Ko e Vitio ne Fakamaama e Puhala Aoga Fakaekekafo

Ko e tau pulotu ma e tau matafakatufono mo e leveki malolō tino kua malikiti e kitekiteaga ke he tau mahani tonu mo e tonuhia he tau tagata tului fakaekekafo. Kua fakaohooho he mena nei e tau tuluiaga mo e tau puhala foou nukua maeke ke aoga ke he Tau Fakamoli a Iehova. (Gahua 15:28, 29) Ko e matapatu haia he vitio Transfusion-Alternative Health Care​—Meeting Patient Needs and Rights. Kitekite ki ai, ti liu fakamanatu e tau mena haau ne ako.​—Mailoga: Ha kua putoia ke he vitio e tau vala iihi, kua lata e tau mamatua ke fakalotomatala ka kitekite e vitio mo e tau fanau ikiiki.

(1) Ko e ha falu matakau ekekafo kua liu kitekite ke he fakaaoga he tau fagai toto? (2) Talahau tolu e fakataiaga iihi halavihu ne kua taute ai mo e nakai fagai toto. (3) Tokofiha e ekekafo mo e tau tagata ihiihi he lalolagi katoa ne kua talahau kua makai a lautolu ke taute e tau tagata gagao mo e nakai fagai toto? Ko e ha kua makai a lautolu ke taute pihia? (4) Ko e heigoa kua fakakite he tau kumikumiaga foou he fale gagao hagaao ke he fakaaoga he toto? (5) Ko e heigoa e tau hagahaga kelea fakaekekafo ne lafi ke he tau fagai toto? (6) Ko e heigoa e fakahikuaga ne moua he tau tagata pulotu hagaao ke he tau aoga he falu puhala fagai vai? (7) Ko e heigoa ne fakatupu e anaemia? Maeke fefe e tino he tagata ke fehagai ke he mena ia? Ko e heigoa kua maeke ke taute ke lagomatai aki e mena ia? (8) Maeke fefe ke fakalagalaga e talagaaga he tau tegatega kula i loto he tino he tagata gagao? (9) Ko e heigoa e tau puhala kua fakaaoga he magahala iihi ke fakatote hifo e toto ne hau ki fafo? (10) Maeke nakai e falu puhala fagai vai ke fakaaoga ke he tau fanau ikiiki po ke tau tagata kua putoia e moui ke he matematekelea fakalutukia? (11) Ko e heigoa taha matapatu fakaakoaga uho he tau mahani tonu he leveki fakaekekafo mitaki? (12) Ko e ha kua aoga ma e tau Kerisiano ke fifili tuai e tau tuluiaga ne nakai fakaaoga e toto? Maeke fefe ia tautolu ke taute e mena nei?

Ko e talia he falu tuluiaga ne fakakite he vitio ko e fifiliaga fakatagata ni ke felauaki mo e loto manamanatu he tagata kua fakaako he Tohi Tapu. Kua fifili nakai e koe e falu puhala fagai vai ne kua makai a koe ke talia ma haau mo e fanau haau? Ko e tau magafaoa ne nakai ko e Tau Fakamoli kua lata ke fakamaama katoatoa ki a lautolu haau a tau fifiliaga mo e tau kakano ma e mena ia.​—Kikite e “Tau Huhu he Tau Tagata Totou” he fufuta he The Watchtower ia Iuni 15, 2004 mo e Ko e Kolo Toko ia Novema 1, 2000.