Fakakite e Fiafia Fakatagata—He Nakai Fili Tagata ka Fakamatala
1 He fakakiteaga, ne kitia he aposetolo ko Ioane e agelu ne lele he pulagi ne fakamatala e tala mitaki tukulagi ke he tau tagata he “tau motu kehe oti, mo e tau magafaoa, mo e tau vagahau kehekehe, mo e tau motu.” (Fakakite. 14:6) Muitua nakai a tautolu ke he puhala he agelu he fakamatala nakai fili tagata? He nakai mailoga ai, to liga ha ha ia tautolu e tau aga kua onoono hifo ke he tau tagata. Ko e aga ha tautolu ke he tau tagata ne feleveia mo tautolu kua maeke ke lauia e puhala kua talahau e tautolu e tala mitaki ki a lautolu. Ko e mena ia, kua lata ia tautolu ke fakatātā e manamanatu fakaalofa mooli ka fakamatala ke he tau tagata he tau feakiaga kehekehe.
2 Manamanatu ke he Fonua ha Mutolu: Kua fai tagata kia ne o mai he tau motu kehe po ke tau tagata fehola nukua nonofo he matakavi haau? Liga mukamuka lahi ke nimo a lautolu. Kia matamua ke kumi a lautolu nei ti lali ke iloa mitaki a lautolu. Ko e heigoa e tau manako mo e tau kapaletu ha lautolu, tau mena ne fiafia mo e nakai fiafia a lautolu, tau mena ne matakutaku mo e onoono hifo a lautolu ki ai? Eketaha ke hiki e fakataitaiaga haau fakatatau ke he fekau he Kautu. (1 Kori. 9:19-23) Tuga e aposetolo ko Paulo, kua lata ia tautolu ke logona e kotofaaga ke folafola e tala mitaki ke he tau tagata he matakavi ha tautolu, putoia a lautolu mai he tau motu kehe, lautolu ne kehe e aga fakamotu, lautolu ne vagahau kehe, mo lautolu ne mautū.—Roma 1:14.
3 Fakamatala fēfē mogoia a koe ke he taha tagata ne vagahau kehe? Fakaaoga fakamitaki e tohi tote Good News for People of All Nations. Liga uta foki e koe e falu tuleke po ke porosua he vagahau kua fakaaoga tumau he matakavi haau. (Kikite Ha Tautolu a Fekafekauaga he Kautu ia Iulai 2003 lau 8, para. 2-3.) Lafi ki ai, falu he tau tagata fakailoa ne lali lahi ke ako e fakafeleveia mo e fakataitaiaga mukamuka he falu vagahau. Kua fa fiafia e tau tagata ke logona taha tagata ne lali ke tutala ki a lautolu he vagahau ni ha lautolu, pete ne tote, ti liga futia he mena nei a lautolu ke he tala mitaki.
4 Fifitaki a Iehova: He hokotia ke he tau tagata he tau feakiaga kehekehe, fifitaki e tautolu e Atua ko Iehova, ne nakai fili tagata, “kua finagalo ke fakamomoui e tau tagata oti kana, mo e hokotia a lautolu he maama ke he kupu moli.”—1 Timo. 2:3, 4.