Mautauteute Nakai a Koe ma e Mena Tupu Fakaofo Fakaekekafo?
Ko e mena fakaofo fakaekekafo kua maeke ke tupu mafiti mo e nakai fai hatakiaga. (Iako. 4:14) Ko e mena ia, ko ia ne lotomatala to mautauteute fakalahi a ia. (Fakatai 22:3) Kua fifili nakai e koe ko e heigoa e tau tuluiaga fakaekekafo mo e tau puhala ka talia e koe, ti kua fakamau hifo nakai e fifiliaga haau? Ke lagomatai a koe, ko e vitiō Transfusion-Alternative Health Care—Meeting Patient Needs and Rights, mo e vala ke ua he DVD ne mataulu Transfusion-Alternatives—Documentary Series, kua talaga. He kitekite ai e koe, kikite kua maeke nakai a koe ke tali e tau hūhū nā. Ha kua putoia ke he vitiō e tau vala iihi fakakū, kua lata e tau matua ke fakalotomatala ka kitekite ai mo e fanau ikiiki.
(1) Ko e ha e falu matakau ekekafo kua liu kitekite ke he fakaaoga he tau fagai toto? (2) Talahau tolu e fakataiaga iihi halavihu ne kua taute ai mo e nakai fagai toto. (3) Ko e ha ne totou afe e tau ekekafo mo e tau tagata ihiihi he lalolagi katoa ne kua makai ke taute e tau tagata gagao mo e nakai fagai toto? (4) Ko e heigoa kua fakakite he tau kumikumiaga foou he fale gagao hagaao ke he fakaaoga he toto? (5) Ko e heigoa e tau hagahaga kelea fakaekekafo ne lafi ke he tau fagai toto? (6) Ko e heigoa e fakahikuaga ne moua he tau tagata pulotu hagaao ke he tau aoga he falu puhala fagai vai? (7) Ko e heigoa ne fakatupu e anaemia, mo e ko e heigoa kua maeke ke taute ke lagomatai aki e mena ia? (8) Maeke fēfē ke fakalagalaga e talagaaga he tau tegatega kula i loto he tino he tagata gagao? (9) Ko e heigoa e tau puhala kua fakaaoga he magaaho iihi ke fakatote hifo e toto ne hau ki fafo? (10) Maeke nakai e falu puhala fagai vai ke fakaaoga ke he fanau ikiiki po ke tau tagata kua hoko e moui ke he matematekelea lahi fakalutukia? (11) Ko e heigoa taha he tau matapatu fakaakoaga uho lahi he levekiaga fakaekekafo mitaki?
Ha ko e talia he falu tuluiaga ne fakakite he vitiō ko e fifiliaga fakatagata, ua fakatali ato feleveia a koe mo e mena tupu fakaofo to manamanatu laia ke he mena ka talia po ke nakai talia e koe. Ko e tohi “God’s Love” he veveheaga 7 mo e tau reference i loto ti pihia mo e lau he uho he fufuta he Ha Tautolu a Fekafekauaga he Kautu, Novema 2006 ka lagomatai a koe ke taute e tau fifiliaga tonu. Ti ka papatiso a koe, fakakite e tau fifiliaga haau ke he laupepa HCD, ti uta tumau mo koe ke he tau magaaho oti.
[Blurb he lau 5]
Kua fifili nakai e koe ko e heigoa e tau tuluiaga fakaekekafo mo e tau puhala ka talia e koe ti fakamau hifo ai?