Kia Fakamatala mo e Fakamafiti!
1. Ko e heigoa e tomatoma ha Paulo ne latatonu mo e vahā ha tautolu?
1 ‘Kia fakamatala atu e kupu, kia fakamafiti.’ (2 Timo. 4:2) Ko e ha kua aoga lahi e tomatomaaga ha Paulo he vahā ha tautolu? Maeke fēfē he tau kupu nei ke lauia e tau momoui ha tautolu mo e falu?
2. Ko e ha kua kumi fakamakai e tautolu a lautolu ne nakaila logona e tala mitaki?
2 Putoia e Tau Momoui: Totou miliona e tau tagata he lalolagi ne nakaila logona e tala mitaki ka takitaki atu ke he fakamouiaga ha lautolu. (Roma 10:13-15; 1 Timo. 4:16) Tokologa e tagata loto fakamooli kua moua he tau matakavi ne gahua tumau. Ka ō atu a tautolu he aho kehe po ke taha magaaho he aho, liga to kehe e tagata ka moua e tautolu. Ko e kumi fakamakai pihia ka foaki ki a tautolu e manamanatuaga meā mo e atāina he fakamaligi toto.—Gahua 20:26.
3. Fakaaoga fakapulotu fēfē e magaaho ha tautolu he fekafekauaga?
3 Pete he fehagai mo e totoko vale, ko e tau Kerisiano he senetenari fakamua ne ‘fakapuke a Ierusalema ke he fakaako ha lautolu.’ (Gahua 5:28) Kua fakamakamaka pihia nakai a tautolu ke “talahau fakatonu atu”? (Gahua 10:42) He fekafekauaga, fakaaoga fakapulotu nakai e tautolu e magaaho? Ka leo ke he falu hane taute e liu aahi atu, fakailoilo nakai a tautolu ke vagahau ke he tau tagata ne o fano?
4. Lagomatai fēfē he fakamatala mo e fakamafiti a tautolu ke matakite tumau?
4 Holo ki Mua e Mataala ha Tautolu: Ha kua tata lahi e fakaotiaga he fakatokaaga nei, lata ia tautolu ke mataala, he matakite tumau. (1 Tesa. 5:1-6) He vagahau tumau a tautolu hagaao ke he ha tautolu a amaamanakiaga ke he Kautu, kua kalo mai a tautolu he fakaatukehe ke he tau mena he fakatokaaga nei. (Luka 21:34-36) Ko e mena ia, he “foli atu” tumau a tautolu ke he aho a Iehova, kua omoomoi a tautolu ke holo ki mua e fakamatala ha tautolu ke he gahua fakamoui.—2 Pete. 3:11, 12.
5. Omoi fēfē he fakalilifu ke he moui a tautolu he fekafekauaga?
5 He fakamatala a tautolu mo e fakamafiti, ne fakakite e tautolu e onoonoaga ha Iehova ke he moui: “Nakai finagalo a ia ke malaia taha, ka kia hohoko oti kana ke he tokihala.” (2 Pete. 3:9; Eseki. 33:11) Kia eketaha a tautolu ke hokotia ke he tokologa he matakavi ha tautolu, he fakaheke ki a Iehova!—Sala. 109:30.