Fifitaki e Faiaoga ne Mua ka Fakaaoga e Tohi Fakaako he Tohi Tapu
1. Puhala fe ne fakaako e Iesu?
1 Ko e Faiaoga ne Mua, ko Iesu, ne fakamaama tumau e tau mena ke he puhala mukamuka mo e maaliali. Ke fakalagalaga e manatu he tau tagata fanogonogo haana, ne fa hūhū a ia ki a lautolu hagaao ke he onoonoaga ha lautolu. (Mata. 17:24-27) Ne hagaaki fakatonu a ia ke he Kupu he Atua. (Mata. 26:31; Mare. 7:6) Ne fakaeneene a ia neke lolelole e tau tutaki haana ha ko e tau vala tala loga, he iloa to fakatumau a lautolu ke fakaako. (Ioane 16:12) Ne manako foki a Iesu ke iloa po kua talitonu mo e maama nakai he tau tutaki haana e tau mena ne fakaako age e ia. (Mata. 13:51) Ko e tohi Fakaako he Tohi Tapu kua talaga ke lagomatai a tautolu ke fakaako ke he puhala ia foki.
2. Fakaaoga fēfē e tautolu e tau hūhū hafagi ma e tau veveheaga takitaha?
2 Tau Hūhū Hafagi: He kamata a koe ke fakaako e veveheaga, kua mitaki ke hagaaki ke he tau hūhū hafagi i lalo he mataulu. Totou e tau hūhū ke fakalagalaga aki e fiafia he tagata fakaako Tohi Tapu. Po ke uiina a ia ke tala fakakū hagaao ke he tau hūhū ia. Kua nakai lata ke tutala loa ke he tau mena ne talahau e ia po ke fakahako oti e tau mena hepe haana ne talahau. Liga lata ia koe ke fakaaue ke he tau manatu haana ti kamata e fakatutalaaga ke he vala tala. Ko e talahauaga haana ke he tau hūhū hafagi ka lagomatai a koe ke iloa kua lata nakai ia koe ke fakaaoga fakalahi taha magaaho he taha vala he fakaakoaga.
3. Maeke fēfē ia tautolu ke fakamukamuka e fakaakoaga?
3 Tau Tohiaga Tapu: Kua lata ke matapatu e fakaakoaga ke he tau Tohiaga Tapu. (Hepe. 4:12) Pete ia, kua nakai lata ke totou oti e tau kupu tohi i loto. Peehi e tau kupu Tohiaga Tapu ne fakavē e tau taofiaga ha tautolu ki ai. Ko e tau kupu tohi ne fakamaama e tupuaga he vala tala kua nakai lata ke totou. Ko e tohi Fakaako he Tohi Tapu kua fakakite e kupu mooli ke he puhala nakai halauka. Kia fakamukamuka e fakaakoaga. Hagaaki ke he tau matapatu manatu, mo e kalo mai he hihiga ke lahi e tala ke he tau matafeiga po ke talahau e tau vala tala mai fafo ne nakai lata.
4. Ko e heigoa ka fifili po kua lata nakai ia tautolu ke fakaaoga lahi taha magaaho ka fakaako ke tutala ke he vala tala he apenetiki?
4 Apenetiki: Ne toka he apenetiki 14 e matakupu ne lafi ki luga ke fakamaama foki e tau vala tala he tohi. Ke fakatutala ke he tau matakupu nei he magaaho ka fakaako ai ko e mena fifili ne koe. Ko e falu matakupu, kua liga fifili e koe ke fakamalolō e tagata fakaako haau ke totou e vala tala lafi ki luga ia he magaaho ni haana, mahomo atu ka maama mo e talia e ia e tau vala tala he tohi. Ke fakatai ki ai, kaeke kua fitā e talitonu e tagata fakaako ko Iesu ko e Mesia, liga nakai lata ke totou mo ia e mataulu “Iesu Keriso—Ko e Mesia ne Mavehe,” he magaaho ka fakatutala e veveheaga 4, “Ko Hai a Iesu Keriso?” He falu magaaho, kua liga mitaki ke fakaaoga lahi taha magaaho ka fakaako ke fakatutala ke he vala tala he apenetiki po ke vala i ai.
5. Kaeke fifili e tautolu ke tutala ke he vala tala he apenetiki, liga to taute fēfē e tautolu?
5 Kaeke fifili e koe ke tutala ke he vala tala he apenetiki, liga lata ia koe ke tauteute fakamua e tau hūhū ti fakatutala e tau paratafa mo e tagata fakaako tuga ne taute e koe he vala tala he tohi. Po ke uta fakatatau ke he tau manako he tagata fakaako, liga fifili e koe ke fakaaoga falu minuti ka fakaako ke liu fakamanatu e tau vala tala mo ia. To taute he mena nei a koe ke iloa tonu kua maama e ia e vala tala ne totou tokotaha ne ia he magaaho haana.
6. Fakaaoga fēfē e puha fakamanatu he matahiku he tau fakaakoaga takitaha?
6 Puha Fakamanatu: Ko e puha he matahiku he tau veveheaga takitaha kua foaki e tau talahauaga ne fa tali e tau hūhū hafagi. Maeke ia koe ke fakaaoga e tau talahauaga nei ke fakamanatu e tau matapatu manatu he veveheaga. Kua lagomatai ke he falu tagata fakailoa ke totou e tau talahauaga takitaha mo e tau kupu tohi i ai mo e tagata fakaako. Ti hūhū e lautolu ke he tagata fakaako ke fakamaama fakakū e puhala ne fakamooli he kupu tohi e talahauaga ia. Ne fakakite he mena nei ke he faiaoga kua maama mooli he tagata fakaako e tau matapatu manatu he fakaakoaga mo e puhala ne lalago he tau mena nei e Tohi Tapu mo e talia nakai e ia. Ne fakamahani foki e tagata fakaako ke fakaaoga e Tohi Tapu ke fakamaama e tau kupu mooli ke he falu.
7. Fakaaoga fēfē e tautolu e tohi Fakaako he Tohi Tapu ke fakakatoatoa e poakiaga ha tautolu?
7 Ko e puhala lauia mitaki lahi ke fakakatoatoa e poakiaga ha tautolu ke fakaako e tau tagata mo e taute tutaki ko e fifitaki ke he tau puhala fakaako ha Iesu. (Mata. 28:19, 20) Maeke he tohi Fakaako he Tohi Tapu ke lagomatai a tautolu ke taute pihia. Kia fakaaoga fakamitaki ai ke fakaako ke he falu e kupu mooli he puhala maaliali, mukamuka, mo e fiafia.