Manatu a Lautolu he Tau Kaina Leveki Fuakau
1. Ko e ha kua lata ke o atu ke ta atu e tala mitaki ki a lautolu he tau fale leveki fuakau?
1 Tokologa e tagata kua fehagai mo e tau lauiaaga hagahagakelea he momotua e tau tino. (Fakama. 12:1-7) Falu kua momotua ne nonofo he tau fale leveki fuakau, ti nakai maeke tumau a tautolu ke hoko ki a lautolu ka fakamatala he taha fale ke he taha fale. Pihia foki e mena kua tupu ke he tau motu ne fa mahani e tau matua momotua ke hiki atu ke nonofo mo e tau fanau po ke falu magafaoa ha lautolu. Pete kua fakakaupā e maeke ke o fano po ke tau manamanatuaga, ko e tau tagata momotua mo e falu ne nonofo he tau kaina leveki kua liga maeke agaia ke iloa, maama, mo e fakaalofa ki a Iehova. Maeke fēfē ia tautolu ke ta atu e tala mitaki he “amaamanaki ke monuina ai” ki a lautolu?—Tito 2:13.
2. Moua fēfē e tautolu e matahigoa he tau fale leveki ke ahiahi ki ai?
2 Ke Kamata: Fa mahani ke moua e tau matahigoa he tau fale leveki he kumi ke he pepa telefoni he matakavi. Fakakia ke he tau mataulu tuga e “tau fale leveki fuakau,” “tau kaina he tau fuakau,” mo e “tau fale leveki.” Ko e leveki fekafekau ka takitaki ke fakatokatoka ma e tau tagata fakailoa kua lotomatala ke ahiahi ke he tau fale takitaha nei. Ka mitaki e fakatokatokaaga mo e falanaki ki a Iehova, kua fa maeke ke kamata e matakau fakaako Tohi Tapu.—Fakatai 21:5; 1 Ioa. 5:14, 15.
3, 4. (a) Ko hai kua lata ia tautolu ke fakakia ki ai ke fakatū e matakau fakaako? (e) Liga fakatoka fēfē e tautolu e fakaholoaga ma e fakaakoaga?
3 Ko e puhala ke kamata aki e fakaakoaga kua fakavē ni ke he tuaga he fale leveki. He tau fale ne tokologa e tagata ne nonofo ai mo e tau tagata gahua, kua mitaki lahi ke o atu ke he tagata ne gahua he ofisa tuga e tagata tali telefoni mo e ole ke tutala ke he takitaki he tau matagahua i ai. He tau kaina he tau fuakau ne nakai tokologa a lautolu i ai ti ua po ke tolu e tagata gahua leveki, liga mitaki ke fakatoka e magaaho ke tutala fakahako ke he tagata ne pule ke he kaina.
4 He tau tuaga ia, fakamaama kua foaki noa e koe e magaaho haau ke fakamafana e tau tagata kua fiafia ke totou mo e tutala ke he tau tala Tohi Tapu. Hūhū kua fai tagata nakai i ai kua liga manako ke fakalataha ke he matakau ke fakatutala ke he Tohi Tapu ke he kavi 30 e minuti he taha e faahi tapu. Kehekehe e tau tohi kua maeke ke fakaaoga, ka e tokologa ne pehē kua mitaki lahi e Tohi Haaku he Tau Tala Tohi Tapu mo e Ko e Tagata Mua Ue Atu ne Moui. Liga manako a koe ke fakakite e tau tohi ke he takitaki. Ko e aho, tulā, mo e poko ke feleveia ai to maeke ke fakatokatoka mo e takitaki ti to lafi ke he kalena he tau matagahua he kaina leveki. Ua mataofi he talahau ko koe e taha he Tau Fakamoli a Iehova. He magaaho taha, lagomatai e takitaki ke maama kua nakai fina atu a koe ke taute he tapu fakalotu ka ko e fina atu a koe ke fakalaulahi he fakaakoaga Tohi Tapu.
5. Ko e heigoa e tau puhala ka taute e fakaakoaga ke fiafia mo e aoga?
5 Taute he Fakaakoaga: Ko e puhala ka taute aki e koe e fakaakoaga to fakavē ke he tau tuaga mo e takatakai he kaina leveki, ti lata ke hikihiki mo e fifili fakamitaki. Lata e matakainaga ka taute e fakaakoaga ke tamai ke loga e tohi ka fakatutala ki ai mo e lata ke oko ai ka oti e fakaakoaga. Liga mitaki foki ke tamai e tau lagaki matatohi lalahi ke lata mo e falu. Maeke ke totou e tau paratafa, talahau e tau hūhū, mo e maeke ke talahau e tau tali he puhala fa mahani ha tautolu. Ko lautolu kua makai mo e maeke, to liga uiina ke totou e tau paratafa po ke tau kupu Tohi Tapu. He fakaakoaga, kia makai ke fakatutala, atihake, mo e aga kapitiga. Ka fakaatā he takitaki, maeke a koe he falu magaaho ke fakakite e taha he tau vitiō he fakatokatokaaga ne atihake e tua ke he Tohi Tapu po ke fakamaama e tau fakaakoaga ke he taha tala pauaki he Tohi Tapu. Liga maeke ke kamata mo e fakaoti e fakaakoaga aki e liogi. Falu tagata fakailoa ne fakaaoga foki e tau lologo he Kautu.
6. Puhala fe ka liga fehagai ke he totokoaga?
6 Ka e kua ka totoko taha tagata ke he mena kua totou po ke talahau he fakaakoaga? Manamanatu fakamitaki ka tali e koe. (Kolo. 4:6) Liga fakakite age e koe e kupu Tohi Tapu kū ne tali fakamaaliali e manatu tupetupe haana. Ka nakai hagahaga mitaki ma haau ke taute pihia, ti lata ke fanogonogo ki a ia mo e pehē kua maeke ia koe ke fakatutala ke he matakupu ia mo ia ni ka oti e fakaakoaga.
7. Ko e heigoa haau ka taute kaeke kua taha e tagata i ai kua fai hūhū fakatagata po ke fiafia lahi?
7 He falu magaaho, liga talahau he tagata i ai e hūhū po ke kua manako ke iloa atu foki. Taha e matakainaga fifine ne fakaaoga e puhala nei: “Mitaki lahi e hūhū ia. Ka e ha ko e hūhū fakatagata a ia haau, mitaki ke fakatali to oti e totouaga ha tautolu. Ti maeke ia taua ke tutala tokoua ke he mena ia.” Fa maeke ke fakatokatoka ke taute e fakaako Tohi Tapu fakatagata mo e tagata kua fiafia he taha magaaho foki he matakavi kehe.
8. Lata e tau matakau fakaako Tohi Tapu mo e tau fakaakoaga takitaha ke totou fēfē?
8 Kua fa mitaki lahi ke taute he Tau Fakamoli ia ni e fakaakoaga he matakau he tau magaaho takitaha. Ko e ha tagata fakailoa ne kaufakalataha ki ai to maeke ke totou e tulā. Ka matutaki e fakaakoaga, ko e tagata fakailoa ne taute ai to liga totou ko e taha e liu aahi atu he tau magaaho takitaha ka taute e fakaakoaga mo e taha e fakaako Tohi Tapu he mahina. Ko e tau fakaakoaga Tohi Tapu ne kamata mo e tau tagata takitaha ne kua maeke ke maama mo e iloa, to totou ke he puhala fa mahani.
9, 10. Ko e heigoa e tau aga kua latatonu ma lautolu kua taute e gahua nei? Fakamaama.
9 Fakatumau ke Taute: Kua mitaki ke fakatoka e aho mo e tulā ma e matakau fakaako. Ko e tau tagata i ai mo e tau tagata gahua kua amanaki ke taute tumau e fakaakoaga ti kamata mo e oti he magaaho kotofa. (Mata. 5:37) Ko e mena ia, kua latatonu ke fakamooli, fakamakutu, mo e fakatokatoka. Fakakite mai he tau mena tutupu, kua mitaki lahi ke tokoua e tagata fakailoa lotomatala ke gahua tokoua ke taute e fakaakoaga he matakau. (Fakama. 4:9, 10) He tau fale lalahi, liga tokologa atu e tagata fakailoa ka fakaaoga.
10 Aoga foki e aga kapitiga mo e fiafia fakatagata. (Filipi 2:4) He ahiahi fakamua, fakaaoga taha magaaho ke feleveia mo e tau tagata oti kua fakalataha mai. Tohi hifo mo e lali ke ako manatu e tau higoa ha lautolu to hoko e fakaakoaga ka hau. Ka ko e falu tagata momotua ne nakai fiafia ka fakaaoga he taha tagata ne nakai iloa e lautolu e higoa fakamua ha lautolu. Ko e fakauka mo e fakaalofa hofihofi ka taute e tau tagata oti ke logona hifo e mafanatia mo e fakaaue.
11. Fakakite fēfē he tau matakainaga ne taute e fakaakoaga he matakau e fakalilifu ke he tau tagata gahua mo e tau magafaoa ha lautolu i ai?
11 Aoga foki ke fakakite e fakalilifu mo e totonu ke he tau tagata gahua mo e tau magafaoa he tau tagata i ai. Ka fakatū e fakaholoaga he fakaakoaga, kua pulotu ke nakai hiki e tulā po ke puhala ne taute ai ato fakatutala fakamua mo e takitaki. Falu magaaho, hūhū ke he takitaki ke he manatu haana kua fēfē e holoaga he fakaakoaga. Ka ahiahi mai e tau tagata he magafaoa he mogo ka taute e fakaakoaga, makaukau ke fakafeleveia a lautolu. Fakamaama ki a lautolu e kakano he fakaakoaga Tohi Tapu. Fakamafana age kua fiafia mooli a koe ke he tagata he magafaoa ha lautolu. Uiina a lautolu ke nonofo mo e fanogonogo ke he fakaakoaga.
12, 13. Talahau e tau mena tutupu ke fakamaama e aoga he fakamatala he tau kaina leveki fuakau.
12 Tau Fua Mitaki: Kua atihake e tau hokotaki he tau leveki faifano mo e tau fakapotopotoaga ne fua mai he puhala fakamatala nei. Taha he tau tuaga ia, ne kavi 20 ia lautolu ne ō ke he fakatutalaaga fakamua. Ko e fua, ne tokoono ia lautolu ne fakaako e Tohi Tapu. Taha ne hokotia ke papatiso. Ko e fakaakoaga he taha kaina foki ne omoomoi e fifine ne 85 e tau he moui ke fakalataha ke he fakapotopotoaga he matakavi ti fakakite e manako haana ke papatiso. He fifili e taha kaina leveki ke mutumutu hifo e tau matagahua—fakaoti e matakau fakaako he Tau Fakamoli a Iehova—ne gūgū e tau tagata i ai ke he takitaki! Fakahiku ai ne liu e fakaakoaga kamata, ti kavi ke 25 ke he 30 e tagata ne o atu ki ai.
13 Ko e fakaalofa ne fakakite e tautolu ke he tau tagata he tau kaina leveki ne lahi e lauiaaga mitaki ki a lautolu mo e falu foki. Ma e fakatai, fa mahani e tau tagata gahua ke nonofo ai mo e fakalataha atu ke he fakaakoaga. Ko e laliaga ha tautolu ke fakakite e fiafia ki a lautolu he tau kaina leveki ko e fakamatalaaga mitaki foki ke he matakavi. (1 Pete. 2:12) He oti e tala age e kakano he fakaakoaga, taha e tagata gahua ne pehē: “Ko e ha ne mule a mutolu? Mogo fe ka kamata a mutolu?” Taha takitaki foki ne tohi: “Kua fiafia lahi au ke omoomoi e matakau fakaako nei ke he ha fale leveki fuakau he matakavi. Na taute he Tau Fakamoli a Iehova e gahua nei ne nakai totogi ko e vala he fekafekauaga ha lautolu he matakavi.” Taha e kaina leveki i Hawaii ne foaki age ke he Tau Fakamoli a Iehova e Volunteer Service Award ne fakamaama ko e tau tagata gahua foaki noa kua “uho lahi mahaki” ki a lautolu he kaina ia.
14. Ko e ha kua manako a tautolu ke hokotia ke lagomatai a lautolu he tau kaina leveki?
14 Kua uiina e Iehova e tau fuakau ke fakaheke a ia. (Sala. 148:12, 13) Ko e uiina ia kua putoia a lautolu he tau kaina leveki. Fai kaina leveki nakai he matakavi ha mutolu ka aoga mai a lautolu ne fuakau he logona e tala mitaki? Ha ko e lagomatai he tau motua he matakavi mo e tau takitaki he tau kaina leveki, to maeke ia tautolu ke fakamatala fakamitaki ki a lautolu i ai. Ka manatu e tautolu a lautolu kua momotua, kua fifitaki e tautolu a Iehova.—Sala. 71:9, 18.