Tau Fakamoli a Iehova—Fakatokatoka ke Fakapuloa e Tala Mitaki
Kua molea e 100 tau he fakatokatoka e Tau Fakamoli a Iehova ke fakapuloa e tala mitaki. Ko e mena kua eke mo matagahua lahi ko e gahua fakamatala ne kua iloa he lalolagi katoa, kua fakailoa e tautolu e ogo nei ke he teau e tau vagahau mo e ke molea e 230 e motu kehekehe. (Mata. 24:14) Ko e ha ne kua aoga lahi ai e gahua nei? Kua maeke fēfē ke taute e gahua nei ke he lalolagi katoa? To tali mai he vitiō Jehovah’s Witnesses—Organized to Share the Good News e tau hūhū ia ka fakakite fakamatafeiga mai e tau faahi kehekehe he gahua ke he lalolagi katoa. Ka oti e kitekite ke he vitiō ti onoono la ke he tau hūhū ka mui mai.
Kua fakahokulo fēfē he vitiō nei haau a loto fakaaue ke he (1) gahua lahi ne kua taute he fakatokatokaaga a Iehova ke fakapuloa e tala mitaki? (2 Timo. 4:2) (2) tau magafaoa Peteli he lalolagi katoa? (3) tau fakaakoaga kua taute ke lata mo e tau misionare mo e tau kau leveki? (2 Timo. 2:2) (4) aoga ke kamata e tau aho takitaha aki e kupu Tohi Tapu mo e tauteute he tau faahi tapu takitaha ma e tau feleveiaaga he fakapotopotoaga? (Gahua 17:11) (5) aoga he fakalataha ke he tau feleveiaaga Kerisiano ha tautolu? (Hepe. 10:24, 25) (6) tau monuina ka moua e koe ka liuaki mai e Parataiso ke he lalolagi? (Isaia 11:9) (7) haau a monuina ke fakatau gahua auloa ke he heleheleaga?—Ioane 4:35.
Ko e vitiō nei kua fakamooli ai ko e koloa mitaki lahi ke fakailoa ke he tau tagata ne fiafia hagaao ke he gahua kua taute he Tau Fakamoli a Iehova he lalolagi katoa. (8) Ha e fe e magaaho mitaki ke fakakite e vitiō ke he ha tautolu a tau tagata fakaako Tohi Tapu, tau magafaoa, mo e falu? (9) Ko e heigoa e tau tali mitaki kua kitia e koe he magaaho ne fakakite ai?
He manamanatu a tautolu ke he mena ne kua taute e Iehova, kua omoomoi a tautolu ke fakapuloa e tau talahauaga nei he salamo: “Iehova na e, haku Atua, kua loga e tau mena kua eke e koe, ko e hau a tau mana mo e hau a tau manatu kia mautolu, nakai maeke ke talahau atu kia koe.” (Sala. 40:5) Kia fakaaoga fakamitaki e tautolu e vitio nei ke lagomatai aki e falu ke atihake e loto fakaaue ki a Iehova mo e haana fakatokatokaaga!