Puha Hūhū

◼ Kua tonu kia ma e taha he Tau Fakamoli a Iehova ke moua e tuluiaga mo e levekiaga he fale gagao po ke kaina leveki ne fakatū he fakatokatokaaga fakalotu?

Kua kehekehe e tau fakatokatokaaga fakalotu ne fakatūtū e tau fale gagao po ke tau kaina leveki ke foaki e tau tuluiaga fakaekekafo po ke leveki a lautolu ne gagao hololoa. Ko e laulahi, kua nakai fakatūtū e tau fale pihia ke lalago pauaki a Papelonia Lahi. (Fakakite. 18:2, 4) Liga kua taute fakamua ai ke fakatupe aki e fakatokatokaaga fakalotu. He vahā nei, ko e matahigoa fakalotu ni ne tohi ai he falu fale gagao, ka e he falu fale kua fai akoako ne gahua foki i ai.

Kaeke kua lata taha he Tau Fakamoli a Iehova ke fano ke he fale gagao po ke kaina leveki, lata ke taute ne ia e fifiliaga ko e finatu nakai ke he fale ne liga fai matutakiaga ke he fakatokatokaaga fakalotu. Ke he taha tagata to liga fakaatā he loto manamanatu haana a ia ke fano ki ai, ka ko e taha tagata to liga nakai fakaatā he loto manamanatu haana a ia. (1 Timo. 1:5) Kua ha ha ai e tau tutūaga ka liga fakaohooho e fifiliaga he taha tagata, ti kua lata ke manamanatu ke he tau mena nei.

Ke fakatai ki ai, liga ko e fale gagao po ke kaina leveki ne fakahigoa fakalotu ni kua tata mai he matakavi. Po ke kaeke kua fai fale gagao foki ne tata mai, ko e fale gagao ne fai matutakiaga fakalotu ni ne liga talahaua ke mitaki lahi e levekiaga. Ti liga ko e fale gagao ia ne fakahigoa fakalotu hokoia ni ne fai kanavaakau ke foaki e tuluiaga pauaki kua lata, po ke ko e fale gagao ia ni ka liga fakaatā e toketa po ke ekekafo iihi haau ke gahua ai. Taha mena foki, he falu magaaho to liga fakalilifu he tau fale gagao ne fai matutakiaga fakalotu e tuaga faka-Kerisiano haau ke he fakaaogaaga he toto, ka e liga nakai talia he falu fale gagao paraivete po ke fakatufono. Ti ko e falu anei he tau mena kua lata ke manamanatu ki ai he fifili e koe e fale gagao ke fakaaoga.

Kaeke ke fifili e koe ke fano ke he fale gagao po ke kaina leveki ne fai matutakiaga fakalotu, liga onoono pehē kua totogi na koe he fekau ne taute e lautolu. Liga mailoga pehē e koe ko e gahua pisinisi he fakatokatokaaga fakalotu anei, ti he totogi e fekau mai he pisinisi pihia kua nakai foaki pauaki po ke lalago e koe e lotu fakavai. Kua totogi na koe he koloa po ke he fekau.

Ka e mooli, ha ko e Kerisiano, kua lata ia koe ke mataala neke putoia ke he ha matagahua he tapuakiaga fakavai. Taha mena foki, to nakai talahau e koe e tau matahigoa fakalotu pauaki, tuga e “Father” po ke “Sister,” ke he ha tagata ne liga gahua i ai po ke ahiahi mai. (Mata. 23:9) Kia mailoga tumau e koe ko e fakaholoaga pisinisi hokoia anei ne moua e koe e tuluiaga mo e fekau, ti koenaia.

He uta a koe ke he fale gagao, liga tala age ko koe ko e taha he Tau Fakamoli a Iehova ti manako a koe ke ahiahi he tau motua he matakavi. To taute he mena nei ke moua mooli e koe e lalago fakaagaaga mitaki mai he tau motua he nofo a koe he fale gagao.​—1 Tesa. 5:14.

Ko e tau tagata talitonu he magafaoa, tau motua he matakavi, mo e falu he fakapotopotoaga kua lata ke manamanatu tumau ke he tau manako fakaagaaga he tau matakainaga fuakau ne nonofo he tau kaina leveki, mua atu ka fakatū he fakatokatokaaga fakalotu. Ko e fakailoilo ke he mena nei ka atihake fakalahi a lautolu ne fuakau ti to puipui mai a lautolu neke putoia tōtamaki ke he tau matafekau fakalotu, tau fakamanatuaga, po ke falu matagahua ne taute he tau fale pihia.

He mauloto e tau manatu nei, kia igatia ne tagata ke manamanatu ke he tau tutūaga oti ti taute ne ia e fifiliaga ko e fale gagao po ke kaina leveki fe ka fakaaoga e ia.​—Kala. 6:5.