Kautū e Puhala ne Pule a Iehova!
‘Kua Pule a ia ne Mua Ue Atu ke he kautu he tau tagata.’—TANI. 4:17.
1, 2. Ko e heigoa falu kakano kua kaumahala e pule he tagata?
KUA kaumahala e pule he tagata! Ti mooli e mena ia. Ko e matapatu kakano ati kaumahala ai ha kua nakai ha ha he tau tagata e pulotu ke pule fakamitaki. Kua kitia maali pauaki e kaumahala he pule he tagata he vahā nei ha kua fakakite he tau pule tokologa kua ‘ofaofa e lautolu a lautolu ni, velevele koloa, hula noa, fakatokoluga, mahani kelea, nakai fai fakaalofa, nakai fia loto mafola, tauamuamu, nakai taofi e tau manako he tino, mahani favale, nakai loto ke he mitaki, afo tagata, mo e fakatokoluga.’—2 Timo. 3:2-4.
2 Ne tiaki he tau matua fakamua ha tautolu i tuai e puhala ne pule e Atua. He taute pihia, ne liga manatu a laua kua fifili a laua ke tū tokotaha. Ka kua muitua mooli a laua ke he puhala ne pule a Satani. Ono ia e meleniamu he kelea e pule he tagata—nukua fakaohooho malolō he “iki he lalolagi nai,” ko Satani—ati tamai a tautolu ke he tuaga kelea muitui he fakamauaga tuai he tagata. (Ioane 12:31) He tala hagaao ke he tuaga he tagata he vahā nei, The Oxford History of the Twentieth Century ne pehē kua nakai aoga ke “kumi e lalolagi mitaki katoatoa.” Ne fakamaama: “Kua nakai ni maeke ke moua, ka ko e laliaga ke taute ai ka takitaki atu ke he matematekelea lahi, pule okooko favale, mo e felakutaki matakutakuina.” Ko e talahauaga moolioli kua kaumahala e pule he tagata!
3. Ko e heigoa ka talahau e tautolu hagaao ke he puhala ka pule e Atua ane mai nakai agahala a Atamu mo Eva?
3 Ko e matematekelea mooli mogoia ha kua tiaki he tau matua fakamua ha tautolu e pule hokoia ne gahua—ko e pule he Atua! E, kua nakai iloa tonu e tautolu e puhala ka fakatokatoka e Iehova e puhala ka pule a ia ke he lalolagi ane mai fakatumau a Atamu mo Eva ke fakamooli ki a ia. Pete ia, kua mauokafua a tautolu ko e pule faka-Atua ne talia he tau tagata oti kana to kitia ai ha ko e fakaalofa mo e nakai fakamailoga tagata. (Gahua 10:34; 1 Ioa. 4:8) He mailoga e pulotu mua ue atu he Atua, maeke ia tautolu ke iloa foki ane mai fakatumau e tau tagata i lalo he pule a Iehova, to nakai tutupu e tau hehē ne taute e lautolu ne lalago e pule he tagata. Ko e pule-Atua, fakateokarasi, to kautū he “fakamakona e manako he tau mena momoui oti.” (Sala. 145:16) He fakakū, to eke ai mo pule mitaki katoatoa. (Teu. 32:4) Ko e matematekelea mooli ha kua tiaki ai he tau tagata!
4. Lahi fēfē e pule ne fakaatā ki a Satani?
4 Ka e mitaki agaia ke manatu, pete he fakaatā e Iehova e tau tagata ke pule ki a lautolu ni, ne nakai lagataha e fakahui e ia e tonuhia haana ke pule ke he tau mena momoui haana. Ne fakaohooho foki e patuiki malolō lahi ha Papelonia ke fakahiku ‘kua Pule a ia ne Mua Ue Atu ke he kautu he tau tagata.’ (Tani. 4:17) Ke he vahā loa, to fakatupu he Kautu he Atua e finagalo haana ke hoko ke he lalolagi. (Mata. 6:10) Mooli, he magaaho kū, ne fakaatā e Iehova a Satani ke eke mo “atua he lalolagi nai” ke foaki e tali mauokafua ke he tau matalekua ne fakalagā e ia ne totoko. (2 Kori. 4:4; 1 Ioa. 5:19) Ka e nakai maeke a Satani ke molea he mena ne fakaatā e Iehova. (2 Nofo. 20:6; fakatatai Iopu 1:11, 12; 2:3-6.) Mo e fai tagata tumau ne fifili ke mumuitua ke he Atua, pete kua nonofo a lautolu he lalolagi ne pule he Fī ne mua he Atua.
Pule he Atua ki Isaraela
5. Ko e heigoa e tukulele ne taute he tau Isaraela ke he Atua?
5 Mai he vahā ha Apelu ke hoko ke he vahā he tau tupuna, fai tagata fakamooli ne tapuaki ki a Iehova mo e omaoma ke he tau poakiaga haana. (Hepe. 11:4-22) He vahā ha Mose, ne taute e Iehova e maveheaga mo e hologa he tupuna ko Iakopo, ti eke a lautolu nei ko e motu ha Isaraela. He 1513 F.V.N., ne tukulele e tau Isaraela mo e tau fanau ha lautolu ki a Iehova ko e Pule ha lautolu, he pehē: “Ko e tau mena oti ne tala mai e Iehova, to eke ni e mautolu.”—Esoto 19:8.
6, 7. Fakamaama fēfē e pule he Atua ki Isaraela?
6 Kua fai kakano a Iehova he fifili e tau Isaraela ke eke mo tau tagata haana. (Totou Teutaronome 7:7, 8.) He fifiliaga nei kua lahi atu e mena ne putoia mai he tau puhala momoui he tau Isaraela. Ko e higoa he Atua mo e pule katoatoa ne putoia ai foki, ti kua mua atu e aoga. To eke a Isaraela mo fakamooli ko Iehova e Atua mooli tokotaha. (Isaia 43:10; 44:6-8) Ati pehē ai a Iehova ke he motu ia: “Ko e motu tapu ni a koe kia Iehova hau a Atua, kua fifili ai e Iehova a koe ke eke mo motu mana, ko e koloa uho ke mua ke he tau motu oti ni ke he fuga kelekele.”—Teu. 14:2.
7 Ne mailoga ai he puhala ne takitaki he Atua a Isaraela kua nakai mitaki katoatoa a lautolu. He magaaho taha, ne mitaki katoatoa e tau fakatufono haana ti fakaata e tau mahani he ha lautolu a Foaki. Ko e tau poakiaga a Iehova ne age ki a lautolu puhala ia Mose ne fakakite fakamaaliali e tapuina he Atua, haana fiafia ke he fakafili tonu, haana makai ke fakamagalo, mo e haana fakamanavalahi. Fakamui, he vahā a Iosua mo e atuhau haana, ne omaoma e motu ke he tau poakiaga a Iehova ti olioli ai e mafola mo e tau monuina fakaagaaga. (Iosua 24:21, 22, 31) Ko e magahala ia he matohiaga a Isaraela ne fakakite kua kautū e puhala ne pule a Iehova.
Fai Fakalagoaga e Pule he Tagata
8, 9. Ko e heigoa e ole nakai pulotu ne taute e Isaraela, ti ko e heigoa e tau fua?
8 He fai magaaho mogoia he mole, ne fuluhi kehe tumau e tau Isaraela mai he pule he Atua ti matematekelea he galo e puipuiaga haana. Fakahiku, puhala he perofeta ko Samuela, ne poaki a Isaraela ke moua e tagata ke patuiki. Ne tala age a Iehova ki a Samuela ke talia e ole ha lautolu. Ka e lafi atu e Iehova: “Kua nakai tiaki e lautolu a koe, ka kua tiaki e lautolu au, ke nakai eke au mo patuiki ha lautolu.” (1 Samu. 8:7) Pete he fakaatā e Iehova a Isaraela ke moua e tagata ke patuiki, ne hataki e ia a lautolu ko e pule he tagata ka patuiki to fai fakalagoaga lahi.—Totou 1 Samuela 8:9-18.
9 Ne fakakite he tau mena tutupu he fakamauaga tuai e mooli he hatakiaga a Iehova. He pule he tagata ne patuiki nukua kelea muitui e tau lekua ma Isaraela, mua atu ka nakai fakamooli e patuiki. He tokaloto e fakataiaga ia ha Isaraela, kua nakai ofo ai ha ko e tau tau loga ne haia e fakatufono i lalo he pule he tau tagata kua nakai iloa a Iehova, nukua kaumahala ke tamai e tau fua mitaki tukulagi. Mooli, ne talahau he falu politika kua fakamonuina he Atua e tau laliaga ha lautolu ke moua e mafola mo e haohao mitaki, ka e fakamonuina fēfē he Atua a lautolu ne nakai muitua ke he puhala ne pule a ia?—Sala. 2:10-12.
Ko e Motu Foou i Lalo he Pule he Atua
10. Ko e ha ne hukui a Isaraela ko e motu fifili he Atua?
10 Ne maaliali e nakai makai he motu ko Isaraela ke fekafekau fakamooli ki a Iehova. Fakahiku ai, tiaki e lautolu e Mesia ne kotofa he Atua, ti tiaki e Iehova a lautolu mo e amaamanaki ke hukui a lautolu aki e matakau he tau tagata ka fakatū e motu foou. Ko e fakahikuaga, he tau 33 V.N. ne kitia e kamataaga he fakapotopotoaga Kerisiano he tau tagata tapuaki ne fakauku ha Iehova. Ko e fakapotopotoaga ia, ko e motu foou i lalo hifo he takitakiaga ne pule e Iehova. Ne hagaao a Paulo ki ai ko e “Isaraela he Atua.”—Kala. 6:16.
11, 12. Ko e heigoa e tau tataiaga ke he puhala takitaki ha Isaraela mo “Isaraela he Atua”?
11 He motu a Isaraela he tino mo “Isaraela [foou] he Atua,” kua ha ha i ai e tau kehekeheaga mo e tau tataiaga. Nakai tuga a Isaraela i tuai, ne nakai fai tagata ne patuiki he fakapotopotoaga Kerisiano ti nakai lata ke foaki e tau poa manu ma e tau tagata agahala. Taha e mena ne tatai e motu a Isaraela mo e fakapotopotoaga Kerisiano ko e fakatokaaga he tau patu, po ke tau motua. (Esoto 19:3-8) Nakai pule e tau motua Kerisiano ia ke he fuifui. Ka kua leveki e lautolu e fakapotopotoaga mo e eketaha ke takitaki e tau gahua faka-Kerisiano. Ne fehagai fakaalofa a lautolu mo e tau tagata takitaha he fakapotopotoaga, he fakalilifu mo e taute fakamitaki a lautolu oti.—2 Kori. 1:24; 1 Pete. 5:2, 3.
12 He manamanatu fakahokulo ke he tau fakafetuiaga he Atua mo Isaraela, ko lautolu he “Isaraela he Atua” mo e ha lautolu a tau hoa he ‘tau mamoe kehe’ kua feaki e loto fakaaue lahi ki a Iehova mo e puhala kua pule a ia. (Ioane 10:16) Ma e fakatai, kua fakakite he fakamauaga tuai kua fakalagalaga lahi he tau tagata ne pule ha Isaraela e tau tagata ha lautolu ke he puhala mitaki po ke kelea. Kua fakamalolō he mena ia a lautolu ne takitaki ne ha ha ai ke he tau Kerisiano pete ne nakai ko e tau pule a lautolu tuga e tau patuiki i tuai, kua lata tumau a lautolu ke fakatoka e fifitakiaga mitaki he tua.—Hepe. 13:7.
Puhala kua Pule a Iehova he Vahā Nei
13. Ko e heigoa e lakaaga aoga lahi ne hokotia ki ai he 1914?
13 Kua fakapuloa he tau Kerisiano he vahā nei ke he lalolagi kua teitei fakaoti tuai e pule he tagata ke he falu tagata. He 1914, ne fakatū e Iehova e Kautu haana he lagi i lalo he Patuiki kotofa haana ko Iesu Keriso. He magaaho ia, kua tuku age e Ia ki a Iesu e pule ke fina atu mo e “kautu, to kautu ni a ia.” (Fakakite. 6:2) Ne tala age ke he Patuiki ne fakafoufou foou: “Kia pule a koe ki mua ha lautolu kua fai fi kia koe.” (Sala. 110:2) Momoko ai, ne fakaheu tumau e tau motu ke muitua ke he pule a Iehova. Ne fakatumau a lautolu ke gahua tuga ko e mena “nakai fai [Iehova].”—Sala. 14:1.
14, 15. (a) Pule fēfē e Kautu he Atua ki a tautolu he vahā nei, mo e mailoga ai e mena nei, ko e heigoa e tau hūhū kua lata ke hūhū hifo ki a tautolu? (e) Kitia fēfē foki e mua ue atu he pule he Atua he vahā nei?
14 Tokogahoa a lautolu ne fakauku ko e “Isaraela he Atua” ne momoui agaia, ti ko e tau matakainaga a Iesu, ne eke mo “tau fekau [po ke, tau hukui] a Keriso.” (2 Kori. 5:20) Ne kotofa a lautolu mo tau fekafekau fakamoli mo e loto matala ke leveki mo e foaki e tau mena kai fakaagaaga ma lautolu ne fakauku mo e moto tagata he tau Kerisiano, hane tupu lahi kua putoia ai mogonei e toko miliona ne amaamanaki ke momoui tukulagi ke he lalolagi. (Mata. 24:45-47; Fakakite. 7:9-15) Kua kitia e fakamonuinaaga a Iehova ke he fakatokaaga ia ke he maukoloa fakaagaaga hane olioli he tau tagata tapuaki mooli he vahā nei.
15 Igatia a tautolu mo e lata ke hūhū hifo: ‘Mailoga katoatoa nakai e au e tau matagahua kua lata ia au ke taute i loto he fakapotopotoaga Kerisiano? Kua lalago fakamitaki nakai e au e puhala ne pule a Iehova? Kua matalahi nakai au he eke mo tagata he Kautu a Iehova hane pule? Kua eketaha nakai au ke fakatumau ke tala age ke he falu hagaao ke he Kautu he Atua ke he mena kua maeke ia au?’ Ko e matakau, kua mumuitua fakamakai a tautolu ke he takitakiaga ne foaki mai he Kau Fakatufono mo e kaufakalataha mo e tau motua ne kotofa i loto he tau fakapotopotoaga. He tau puhala pihia, kua fakakite e tautolu e taliaaga he puhala ne pule e Atua. (Totou Heperu 13:17.) Ko e muitua fakamakai kua fua mai e kaufakalataha he lalolagi katoa nukua kehe lahi he lalolagi mavehevehe nei. Kua fua mai foki e mafola mo e tututonu mo e fakaheke ki a Iehova, he fakakite ai ko e puhala ne pule a ia kua mua ue atu.
Kautū e Pule a Iehova
16. Ko e heigoa e fifiliaga kua fehagai mo e tau tagata oti he vahā nei?
16 Kua tata lahi mai e magaaho ke fakamafola e tau matalekua ne tutupu i Etena. Ti, ko e magaaho anei ma e tau tagata ke taute e fifiliaga. Igatia e tagata mo e lata ke fifili to talia e ia e puhala ne pule a Iehova po ke taofi mau na ia ke he pule he tagata. Ko e kotofaaga ha tautolu ke lagomatai a lautolu ne mahani molū ke taute e fifiliaga hako. Nakai leva, i Amaketo to hukui tukulagi he puhala ne pule a Iehova e tau fakatufono ne fakavē he tagata i lalo he malolō a Satani. (Tani. 2:44; Fakakite. 16:16) To fakaotioti e pule he tagata, mo e to pule tukulagi e Kautu he Atua ke he lalolagi katoa. Ke he katoatoaaga he kupu, to kautū tukulagi e puhala ne pule a Iehova.—Totou Fakakiteaga 21:3-5.
17. Ko e heigoa e tau talahauaga mooli kua lagomatai a lautolu ne mahani molū ke taute e fifiliaga mitaki hagaao ke he tuaga pule?
17 Ko lautolu ne nakaila taute e fifiliaga mauokafua he talia a Iehova kua lata ke liogi he manamanatu ke he tau fua mitaki he puhala kua pule e Atua ka tamai ke he tau tagata. Nakai maeke he pule he tagata ke fakamafola e lekua he matahavala, putoia e fakamatakutaku. To utakehe he pule he Atua e tau mena kelea oti mai he lalolagi. (Sala. 37:1, 2, 9) Kua takitaki e pule he tagata ke he felakutaki hololoa, ka ko e pule he Atua to “fakahiku e ia e tau ato hoko ke he fakatulakiaga he lalolagi.” (Sala. 46:9) To liuaki mai foki mooli he pule he Atua e mafola ke he tau tagata mo e tau manu! (Isaia 11:6-9) Ko e mativa mo e hoge ko e tau vala tumau i lalo he pule he tagata, ka to utakehe he pule he Atua e tau mena ia. (Isaia 65:21) Pete foki kua ha ha he tau pule he tau tagata e tau foliaga mitaki lahi kua nakai maeke ke utakehe e gagao mo e mate, ka e i lalo he pule he Atua, ko lautolu ne fuakau mo e gagao to fiafia ke liliu foki fuata. (Iopu 33:25; Isaia 35:5, 6) Mooli, to eke e lalolagi mo parataiso mo e to ha ha ai e liu tu mai ha lautolu ne mamate.—Luka 23:43; Gahua 24:15.
18. Maeke fēfē a tautolu ke fakakite kua talitonu a tautolu ko e puhala ne pule a Iehova kua mitaki lahi mahaki?
18 E, to utakehe he pule he Atua e tau hagahaga kelea oti kana ne fakatupu e Satani he magaaho ne fakaohooho e ia e tau matua fakamua ha tautolu ke haga kehe mai he Tufuga ha laua. Ti manamanatu ki ai, hane fakatupu e Satani e hagahaga kelea kavi ke he 6,000 tau, ka e puhala he Atua ia Keriso, to utakehe e tau hagahaga kelea oti kana ia ato katoa e 1,000 tau! Ko e fakamooliaga nukua kautū kua mua ue atu ai e puhala ne pule e Atua! Ha ko e Tau Fakamoli he ha tautolu a Atua, kua talia e tautolu a ia ko e Pule ha tautolu. O mai ā ke fakakite he tau aho takitaha, ke he tau tulā takitaha, he tau momoui ha tautolu ko tautolu ko e tau tagata tapuaki a Iehova, ko e tau tagata he haana Kautu, mo e matalahi ke eke mo Tau Fakamoli haana. Ti fakaaoga ā e tautolu e tau magaaho oti ke tala age ke he ha tagata ka fanogonogo ko e puhala ne pule a Iehova kua mitaki lahi mahaki.
Hagaao ke he Pule he Atua, Ko e Heigoa ha Tautolu ne Fakaako Mai he Totou e . . .
• Heperu 13:17?
[Tau Fakatino he lau 29]
Tumau ni a Iehova ke he haana pule
[Fakatino he lau 31]
Fua mai e kaufakalatahaaga he lalolagi he muitua fakamakai ke he puhala ne pule a Iehova