Fakaaoga Fakamitaki e Tau Vala he Tohi Fakaako he Tohi Tapu
He iloa he tagata fakaako Tohi Tapu e mena ne fakaako mooli he Tohi Tapu mo e fakagahua e mena ne iloa e ia, to tupu mo e fua fakaagaaga a ia. (Sala. 1:1-3) Maeke a tautolu ke lagomatai e tagata fakaako ha tautolu he fakaaoga fakamitaki falu vala aoga he tohi Fakaako he Tohi Tapu.
Tau Hūhū Hafagi: Igatia e veveheaga mo e kamata aki e hūhū ne tali he fakaakoaga. Maeke a koe ke talahau e tau hūhū fakalagalaga nei ke fakalagā e manako he tagata fakaako ke lata mo e ha mua a fakatutalaaga kahau. Po ke maeke a koe ke uiina a ia ke tali fakakū ke he tau hūhū takitaha. Ka talahau e ia e manatu hepe, nakai lata ke fakahako a ia he mogo tonu nei. Ko e tau tali haana to lagomatai a koe ke maama e tau manatu kua lata ke hagaaki fakalahi ki ai mo e fakamaama ai.—Fakatai 16:23; 18:13.
Apenetiki: Ka maama he tagata fakaako mo e talia e vala he matapatu tala, maeke ia koe ke fakamafana a ia ke liu manamanatu ke he vala he apenetiki ne tatai he magaaho ni haana. He fakaakoaga kahau, liga fakaaoga e koe e falu minuti gahoa ke iloa mooli kua maama ai e ia. Kaeke ke aoga lahi ki a ia, lata a koe ke fakaaoga e magaaho he mogo ka fakaako ke fakatutala ke he vala he apenitiki po ke vala i ai ke totou e tau paratafa mo e talahau e tau hūhū nukua tauteute tuai e koe.
Puha Fakamanatu: Ko e puha fakamanatu he matahiku he tau veveheaga takitaha ne ha ha ai e tau talahauaga ne tali e tau hūhū hafagi. Maeke a koe ke fakaaoga e vala nei ke iloa tonu kua maama ti maeke foki he tagata fakaako haau ke fakamaama e tau matapatu manatu. Totou fakaleolahi tokoua e tau talahauaga takitaha pihia mo e tau kupu tohi ne ha ha i ai. Ti uiina e tagata fakaako haau ke fakaaoga e (tau) kupu tohi ke fakamaama e kakano ne mooli e talahauaga.—Gahua 17:2, 3.