I lalo he pule he Atua, kaufakalataha mo e mafola e tau tufugatia oti

Ko e Ha kua Manako a Tautolu ke he Kautu he Atua?

He kamataaga he tau tagata, tokotaha ni e Pule ko e Tufuga ha tautolu ne higoa ko Iehova. Pule a ia he puhala fakaalofa. Taute e ia e kaina fulufuluola, ko e katene i Etena ke nonofo ai e tau tagata. Loga foki e mena kai ne taute e ia ma lautolu. Lafi ki ai, foaki e ia e gahua fai kakano ke taute he tau tagata. (Kenese 1:28, 29; 2:8, 15) Ane mai nonofo mau e tau tagata i lalo he pule fakaalofa he Atua to mafola e tau tagata oti.

Atamu ne totō e fua akau fakatapu ne age e Eva ki a ia. — Nakai talia he tau tagata fakamua e Atua ko e Pule ha laua

Fakakite he Tohi Tapu ko e agelu ne totoko ne fakahigoa he magaaho fakamui ko e Tiapolo ko Satani, ne paleko e tonuhia he Atua ke pule. Pehē a ia to fiafia lahi e tau tagata ka nakai fai takitakiaga mo e pule he Atua. Momoko ai, ko e tau matua fakamua ha tautolu ko Atamu mo Eva ne muitua ke he puhala ha Satani ti totoko ke he Atua.—Kenese 3:1-6; Fakakiteaga 12:9.

Ha kua nakai talia e Atamu mo Eva e Atua ko e Pule ha laua, ne galo e laua e kaina Parataiso mo e amaamanakiaga he moui mitaki katoatoa tukulagi. (Kenese 3:17-19) Ne lauia foki e tau fanau ha laua ne fanafanau ha ko e fifiliaga ha laua. Pehē e Tohi Tapu ha kua agahala a Atamu, ne “hoko mai ai e hala ke he lalolagi . . . ko e mate foki ha ko e hala.” (Roma 5:12) Ne takitaki e agahala ke he taha matematekelea foki: “Kua pule ai e taha tagata ke he taha, ke kelea ai e ia ni.” (Fakamatalaaga 8:9) Kakano ai, ka pule e tau tagata ki a lautolu ni to loga lahi e tau lekua.

KAMATA E PULE HE TAGATA

Nimarota ne tū fakaikaluga. Ko e tau tagata i tua ne tā he fale lahi. — Totoko a Nimarota ki a Iehova

Ko e tagata fakamua ne pule kua totoku he Tohi Tapu ko Nimarota. Totoko a ia ke he pule ha Iehova. Tali mai he vahā ha Nimarota, ne fakaaoga fakahehē he tau tagata malolō e pule ha lautolu. Kavi ke he 3,000 tau kua mole, ne tohi he Patuiki ko Solomona: “Kitiala foki e tau hihina mata ha lautolu ne pehia he favale, kua nakai ha ha i ai taha foki ke fakamafana a lautolu; ne lima malolo foki a lautolu ne favale kia lautolu.”—Fakamatalaaga 4:1.

Nakai kehe foki he vahā nei. He 2009, ne talahau he tohi he United Nations ko e pule kelea kua holo ki mua mo e onoono ki ai ko e “taha he tau tupumaiaga he tau mahani kelea oti kana he lalolagi.”

TAUTE TAHA MENA!

Lata e lalolagi ke mitaki e tau tagata ka pule mo e mitaki e fakatufono. Ko e mena ia ne mavehe mai he Tufuga ha tautolu!

Fakatino: Tau fua he fakatufono he tagata. 1. Fifine Asia ne nofo he kauhala puhalatū kiva ka e totō haana tama ne tagi. 2. Tagata taane motua ne gagao ha he mohega he fale gagao. 3. Tau kautau ne fakapāpā e tau fana he malētau. 4. Tau tagata totoko ne ita kua tauhea mo e totō he tau lapa fakailoa. 5. Fifine mo e haana tama ne tutū i fafo he kaina ha laua, kua malipi e hio he gutuhala he faahi mua. 6. Taone ne ahua mo e tau siminī mo e tau kave hila. — Kaumahala foki e tau fakatufono ne mitaki ke fakamafola e tau lekua lalahi he tau tagata

Fakatū tuai he Atua e Kautu, po ke fakatufono ka hukui e tau pule oti he tagata ti “to tumau tukulagi.” (Tanielu 2:44) Ko e Kautu hanei ne fa e liogi e tau tagata tokologa hagaao ki ai. (Mataio 6:9, 10) Ka e nakai pule tokotaha e Atua ke he Kautu nei. Kua fifili e ia e taha ne kua fitā e moui ko e tagata ke Pule. Ko hai ne fifili he Atua?