Ko e Matagahua Fakamatala Mua Ue Atu ne Nakaila Pihia he Lalolagi!
Kua molea e 100 e tau he fakatokatoka tumau e Tau Fakamoli a Iehova ke folafola e tala mitaki. (1 Kori. 9:23) Ke he mena nei ne eke ko e matagahua fakamatala mua ue atu ne nakaila pihia he lalolagi, kua fakapuloa e tautolu e fekau nei ke he teau he tau vagahau. Kua molea e 230 e motu ne uta e tautolu ki ai. (Mata. 24:14) Ka ko e ha ne latatonu ai e gahua nei? Ti kua taute fēfē ke he lalolagi katoa?
Ko e vitiō Jehovah’s Witnesses—Organized to Share the Good News kua tali e tau hūhū ia he fakakite fakamatafeiga mai e fakatino lahi hagaao ke he tau faahi loga he gahua ha tautolu ke he lalolagi katoa. He kitekite e koe, manamanatu ke he tau hūhū nei: (1) Kua fakatokatoka mo e takitaki fēfē e tau gahua ha tautolu? (2) Lagomatai fēfē he tau Faahi Tohitohi, Fakaliliu, Tā Fakatino, mo tau Faahi Gahua Autiō/Vitiō ke fai vala ke he fakamatala he tala mitaki? (3) Ko e heigoa e kakano he fakalaulahi e fakatokaaga ke lomi mo e fakahū atu he tau tohi ha tautolu? (Ioane 17:3) (4) Fiha e katoa he tau tohi kehekehe ne lomi he taha e tau? (5) Ko e heigoa kua fakamooli ha ko e ha tautolu a tau tohi ne fakavē ke he Tohi Tapu? (Hepe. 4:12) (6) Ko e heigoa kua taute ke lagomatai fakaagaaga a lautolu ne matapouli mo e teligatuli? (7) Fakatupe fēfē e gahua ha tautolu? (8) Moua fēfē e tautolu e aoga mai he gahua he tau Faahi Foaki Fekau he Fale Gagao [Hospital Information Services], Faahi Gahua he Fekafekauaga [Service Department], mo e Faahi Gahua he Fonoaga? (9) Ko e taha he Tau Fakamoli a Iehova, kua fakatolomaki fēfē he vitiō nei e loto fakaaue haau ma e (a) gahua hane taute he fakatokatokaaga ha Iehova ke fakamatala e tala mitaki? (e) tau magafaoa he Peteli ne molea e 100 he lalolagi katoa? (i) fakamahaniaga ke fakaako e tau leveki mo e tau misionare? (o) aoga lahi ke kamata e tau aho takitaha he fakatutala ke he kupu he Tohi Tapu mo e tauteute tuai he tau faahi tapu takitaha ma e tau feleveiaaga he fakapotopotoaga? (u) tau aoga he ō ke he tau fakapotopotoaga faka-Kerisiano ha tautolu? (f) kakano he Parataiso he lalolagi? (Isaia 11:9) (g) fakalataha fakatagata ke he gahua helehele ne taute agaia?—Ioane 4:35.
Ko e heigoa e tali fiafia ne kitia e koe he magaaho ne fakakite e vitiō nei ke he haau a tau magafaoa, tau kapitiga, tau liliu aahi atu, mo e tau tagata fakaako Tohi Tapu? He ha he fakamafiti ke fakakite e vitiō nei mo e fakamatala e tala mitaki ke he falu a tagata foki?—Mata. 28:19, 20.