To Kaumahala Mooli e Puhala ne Pule a Satani
“Nakai monuina a ia ne mahani kelea.”—FAKAMA. 8:13.
1. Ko e ha kua mafanatia e tala hagaao ke he fakafiliaga ka hoko ki a lautolu ne mahani kelea?
NAKAI LEVA po ke magaaho kū ni to fakafili a lautolu ne mahani kelea. To tali ni e lautolu e tau mena ne taute e lautolu. (Fakatai 5:22; Fakama. 8:12, 13) Ko e tala mafanatia a ia, mua atu ki a lautolu ne fiafia ke he tututonu mo e kua matematekelea he nakai fakafili tonu mo e ekefakakelea e lautolu ne mahani kelea. Mua atu ia lautolu ne mahani kelea ka fakafili ko e matua he mahani kelea, ko Satani ko e Tiapolo.—Ioane 8:44.
2. Kua lata he ha ke fai magaaho ke fakamafola e matalekua ne tupu i Etena?
2 I Etena, ko Satani, ne lahi mahaki e logonaaga fakatokoluga ti fakatupu e tau tagata ke tiaki e puhala ne pule a Iehova. Ko e fua, ne fakalataha e tau matua fakamua ha tautolu mo Satani he totoko e tonuhia a Iehova ke pule ati eke mo tau tagata agahala ki mua Haana. (Roma 5:12-14) Mooli, na iloa e Iehova e fakahikuaga ki a lautolu ha ko e nakai fakalilifu mo e totokoaga ha lautolu. Pete ia, kua lata ni ke fakakite fakamaali e fakahikuaga mooli ia ke he tau mena momoui lotomatala oti kana. Ti lata ke fai magaaho ke fakamafola e matalekua mo e fakakite fakamalolō e hepe lahi mahaki he tau tagata totoko.
3. Ko e heigoa e tuaga ha tautolu ke he tau fakatufono he tagata?
3 Ha kua tiaki he tau tagata e takitakiaga ha Iehova, ti kua fakatū ni e lautolu ha lautolu a tau puhala he fakatufono. He tohi e aposetolo ko Paulo ke he tau matakainaga talitonu i Roma, ne tutala hagaao ke he tau fakatufono ia he tagata ko e “tau tui ne mua.” He vahā a Paulo, ko e tau tui ne mua kua matapatu ke he fakatufono ha Roma i lalo he Pule Atu Motu ko Nero, ne pule mai he 54-68 V.N. Ne talahau e Paulo ko e tau tui ne mua ia “ha ha i ai . . . ainei, kua kotofa he Atua a lautolu.” (Totou Roma 13:1, 2.) Kakano kia e mena ia kua lalago e Paulo e pule he tagata ke mua atu ke he puhala pule he Atua? Nakai pihia. Ka e talahau e ia ka fakaatā e Iehova e pule he tagata, kua lata he tau Kerisiano ke fakalilifu e “kotofaaga he Atua” ti talia e tau tagata ia ne pule.
Ko e Puhala kua Takitaki ke he Matematekelea
4. Fakamaama e kakano to kaumahala mooli e pule he tagata.
4 Ka e kaumahala agaia e pule he tagata ne fakaohooho e Satani. Ko e ha? Taha e mena, ha kua nakai fakavē ai ke he iloilo po ke, pulotu faka-Atua. Ko Iehova ni ne ha ha ai e pulotu mitaki katoatoa. Ti ko ia hokoia ne maeke ke takitaki fakamitaki e tau puhala pule ka kautū. (Iere. 8:9; Roma 16:27) Nakai tuga e tau tagata, ne fa fakaako mai he tau kamatamata mo e tau hehē, kua iloa tumau e Iehova e puhala mitaki lahi mahaki ke fakagahua. Ko e ha fakatokaaga fakatufono ne nakai muitua ke he takitakiaga Haana to kaumahala hokoia. Ma e kakano ia ni—he nakai talahau e tau manatu kelea ne putoia ai—ko e taha puhala foki he pule a Satani nukua mai he pule he tagata to kaumahala mooli tali mai he kamataaga.
5, 6. Ko e heigoa ne takitaki mooli a Satani ke he puhala ne totoko ki a Iehova?
5 Ko e tagata lotomatala kua fa fakamamao mai he taute e laliaga ka takitaki atu ke he kaumahala mooli. Kaeke ke eketaha a ia ke taute haana a laliaga, to fakaohooho a ia ke mailoga e hepe haana. Kua fakamooli lagaloga he tau mena tutupu i tuai e nakai aoga ke totoko ke he Tufuga malolō ue atu. (Totou Tau Fakatai 21:30.) Ka ko Satani ne fakapouli he logonaaga fakatokoluga mo e fakaikaluga, ne haga kehe a ia mai ia Iehova. Ti fifili pauaki he Tiapolo e puhala ka hokotia ai ke he matematekelea.
6 Ko e aga fakatokoluga a Satani kua fakaata fakamui he patuiki ha Papelonia ne talahau ke hula: “To hake au ke he lagi, to fakatu e au haku a nofoaiki ki luga he tau fetu he Atua, to nofo foki au ke he mouga he fakapotopotoaga ke he tau fahi ki tokelau. To hake au ki luga he tau mena tokoluga ki luga he tau aolagi; to eke au ke tuga hana ne Mua ue atu.” (Isaia 14:13-15) Ne kaumahala e laliaga goagoa he patuiki ia, ti nakai monuina e fakahikuaga he kautu ha Papelonia. Nakai leva to kaumahala katoatoa pihia foki a Satani mo e lalolagi haana.
Ko e Ha ne Fakaatā?
7, 8. Ko e heigoa e falu fua mitaki mai he fai magaaho kua fakaatā e Iehova e mahani kelea?
7 Liga manatu e falu ke he kakano ne nakai taofi e Iehova e tau tagata mai he kau mo Satani mo e muitua ke he taha pulega he takitakiaga ka kaumahala mooli. Ha ko e Atua Malolō Ue Atu, maeke mooli a ia ke taute pihia. (Esoto 6:3) Ka e nakai taute pihia e ia. Ne fakakite he pulotu haana ko e taofi fakakū mai he fakatauhele ke he totokoaga he tagata to mitaki lahi mahaki he magaaho fakamui. Fakahiku ai, to kautū a Iehova ko e Pule tututonu mo e fakaalofa, mo e to aoga e tau tagata tua fakamooli mai he fifiliaga he Atua.
8 To nakai hoko mooli e matematekelea ke he magafaoa he tagata ane mai tiaki he tau tagata e tau lagatau a Satani mo e fakaheu ke tū kehe mai he pule he Atua! Ka ko e fifiliaga agaia a Iehova ke fakaatā e tau tagata ke fai magaaho ke pule ki a lautolu ni ne fai fua mitaki. Kua nava lahi e tau tagata takitokotaha ne loto hakohako ke he pulotu he fanogonogo ke he Atua mo e falanaki ki a ia. Mai he tau tau loga, kua fakataitai he tau tagata e tau vahega fakatufono kehekehe, ka e nakai fai ai ne latatonu mooli. Ko e mena ia ne eke mo fakamalolōaga ke he tau tagata tapuaki he Atua ke he mauokafua ha lautolu ko e puhala ne pule a Iehova kua mitaki lahi mahaki. Mooli, he fakaatā e Iehova e pule kelea a Satani ati fua mai e tau mena uka ke he tau tagata, putoia a lautolu ne tapuaki tua fakamooli ke he Atua. Ka ko e fakaatā fakakū agaia he mahani kelea kua fua mai foki e tau fua mitaki ma lautolu nei ne tapuaki tua fakamooli.
Ko e Totokoaga ne Eke ke Fakalilifu ki a Iehova
9, 10. Fakamaama e puhala he pule a Satani ne fua mai e fakalilifu ki a Iehova.
9 He fakaatā e tau tagata ke fakaohooho e Satani mo e ke pule ki a lautolu ni kua nakai ekefakakelea e puhala ne pule a Iehova. Nakai pihia mooli! Kua fakakite he tau mena tutupu i tuai e hako he talahauaga a Ieremia ne omoomoi he agaaga, kua nakai maeke he tau tagata ke pule ki a lautolu. (Totou Ieremia 10:23.) Lafi ki ai, kua foaki he totokoaga a Satani ki a Iehova e magaaho ke fakakite e tau mahani mitaki lahi Haana ke he puhala maaliali. Pihia fefe?
10 He kaumahala lahi mahaki he pule a Satani, kua kitia maaliali lahi mahaki e tau mahani mitaki katoatoa a Iehova ne liga nakaila pihia. He puhala nei, kua matalahi a ia ke he tau fofoga ha lautolu ne fakaalofa ki a ia. E, pete kua fakaliga kehe ai, ko e puhala pule a Satani kua eke mooli ke fakalilifu e Atua. Kua fakamaama ai e puhala mua ue atu he fehagai a Iehova mo e paleko nei ke he pule katoatoa haana. Ke fakatai e talahauaga mooli ia, kia fakatutala fakakū a tautolu ke he falu mahani a Iehova mo e kitia e puhala ne omoi he pule kelea a Satani a Iehova ke fakakite e tau mahani nei ke he falu puhala foki.
11. Kua fakakite fēfē e fakaalofa ha Iehova?
11 Fakaalofa. Kua tala mai e tau Tohiaga Tapu ki a tautolu “ko e Atua ko e fakaalofa a ia.” (1 Ioa. 4:8) Ko e tufugatiaaga he tau tagata ke he kamataaga, ko e fakakiteaga he fakaalofa he Atua. Lafi ki ai, ko e puhala matakutakuina mo e homo ue atu he tufugaaga ha tautolu kua fakakite mooli e fakaalofa he Atua. Ne foaki fakaalofa foki e Iehova ma e tau tagata e kaina fulufuluola ne ha ha ai e tau mena oti kana kua lata ma e fiafia ha lautolu. (Kene. 1:29-31; 2:8, 9; Sala. 139:14-16) Ka ko e magaaho ne tupu e mahani kelea ke he magafaoa he tagata, ne fakakite e Iehova e fakaalofa haana ke he tau puhala foou. Fēfē? Ne fatiaki he aposetolo ko Ioane a Iesu he pehē: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” (Ioane 3:16) Fai puhala foki kia ne mua atu kua maeke he Atua ke fakakite e fakaalofa haana ke he tau tagata he fakafano mai e Tama fuataha haana ke he lalolagi ke maeke ke fakatoka noa e tau tagata agahala? (Ioane 15:13) Ko e fakakiteaga lahi nei he fakaalofa kua eke foki mo fifitakiaga ke he tau tagata, he foaki ki a lautolu e magaaho ke fakaata e fakaalofa foaki noa he Atua he tau momoui ha lautolu he tau aho takitaha, tuga ne taute e Iesu.—Ioane 17:25, 26.
12. Ko e puhala fe ne fakakite e malolō a Iehova?
12 Malolō. Ko e “Atua, ko e Malolo ue Atu” hokoia, ne maeke ke tufuga e tagata. (Fakakite. 11:17, NW; Sala. 36:9) He magaaho ne fanau mai, ne kamata e tagata tuga e laupepa ne nakai fai mena ne tohi ai. He magaho ne mate, nukua fakapuke e ia e laupepa ia aki e tau fifiliaga, tau gahua, mo e tau mena tutupu he moui ne fakahakohako aki a ia mo e aga haana. Kua maeke e tau vala tala ia ke fakamau he manamanatuaga a Iehova. He magaaho kotofa, kua maeke ia Iehova ke liu fakamoui e tagata, katoa mo e fifitakiaga he moui kehe ue atu haana. (Ioane 5:28, 29) Pete ne nakai ko e finagalo fakamua he Atua ma e tau tagata, kua foaki he mate ki a Iehova e magaaho ke fakakite na maeke he malolō Haana ke fakaliu tū mai a lautolu he tukuaga. Mooli ai, ko Iehova ko e “Atua, ko e Malolo ue Atu.”
13. Eke fēfē e poa a Iesu mo fakakiteaga he fakafili tonu mitaki katoatoa a Iehova?
13 Fakafili Tonu. Nakai pikopiko a Iehova; ti nakai taute e ia e nakai fakafili tonu. (Teu. 32:4; Tito 1:2) Ne taofi mau a ia ke he tau tuaga mitaki ue atu he mahani fakamooli mo e fakafili tonu, pete he tuga kua uka ki a ia ni. (Roma 8:32) Kua liga mamahi lahi a Iehova ke kitia e Tama fakahele haana kua mate he akau fakakikiveka ke tuga ko e tagata vagahau kelea nakai fakamooli a Iesu! Ka e mai he fakaalofa ma e tau tagata nakai mitaki katoatoa, ne makai a Iehova ke fakaatā e mena mamahi lahi nei ke tupu ke maeke ke taofi mau haana a tuaga mitaki katoatoa he fakafili tonu. (Totou Roma 5:18-21.) Ko e lalolagi ne pukenamo he nakai fakafili tonu kua foaki ki a Iehova e magaaho ke fakakite a ia ko e mua ue atu he fakafili tonu.
14, 15. Ko e heigoa falu puhala ne kitia e pulotu mo e fakauka mua ue atu a Iehova?
14 Pulotu. He nakai leva e agahala a Atamu mo Eva, ne fakakite e Iehova e puhala ke utakehe e tau lauiaaga kelea oti kana ne fakatupu he totokoaga ha laua. (Kene. 3:15) Ko e tauteaga mafiti ia, mo e fakakite fakahaga e tau vala tala takitaha he finagalo nei ke he tau fekafekau haana, ne kitia maali e pulotu a Iehova. (Roma 11:33) Nakai fai mena ke taofi e lotomatala he Atua ke kautū he fakamafola e tau lekua. He lalolagi ne kitia ai e mahani feuaki, felakutaki, nakai totonu, nakai omaoma, nakai fakaalofa noa, nakai fakaalofa fakaigati, mo e fakatupua, ha ha ia Iehova e magaaho lahi ke fakakite ke he tau mena momoui haana e pulotu mooli. Ko e tutaki ko Iakopo ne pehē: “Ko e [“pulotu,” NW] mai luga, kua fakamua hana a mea, ti mafola, ti totonu, ti fulumokoi, kua puke ke he fakaalofa mo e tau fua mitaki, nakai fakaalofa fakaigati, nakai fakatupua.”—Iako. 3:17.
15 Fakauka mo e Fakamanavalahi. Ko e tau mahani a Iehova he fakauka mo e fakamanavalahi to uka lahi ke kitia maaliali ane mai kua nakai lata a ia ke fehagai mo e tau tagata nakai mitaki katoatoa, tau agahala, mo e tau kūkū he tagata. Ko e makai ha Iehova ke taute pihia ke he tau afe tau, ne fakakite kua ha ha ia ia e tau mahani homo ue atu nei ke he puhala katoatoa, ti ko e kakano ia ne lata ia tautolu ke fakaaue lahi. Ne talahau fakatonu he aposetolo ko Peteru kua lata ia tautolu ke ‘manatu e fakauka he Iki ha tautolu, ko e fakamouiaga haia.’—2 Pete. 3:9, 15.
16. Ko e ha e fakamakai ha Iehova ke fakamagalo kua fakatupu e olioli lahi?
16 Fakamakai ke Fakamagalo. Ko e tau tagata agahala oti a tautolu, ti ko e tau mena loga kua hehē ai a tautolu oti. (Iako. 3:2; 1 Ioa. 1:8, 9) Lata mooli ia tautolu ke loto fakaaue ha kua fakamakai a Iehova ke fakamagalo “fakalahi mai”! (Isaia 55:7) Manamanatu foki ke he talahauaga mooli nei: Ha kua fanau mai ko e tau tagata agahala nakai mitaki katoatoa, ko tautolu he tuaga ke logona hifo e olioli lahi mahaki he magaaho ka fakamagalo he Atua e tau hepehepe ha tautolu. (Sala. 51:5, 9, 17) He logona hifo he tagata e aga mafanatia ia ha Iehova kua atihake e fakaalofa ha tautolu ki a ia mo e fakamalolō a tautolu ke muitua e fifitakiaga haana ke he tau fakafehagai ha tautolu mo e falu.—Totou Kolose 3:13.
Kakano ne Gagao e Lalolagi
17, 18. Ke he tau puhala fe kua kaumahala e puhala ne pule a Satani?
17 Ko e fakatokaaga he lalolagi katoa a Satani—ko e fua he puhala ne pule a ia—ne kaumahala tumau hokoia tali mai he tau tau loga. He 1991, ko e nusipepa The European ne tohi: “Kua gagao kia e lalolagi? E mooli, ka e . . . nakai [ko e] matagahua he Atua—ko e tatalu he lalolagi kua fakatupu ni he tau tagata i ai.” Mooli ha ia! He fakaohooho e Satani, ne fifili he tau matua fakamua ha tautolu e pule he tagata ka e nakai ko e ha Iehova. Ati fakatoka e laua e puhala ke pule ka hokotia ni ke he kaumahala. Ko e mamahi mo e matematekelea ne lauia e tau tagata he lalolagi katoa ko e tau kitiaaga ko e pule he tagata kua lauia he gagao matakutakuina.
18 Ko e puhala he pule a Satani kua fakaohooho e mahani lotokai. Pete ia, to nakai maeke e mahani lotokai ke kautū ke he fakaalofa, ko e fakavēaga he puhala ne pule a Iehova. Kua kaumahala e puhala he pule a Satani ke tamai e mauokafua, fiafia, po ke haohao mitaki. Kua kautū tuai e puhala he pule a Iehova! Fai fakamooliaga nakai e mena ia he vahā nei ha tautolu? E, to kitia e tautolu he vala tala ka mui mai.
Ko e Heigoa ne Fakaako e Tautolu ke he Tuaga Pule Mai he Totou e . . .
• Roma 13:1, 2?
• Kolose 3:13?
[Tau Fakatino he lau 25]
Nakai fua mitaki e tau tagata ha ko e pule a Satani
[Credit Lines]
U.S. Army photo
WHO photo by P. Almasy
[Fakatino he lau 26]
Hokotia e malolō a Iehova ke fakaliu tu mai a lautolu he tukuaga
[Fakatino he lau 27]
Kitia e fakaalofa mo e fakafili tonu a Iehova he poa e Tama haana