ne kua totou afe ne papatiso he tau tau takitaha. Ha ne mafiti lahi mai e fakaotiaga he fakatokaaga nei, “kia fakamakai nakai noa ke he gahua he Iki.” (1 Kori. 15:58) Nakai tuga ai ke he falu magaaho, kua aoga ke eketaha fakamalolo a tautolu he folafola e fekau he Kautu ke he falu.
5 Kia hufia a tautolu he hokotia atu ke he falu mo e tala mitaki, he taha fale ke he taha fale mo e ha matakavi ni ka moua ai foki e tau tagata. He fakalataha katoatoa ai ke he gahua fakamatala, kua fakatata fakamahino e tautolu kua tuku fakamua e tautolu e Kautu he tau momoui ha tautolu. (Mata. 6:33) Ko e mahani fakamoli ha tautolu he fakamatala fakamafiti e kupu ka ta mai e olioli lahi ki a tautolu.