Ko Tautolu Hane Uulu Ai e Tau Kolo Malolō
1 Ne leva lahi tuai e fakaaoga e Satani e tau fakaakoaga pikopiko mo e fakahehē nukua fakapouli aki e tau loto mo e tau manamanatuaga he tau tagata tokologa. Ne fakaholofa e ia e tau fakaakoaga tuga e Tolu Taha, nakai mate e solu, mo e afi fakakikiveka. Ne fakatupu ki mua e ia e fakauaua na fai Tufuga, mo e tuahā ke he tonutika he Tohi Tapu. Ko e fakahakehake fakamatakau mo e fakamotu e falu fakapouliaga kelea lahi mahaki ke he maamaaga he kupu mooli. (2 Kori. 4:4) Maeke fēfē ia tautolu ke uulu e tau kolo malolō ia he tau taofiaga?—2 Kori. 10:4, 5.
2 Putoia e Tau Logonaaga: Ko e tau taofiaga fakalotu nukua leva e tapiki ki ai kua fa putoia e tau logonaaga hokulo he tagata. Ne tapiki e falu ke he tau taofiaga hehē tali mai he tau vahā ikiiki. Ke lagomatai a lautolu ia, kua lata a tautolu ke tutala ke he puhala ne fakakite e fakalilifu ke he tau manatu ha lautolu.—1 Pete. 3:15.
3 Maeke ia tautolu ke fakalilifu e tau tagata ia he fakaatā a lautolu ke fakamaama e mena ne talitonu mo e kakano ne talitonu ai a lautolu. (Iako. 1:19) Liga taofi malolō a lautolu, kua fai vala agaia he tagata ka moui he magaaho ka mate, ha kua manako lahi a lautolu ke liu kitia e tau fakahele ha lautolu kua mamate. Po ke liga fakamanatu e lautolu e tau aho okioki ha kua ofania e lautolu e tau magaaho pihia ke fakalataha mo e tau magafaoa ha lautolu. He fanogonogo ke he tau talahauaga ha lautolu ka maeke ai ke maama e tau logonaaga ha lautolu mo e lagomatai ke tali atu ke he puhala lauia mitaki.—Fakatai 16:23.
4 Fifitaki a Iesu: Ne foaki e Iesu e fakafifitakiaga mitaki lahi mahaki ma tautolu he magaaho ne tali e ia e tau hūhū he taha ako Fakatufono. Ne nakai tala age fakahako e Iesu e tau tali, neke liga fakaheu he tagata ha kua uho e tau taofiaga. Ka kua fakaaoga e Iesu e tau Tohiaga Tapu, he uiina e tagata ke talahau haana tau manatu, ti lagomatai ki a ia ke fakamaama ke he puhala he tau fakataiaga.—Luka 10:25-37.
5 Kua nakai maeke e tau taofiaga fakalotu pikopiko ke tatai mo e moolioli he Kupu he Atua. (Hepe. 4:12) He loto fakauka ke fakamaama e kupu mooli ke hokotia ke he loto, kua liga maeke ia tautolu ke lagomatai e tau tagata ke tiaki e fakaakoaga pikopiko ka e pipiki mau ke he kupu mooli ke toka noa ai a lautolu.—Ioane 8:32.