Kua Mau Tauteute Nakai a Koe ma e Matematekelea Pauaki?
1. Ko e ha kua pulotu ke mau tauteute ma e tau matematekelea?
1 He tau tau takitaha, totou miliona e tau tagata he lalolagi katoa, putoia e tokologa he tau matakainaga ha tautolu, ne lauia he tau mafuike, tau peau kula, tō lahi mahaki e uha, tau afā, tau tiotio, mo e puke lahi he tau vai. Ha kua tupu fakaofo e tau matematekelea pauaki ti liga lauia e ha tagata ia tautolu, kua pulotu mooli ai mogoia ke mau tauteute.—Fakatai 21:5.
2. Ko e ha kua lata ia tautolu ke fakailoa tumau ke he tau motua e matahigoa foou he kaina mo e (tau) numera telefoni ha tautolu?
2 Tauteute Tuai: Falu magaaho kua maeke e tau takitaki he motu ke hataki tuai ke he tau matematekelea ia hane hoko mai. Kua aoga ke omaoma ke he tau hatakiaga nei. (Fakatai 22:3) He tau tuaga pihia, to lali e tau motua ke matutaki mo e tau tagata oti he fakapotopotoaga ke lagomatai a lautolu ke tauteute e tau mena kua lata. Ka mole e matematekelea, to lali foki e tau motua ke matutaki mo lautolu oti ne fakalataha ke he fakapotopotoaga ke kitia kua haohao mitaki mo e ke iloa e tau mena kua liga manako ke lagomatai. To mole noa e tau magaaho aoga kaeke nakai moua he tau motua e tau vala tala matutaki foou. Ti kua mitaki ma e tau tagata fakailoa ke fakailoa tumau ke he tohikupu mo e leveki fakaakoaga tohi ha lautolu hagaao ke he matahigoa foou he kaina mo e (tau) numera telefoni.
3. Liga maeke fēfē ia tautolu ke kauauloa mo e tau motua kaeke nonofo a tautolu he matakavi ne liga matematekelea pauaki?
3 Ka haia e fakapotopotoaga he matakavi matematekelea pauaki, to liga ole e tau motua ke he tau tagata fakailoa ke moua e higoa mo e numera telefoni he tagata he magafaoa po ke kapitiga ne nofo i tua he matakavi ia mo e lata ke matutaki ki a ia kaeke fai matematekelea tupu fakaofo. Maeke e mena nei ke lagomatai e tau motua ke kumi a lautolu kua fitā e ō kehe he matematekelea. To liga manako foki e tau motua ke taute e taha fakatokaaga matematekelea ma e fakapotopotoaga ti putoia e tohi tuga ke he tau koloa matematekelea tupu fakaofo ke mau tuai, tau fakatokaaga ke o kehe, mo e tau fakatokaaga ke lagomatai a lautolu ne manako lagomatai pauaki. Kua aoga ke kauauloa ke he tau fakatokatokaaga fakaalofa nei.—Hepe. 13:17.
4. Ko e heigoa ha tautolu ka taute kaeke lauia e matakavi ha tautolu he matematekelea?
4 Ka Mole e Matematekelea: Ko e heigoa haau ka taute ka lauia e matakavi haau he matematekelea? Kikite kua fai tauteaga ke he leveki fakatino he magafaoa haau. Ka maeke ia koe, lagomatai falu ne kua lauia he matematekelea. Eketaha ke matutaki fakamafiti mo e leveki fakaakoaga tohi haau po ke taha motua. Lata ke taute pihia pete ka haohao mitaki mo e nakai manako lagomatai a koe. Ka manako lagomatai, kia mauokafua kua hane lali fakamalolō e tau matakainaga ke lagomatai a koe. (1 Kori. 13:4, 7) Manatu kua mailoga e Iehova e tuaga haau; falanaki ki a ia ke fakamalolō a koe. (Sala. 37:39; 62:8) Kia mataala ke he tau tutūaga ke foaki ke he falu e lagomatai fakaagaaga mo e fakatotoka ke he manamanatuaga. (2 Kori. 1:3, 4) Lali ke tutaki mafiti e fakaholoaga fakateokarasi ha mutolu.—Mata. 6:33.
5. Kua lauia fēfē a tautolu ko e tau Kerisiano he fakamatakutaku he tau matematekelea?
5 He fakatupetupe e lalolagi ke he matakutaku he matematekelea, kua maeke ia tautolu ke onoono ki mua mo e mauokafua. To nakai leva ti mole atu e tau mena matematekelea oti kana. (Fakakite. 21:4) Ka e he magaaho nei, kia taute e tautolu e tau lakaaga aoga ke mau tauteute ma e tau magaaho lekua mo e uka he fakatumau a tautolu ke fakamakutu ke fakamatala e tala mitaki ke he falu.