Kua Fakatuai Kia a Koe?
Fakatuai ke he heigoa? Ke fakapuke e laupepa HCD (Health Care Directive) ne foaki ma e Tau Fakamoli kua papatiso. Ha kua “nakai iloa e [koe] e mena ke tupu mai a pogipogi,” kua uho lahi ke fifili tuai mo e fakakite ke he tau matatohi haau e tau tuluiaga mo e tau fakaholoaga ka talia e koe he tau magaaho fakalutukia fakaekekafo. (Iako. 4:14; Gahua 15:28, 29) Ke lagomatai a koe, kua taute ai e vitiō Transfusion-Alternative Health Care—Meeting Patient Needs and Rights. Kitekite ki ai, ti liu fakamanatu e tau mena haau ne ako he lagomatai he tau hūhū nā i lalo.—Mailoga: Ha kua putoia ke he vitiō e tau vala iihi fakakū, kua lata e tau matua ke fakalotomatala ka kitekite e vitiō mo e fanau ikiiki.
(1) Ko e ha e falu matakau ekekafo kua liu kitekite ke he fakaaoga he tau fagai toto? (2) Talahau tolu e fakataiaga iihi halavihu ne kua taute ai mo e nakai fagai toto. (3) Tokofiha e ekekafo mo e tau tagata ihiihi he lalolagi katoa ne kua talahau kua makai a lautolu ke taute e tau tagata gagao mo e nakai fagai toto? Ko e ha kua makai a lautolu ke taute pihia? (4) Ko e heigoa kua fakakite he tau kumikumiaga foou he fale gagao hagaao ke he fakaaoga he toto? (5) Ko e heigoa e tau hagahaga kelea fakaekekafo ne lafi ke he tau fagai toto? (6) Ko e heigoa e fakahikuaga ne moua he tau tagata pulotu hagaao ke he tau aoga he falu puhala fagai toto? (7) Ko e heigoa ne fakatupu e anaemia? Maeke fēfē e tino he tagata ke fehagai ke he mena ia? Ko e heigoa kua maeke ke taute ke lagomatai aki e mena ia? (8) Maeke fēfē ke fakalagalaga e talagaaga he tau tegatega kula i loto he tino he tagata gagao? (9) Ko e heigoa e tau puhala kua fakaaoga he magaaho iihi ke fakatote hifo e toto ne hau ki fafo? (10) Maeke nakai e falu puhala fagai vai ke fakaaoga ke he fanau ikiiki po ke tau tagata kua putoia e moui ke he matematekelea fakalutukia? (11) Ko e heigoa taha matapatu fakaakoaga uho he tau mahani tonu he leveki fakaekekafo mitaki? (12) Ko e ha kua aoga ma e tau Kerisiano ke fifili tuai e tau tuluiaga ne nakai fakaaoga e toto? Maeke fēfē ia tautolu ke taute e mena nei?
Ko e talia he falu tuluiaga ne fakakite he vitiō ko e fifiliaga fakatagata ni ke felauaki mo e loto manamanatu he tagata kua fakaako he Tohi Tapu. Kua taute nakai e koe e fifiliaga ke he tau tuluiaga mo e tau puhala fakaekekafo kua makai a koe ke talia ma haau mo e fanau haau? Ma e fakatutalaaga katoatoa ke he tau matakupu nei, kikite “Tau Hūhū he Tau Tagata Totou” i loto he tau fufuta he The Watchtower, Iuni 15, 2004, mo e Kolo Toko ia Oketopa 15, 2000, mo e he uho “Fēfē e Onoonoaga Haaku ke he Tau Vala Toto mo e Tau Puhala Fakaekekafo ne Putoia e Toto Haaku?” i loto he fufuta he Ha Tautolu a Fekafekauaga he Kautu, Novema 2006. Ko lautolu ne fifili e koe ke lata ma e magaaho fakalutukia mo e ha tagata he magafaoa haau ne nakai ko e Tau Fakamoli, kua lata ke tala age oti ki a lautolu e tau fifiliaga haau.