Fakaaoga e Tau Aho Takitaha he Moui Haau ke Fakaheke e Atua

“KIA logona e au hāu a fakaalofa [totonu] ke he mogoho pogipogi,” he liogi he salamo ko Tavita ki a Iehova. “Kia fakakite mai e puhala ke fano ai au.” (Sala. 143:8) Ka ala a koe mo e fakaaue ki a Iehova ma e aho foou he moui, ke tuga a Tavita, olelalo nakai a koe ki a Iehova ke takitaki a koe he taute e tau fifiliaga mo e taute e mena kua mitaki lahi mahaki? Nakai noa kua taute pihia e koe.

Ko e tau fekafekau tukulele a Iehova, “po ke kai mena a [tautolu], po ke inu a [tautolu], po ke eke e [tautolu] taha mena,” kia fakamakamaka a tautolu ke ‘eke e tau mena oti kana ke fakaheke e Atua.’ (1 Kori. 10:31) Kua mailoga e tautolu ko e puhala kua momoui a tautolu he tau aho takitaha to maeke ke fakaheke po ke nakai fakaheke a Iehova. Manatu foki e tautolu kua talahau he Kupu he Atua ko Satani ne hokotaki e tau matakainaga he Keriso—ti pihia mo e tau fekafekau oti he Atua he lalolagi—ke he “aho mo e po.” (Fakakite. 12:10) Ko e mena ia, kua fifili a tautolu ke foaki e tali ke he tau hokotaki pikopiko a Satani mo e fakafiafia e loto a Iehova he fekafekau tapu ke he ha tautolu a Matua he lagi ke he “aho mo e po.”—Fakakite. 7:15; Fakatai 27:11.

Kia fakatutala fakakū la tautolu ke he ua e puhala aoga ke maeke ia tautolu he tau aho takitaha ke fakaaoga e tau momoui ha tautolu ke fakaheke e Atua. Ko e mena fakamua kua putoia ai ke hako e tau mena ha tautolu ka tuku fakamua mo e mena ke uaaki ko e manamanatu ke he falu.

Momoui Fakatatau ke he Maveheaga ha Tautolu

He tukulele e tau momoui ha tautolu ki a Iehova, ne fakakite e tautolu e tau manako ha tautolu he tau loto ke fekafekau ki a ia. Kua mavehe foki a tautolu ki a Iehova to o fano a tautolu ke he haana tau puhala ke he “taha aho mo e taha aho”—e, tukulagi. (Sala. 61:5, 8) Ti maeke fēfē ia tautolu ke momoui fakatatau ke he maveheaga ia? Fakakite fēfē e tautolu e fakaalofa loto katoa ha tautolu ki a Iehova he tau aho takitaha?

Kua fakakite fakamaali he Kupu he Atua e tau matagahua kua amanaki a Iehova ke taute e tautolu. (Teu. 10:12, 13) Loga ne tohi he puha ne mataulu “Tau Matagahua ne Foaki he Atua,” he lau 22. Ko e tau kotofaaga oti nei na foaki mai he Atua ti aoga lahi. Fifili fēfē e tautolu ha e fe e kotofaaga ka tuku fakamua ka ua po ke loga atu e kotofaaga kua lata ke taute e tautolu he magaaho taha?

Kua tuku fakamua e tautolu e fekafekau tapu ha tautolu, ne putoia e fakaako ke he Tohi Tapu, liogi, tau feleveiaaga Kerisiano, mo e gahua he fonua. (Mata. 6:33; Ioane 4:34; 1 Pete. 2:9) Ka e nakai fakaaoga e aho katoa ha tautolu ma e tau matagahua fakaagaaga. Kua putoia ai foki e gahua tupe, aoga, mo e tau gahua loga he kaina. Pete ia, kua eketaha a tautolu ke fakatokatoka e gahua tupe mo e falu matagahua ke he puhala ke nakai tauhele ai e fekafekau tapu ha tautolu, tuga e fakalataha ke he tau feleveiaaga Kerisiano. Ma e fakatai, ka pulega ma e fenoga okioki, kia mailoga ke nakai fakatonoa e tautolu e ahiahi mai he leveki takaiaga, aho toloaga pauaki, toloaga he takaiaga, po ke fonoaga faahimotu. He falu magaaho, liga maeke a tautolu ke lalafi falu matagahua ha tautolu. Tuga anei, maeke ia tautolu ke taute e fakameā he Fale he Kautu mo matagahua he magafaoa po ke fakaaoga e magaaho okioki kai laā he gahuaaga po ke aoga ke fakamatala ke he tau tagata gahua auloa po ke tau kapitiga aoga. Mooli, he ha magaaho ka lata ia tautolu ke taute e fifiliaga he tau momoui ha tautolu—tuga e kumi gahua, fifili e aoga, po ke fifili e tau kapitiga—kua manako a tautolu ke fakaatā e tau fifiliaga ha tautolu ke fakaohooho he mena ne mua ue atu ne tuku fakamua he ha tautolu a moui—ko e tapuaki kia Iehova, ko e Matua fakaalofa ha tautolu.—Fakama. 12:13.

Fakakite e Manamanatu ke he Falu

Manako a Iehova ki a tautolu ke manamanatu ke he falu mo e taute e mitaki ki a lautolu. He taha faahi kua fakatupu e Satani e mahani lotokai. Kua pukenamo e lalolagi haana he tau tagata ne ‘ofaofa a lautolu ni’ mo e “manako lahi ke he tau mena ke fiafia ki ai” ti pihia mo lautolu hane ‘gana e tau mena ke lata mo e tino.’ (2 Timo. 3:1-5; Kala. 6:8) Tokologa ne nakai manamanatu lahi ke he puhala ne lauia e falu he tau mena ne taute e lautolu. Kua kitia mooli e “tau gahua he tino” he tau matakavi oti.—Kala. 5:19-21.

Kehe mooli e aga ha lautolu ne fakaohooho he agaaga tapu a Iehova, he fakakite e fakaalofa, totonu, mo e mitaki he tau fehagaiaga ha lautolu mo e falu! (Kala. 5:22) Kua tala mai he Kupu he Atua ki a tautolu ke hagaaki ke he tau manako he falu ka e nakai ke he ha tautolu ni. Ko e mena ia, kia fakakite e tautolu e fiafia mooli ke he falu, ka e fakaeneene ke nakai ohonoa ke he tau mena fakatagata. (1 Kori. 10:24, 33; Filipi 2:3, 4; 1 Pete. 4:15) Kua manamanatu pauaki a tautolu ke he tau matakainaga fakaagaaga. Kua eketaha foki a tautolu ke lagomatai e tau tagata nakai tua. (Kala. 6:10) Maeke nakai a koe ke kumi puhala he aho nei ke fakakite e mahani totonu ke he tagata ne feleveia mo koe?—Kikite e puha “Fakakite e Manamanatu ki a Lautolu,” he lau 23.

Kua nakai fakakaupā ni e fakakite e manamanatu ke he falu magaaho uho po ke tuaga pauaki. (Kala. 6:2; Efeso 5:2; 1 Tesa. 4:9, 10) Ka e lali a tautolu he tau aho oti ke mataala ke he tau tuaga he falu mo e mautali ke foaki e lagomatai ka lata, pete ko e taute pihia kua liga nakai felauaki mo tautolu. Manako a tautolu ke fakamokoi ke he tau mena kua maeke ia tautolu—ha tautolu a magaaho, tau koloa he tino, mena iloa, mo e pulotu. Ha ha ia tautolu e maveheaga a Iehova, ka fakamokoi a tautolu ke he falu, to fakamokoi a Ia ki a tautolu.—Fakatai 11:25; Luka 6:38.

Fekafekauaga Tapu he “Aho mo e Po”

Maeke mooli nakai ke foaki e fekafekauaga tapu ki a Iehova he “aho mo e po”? E, he fakatumau mo e fakamakamaka ke he tau faahi oti he tapuakiaga ha tautolu. (Gahua 20:31) Maeke ia tautolu ke fakapuke e tau momoui ha tautolu ke he fekafekauaga tapu he totou mo e manamanatu fakahokulo ke he Kupu he Atua he tau aho oti, he liogi nakai noa, he eketaha ke fakalataha ke he tau feleveiaaga takitaha, mo e fakaaoga e tau magaaho oti ke fakamatala.—Sala. 1:2; Luka 2:37; Gahua 4:20; 1 Tesa. 3:10; 5:17.

Kua foaki nakai e tautolu takitokotaha e fekafekauaga tapu ki a Iehova? Ka pihia, ko e manako ha tautolu ke fakafiafia a ia mo e foaki e tali ke he tau hokotaki a Satani, to kitia ke he tau faahi oti he tau momoui ha tautolu he tau aho takitaha. Kua eketaha a tautolu ke fakaheke a Iehova ke he tau mena oti kua taute e tautolu pete ne tuaga kua ha ha ai a tautolu. Kua fakaatā e tautolu e tau matapatu fakaakoaga haana ke hufia ke he tau kupu mo e tau mahani ha tautolu mo e ke takitaki a tautolu he taute e tau fifiliaga. Fakakite e tautolu e loto fakaaue ha tautolu ke he leveki mo e lalago fakaalofa haana he mauokafua katoatoa ai ki a ia mo e fakaaoga e malolō ha tautolu ke he fekafekauaga haana. Ti talia e tautolu e fakatonuaga mo e akonakiaga haana ka nakai hokotia a tautolu ke he tau tuaga haana ha kua nakai mitaki katoatoa a tautolu.—Sala. 32:5; 119:97; Fakatai 3:25, 26; Kolo. 3:17; Hepe. 6:11, 12.

Kia matutaki a tautolu ke momoui he tau aho takitaha ke fakaheke e Atua. He taute pihia, to moua e tautolu e okiokiaga ma e tau tino ha tautolu mo e to olioli tukulagi e tautolu e levekiaga fakaalofa he ha tautolu a Matua he lagi.—Mata. 11:29; Fakakite. 7:16, 17.

[Puha/Fakatino he lau 22]

Tau Matagahua ne Foaki he Atua

• Liogi tumau.—Roma 12:12.

• Totou mo e fakaako e Tohi Tapu, fakagahua fakatagata.—Sala. 1:2; 1 Timo. 4:15.

• Tapuaki ki a Iehova he fakapotopotoaga.—Sala. 35:18; Hepe. 10:24, 25.

• Foaki fakatino, fakaagaaga, mo e manamanatuaga ke he tau tagata he magafaoa ha tautolu.—1 Timo. 5:8.

• Fakamatala e tala mitaki he Kautu, mo e taute tutaki.—Mata. 24:14; 28:19, 20.

• Leveki e malolō tino, fakaagaaga, mo e logonaaga ha tautolu, putoia e fakatokatoka ma e fakafiafia atihake.—Mare. 6:31; 2 Kori. 7:1; 1 Timo. 4:8, 16.

• Taute e tau matagahua he fakapotopotoaga.—Gahua 20:28; 1 Timo. 3:1.

• Leveki ha tautolu a tau kaina mo e Fale he Kautu.—1 Kori. 10:32.

[Puha/Fakatino he lau 23]

Fakakite e Manamanatu ki a Lautolu

• Matakainaga kua motua e tino.—Levi. 19:32.

• Tagata ne matematekelea he gagao e tino po ke logonaaga.—Fakatai 14:21.

• Ko e tagata he fakapotopotoaga ne manako mafiti ke he mena ka maeke ia koe ke foaki.—Roma 12:13.

• Ko e tagata he magafaoa tata haau.—1 Timo. 5:4, 8.

• Ko e matakainaga fakaagaaga ne mate e hoa mau.—1 Timo. 5:9.

• Ko e motua gahua malolō he fakapotopotoaga haau.—1 Tesa. 5:12, 13; 1 Timo. 5:17.