Fakaako a Lautolu ne Mahani Molū ke O he Puhala he Atua
1. Ko e heigoa kua putoia ke he taute tutaki?
1 Ko e tau tutaki he Keriso he senetenari fakamua ne talahau kua ha ha a lautolu ke he ‘Puhala Na.’ (Gahua 9:2) Ko e faka-Kerisiano mooli kua putoia e puhala moui katoa he tagata. (Fakatai 3:5, 6) He taute e tau fakaakoaga Tohi Tapu, mogoia, kua lata ia tautolu ke lahi atu e mena ke taute mai he folafola atu hokoia he iloilo tonu he tau taofiaga he Tohi Tapu. Kua latatonu foki ia tautolu ke lagomatai e tau tagata fakaako Tohi Tapu ke o he puhala ha Iehova.—Sala. 25:8, 9.
2. Ko e heigoa ka omoomoi e tau tagata fakaako Tohi Tapu ke omaoma ke he tau poaki he Atua?
2 Fakaalofa ki a Iehova mo e ki a Iesu: Ko e paleko ha ia ma e tau tagata nakai mitaki katoatoa ke tamai e tau manamanatuaga, tau aga, puhala vagahau, mo e tau mahani ha lautolu ke fakalautatai mo e finagalo he Atua! (Roma 7:21-23; Efeso 4:22-24) Pete ia, kua omoomoi he fakaalofa ke he Atua mo e haana Tama a lautolu ne mahani molū ke fehagai ke he paleko ia. (Ioane 14:15; 1 Ioa. 5:3) Lagomatai fēfē e tautolu e tau tagata fakaako Tohi Tapu ha tautolu ke feaki e fakaalofa nei?
3. Lagomatai fēfē e tautolu e tau tagata fakaako ke feaki e fakaalofa ki a Iehova mo e ki a Iesu?
3 Lagomatai e tagata fakaako haau ke iloa ko e vahega peresona fēfē a Iehova. Taha e matakainaga taane ne fakamaama, “Nakai maeke e tau tagata ke fakaalofa ke he tagata ne nakai iloa e lautolu, ti mai ni he kamataaga he fakaakoaga, ne fakaako age e au e higoa he Atua mai he Tohi Tapu, ti kumi magaaho au ke peehi e tau aga ha Iehova.” Ko e fakamahino he tau fakafifitakiaga ha Iesu ko e puhala mitaki lahi mahaki ke taute aki e mena nei. (Ioane 1:14; 14:9) Ke lafi ki ai, fakaaoga e puha fakamanatu he matahiku he tau veveheaga takitaha he tohi Fakaako he Tohi Tapu ke lagomatai e tagata fakaako ke fakaata e tau aga homo ue atu he Atua mo e haana Tama.
4. (a) Ko e ha ne tokologa e tau tagata fakaako ne kitia e fakamatala ko e paleko? (e) Maeke fēfē ia tautolu ke lagomatai e tau tagata fakaako ha tautolu ke taute e tau lakaaga fakamua he fekafekauaga faka-Kerisiano?
4 Fakaako he Fakafifitakiaga: Ha ko e tau faiaoga mo e tau takitaki, kua fakakite e tautolu ke he falu e kakano ke o he puhala he Atua ha ko e tau gahua. (1 Kori. 11:1) Ma e fakatai, laulahi he tau tagata fakaako Tohi Tapu kua nakai mahani ke fakafeleveia atu ke he tau tagata kehe ke tala age e tau taofiaga ha lautolu. Ko e mena ia, kua lata ke fakauka mo e fakamakutu ke lagomatai a lautolu ke feaki e fakaalofa, tua, mo e malolō kua lata ke fakalataha ke he gahua fakamatala mo e taute tutaki. (2 Kori. 4:13; 1 Tesa. 2:2). Ko e manako ha tautolu ke takitaki e tau tagata fakaako ha tautolu ka fakaohooho a tautolu ke fakatauo mo lautolu ka taute e lautolu e tau lakaaga fakamua he fekafekauaga faka-Kerisiano.
5. Lagomatai fēfē he fakafifitakiaga mitaki e tau tagata fakaako ke kitia e tau mena kua putoia he muitua ke he tau poaki he Atua?
5 Kua maeke e fakafifitakiaga haau ke fakamaama ke he tau tagata fakaako falu faahi aoga he moui Kerisiano. Ka aahi atu a koe ki a lautolu ne gagao po ke fakafeleveia mafanatia ke he falu he tau feleveiaaga he fakapotopotoaga, kua kitia e lautolu e fakakite he fakaalofa. (Ioane 15:12) Ka fakalataha a koe ke fakamea e Fale he Kautu po ke taute e tau mena ke lagomatai falu, kua hane fakaako e koe a lautolu ke fekafekau ke he falu. (Ioane 13:12-15) Ka kitia e lautolu a koe kua fakatumau e moui mukamuka, to maama ia lautolu e kakano ke ‘kumikumi fakamua e kautu.’—Mata. 6:33.
6. Ko e heigoa e tau fua ne moua he lagomatai a lautolu ne mahani molū ke fekafekau ki a Iehova?
6 Ko e gahua he fakaako falu ke he Kupu he Atua mo e taute tutaki kua lahi e laliaga kua putoia ki ai. Ka ko e fiafia ha ia ke kitia a lautolu ne mahani molū kua ‘mahani ke lata mo e kupu moli’!—3 Ioa. 4.