Olioli e Fakaakoaga ha Tautolu ke he Ko e Heigoa ne Fakaako Moli he Tohi Tapu?
1 Ko e mena fiafia lahi he Fonoaga he Faahimotu “Omaoma Mahani Atua” ko e fakatoka maiaga he tohi Ko e Heigoa ne Fakaako Moli he Tohi Tapu? Nakai leva to fakaaoga ai e tautolu he gahua he fonua, mua atu ka taute e tautolu e tau fakaakoaga Tohi Tapu. Ko e mena ia, kua lata ia tautolu ke iloa mitaki e tohi foou nei. To maeke ai kakano nakai leva to fakaako he Fakaakoaga Tohi he Fakapotopotoaga, kamata he faahi tapu ia Iulai 24, 2006.
2 To fakatutala e leveki he Fakaakoaga Tohi he Fakapotopotoaga ke he tau hūhū he kamataaga he tau veveheaga takitaha. Ti kamata e fakaakoaga he fakaaoga e tau hūhū i kelekele he lau tohi. To totou mo e fakatutala ke he tau matapatu kupu tohi, mo e puha “Tau Mena ne Fakaako he Tohi Tapu” he matahiku he tau veveheaga takitaha ka lagomatai he liu fakamanatu e tau vala tala ha kua toka he puha e tau tali faka-Tohi Tapu he tau hūhū he kamataaga he veveheaga. To fiafia a koe ke tali ha kua fakamaama fakamukamuka he tohi nei e tau matakupu ke he puhala fakaohooho.
3 Kua foaki he apenetiki he tohi nei e tau tala matafeiga ke he tau mataulu kehekehe. To fakaaoga e tautolu e vala tala nei ka manako e tagata fakaako Tohi Tapu ke lahi e iloaaga ke he taha matakupu pauaki. To fakatutala ke he falu vala he apenetiki ka taute e Fakaakoaga Tohi he Fakapotopotoaga. Ko e vala tala oti he tau mataulu he apenetiki to totou he tagata totou he fakaakoaga tohi, ti vevehe e tau vala tala loloa. Kua nakai toka e tau hūhū fakaako he apenetiki. Ka e maeke he leveki ke taaki mai e tau tali ia lautolu i ai he talahau e tau hūhū ne fakamaama e tau matapatu manatu.
4 Ko e tau fakaakoaga he tohi Fakaako he Tohi Tapu to holo mafiti he Fakaakoaga Tohi he Fakapotopotoaga. Kua nakai amanaki ki a tautolu ke mafiti pihia ka fakaako e tohi nei mo e falu, mua atu ka tote po ke nakai iloa e lautolu e Tohi Tapu. (Gahua 26:28, 29) Ke he tau fakaakoaga Tohi Tapu he kaina, to lata ia tautolu ke fakatutala fakamatafeiga e tau kupu tohi, fakamaama e tau fakataiaga, mo e falu mena foki. Ti taute ai mo foliaga haau ke hau tumau he tau faahi tapu oti ke fakaako katoatoa e tohi Ko e Heigoa ne Fakaako Moli he Tohi Tapu?