Tau Matakainaga Taane—Gana ke he Agaga ti Foli Atu!

“Ko ia kua gana e tau mena ke lata mo e [a]gaga, to helehele mai ai e ia ke he [a]gaga e moui tukulagi.”—KALA. 6:8.

1, 2. Hane fakamooli fēfē e Mataio 9:37, 38, ti ko e fua, ko e heigoa e manako he tau fakapotopotoaga?

HANE kitia mata mooli e koe e tau mena tutupu ne fakamau mai i tuai! Ko e gahua ne talahau e Iesu Keriso kua tupu mafiti lahi. “Kua loga e tau saito ke helehele, ka ko e tau tagata gahua, kua tokogaogao,” he talahau e Iesu. “Ko e mena ia, kia olelalo atu ai a mutolu ke he Iki hana e tau saito ke helehele, kia fakafano mai e ia e falu ke gahua ke he tau saito hana ke helehele.” (Mata. 9:37, 38) Kua tali e Iehova ko e Atua e tau liogi pihia he puhala ofoofogia lahi. Ke he tau he fekafekauaga he 2009, ko e numera he tau fakapotopotoaga he Tau Fakamoli a Iehova he lalolagi katoa ne malikiti he 2,031 ke hoko atu ke he 105,298. He evalesi, ne 757 e tagata ne papatiso he tau aho takitaha!

² Ko e tupuaga pihia ati manako lahi ma e tau matakainaga taane kua latatonu ke takitaki he fakaako atu mo e leveki e tau fakapotopotoaga. (Efeso 4:11) Ke he tau tau loga, ne fakatū e Iehova e tau tagata taane kua latatonu ke leveki e tau manako he tau mamoe haana, ti mauokafua a tautolu to matutaki a ia ke taute pihia. Ko e fakamauaga he perofetaaga ia Mika 5:5 ne fakamafana ki a tautolu, ke he tau aho fakamui nei, to ha ha he tau tagata ha Iehova “tokofitu e leveki mamoe” mo e “tokovalu e iki ne mua,” ka hukui e numera lahi mahaki he tau tagata taane lotomatala ke taki a lautolu.

3. Fakamaama e kakano ke ‘gana e tau mena ke lata mo e agaga.’

³ Kaeke ko e matakainaga taane Kerisiano a koe kua papatiso, ko e heigoa ka lagomatai a koe ke manako ke foli atu ma e tau kotofaaga? Ko e uho manatu kua maeke ia koe ke ‘gana e tau mena ke lata mo e agaga.’ (Kala. 6:8) He taute pihia kua putoia e moui nukua fakaatā e agaaga tapu he Atua ke gahuahua he moui haau. Kia eketaha ke nakai ‘gana e tau mena ke lata mo e tino.’ Ua fakaatā e tau mena tuga e hagahaga mitaki lahi, tau magaaho okioki, mo e fakafiafiaaga ne fakatote e manako haau ke foaki fakalahi e moui haau ke he fekafekauaga he Atua. Kua lata e tau Kerisiano oti ke ‘gana e tau mena ke lata mo e agaga,’ nakai leva ai, ko e tau tagata taane ne taute pihia kua liga latatonu mooli ma e tau kotofaaga he fakapotopotoaga. Ha kua manako lahi ma e tau fekafekau lagomatai mo e tau motua he vahā nei, ko e vala tala nei kua taute pauaki ma e tau tagata taane Kerisiano. Ko e mena ia, tau matakainaga taane, kua tomatoma e mautolu a mutolu ke manamanatu ke he vala tala mo e liogi. He tau kupu Tohi Tapu ne tū ai epikopo mo e tiakono, kua fakaaoga e mautolu e tau kupu leveki mo e fekafekau lagomatai ne fakavē ke he New World Translation.

Foli Atu ma e Gahua Mitaki

4, 5. (a) Ko e heigoa e tau kotofaaga he fakapotopotoaga ne tomatoma ke he tau tagata taane papatiso ke foli atu ki ai? (e) Foli atu fēfē a ia?

⁴ Kua nakai amanaki ni e tagata taane Kerisiano ti eke mo leveki. Lata a ia ke foli atu ke he “gahua mitaki” nei. (1 Timo. 3:1) Kua putoia e fekafekau ke he tau matakainaga he leveki mooli e tau manako ha lautolu. (Totou Isaia 32:1, 2.) Ko e tagata taane kua foli atu mo e tau manako hako kua nakai kumi tuaga. Ka kia puke a ia he manako fakamokoi ke lagomatai e falu.

⁵ Ko ia kua lali ke latatonu ke eke mo fekafekau lagomatai mo e foli atu ke he feua he leveki kua eketaha ke fakalagotatai mo e tau fakatokaaga ne fakavē i loto he tau Tohiaga Tapu. (1 Timo. 3:1-10, 12, 13; Tito 1:5-9) Kaeke ko e tagata taane kua tukulele a koe, hūhū hifo ki a koe: ‘Fakalataha katoa nakai au ke he gahua fakamatala, ti kua lagomatai nakai e au falu ke taute pihia? Atihake nakai e au e tau matakainaga tapuaki haaku he fiafia mooli ke he tuaga ha lautolu? Mailoga nakai kua eke au mo tagata fakaako mitaki he Kupu he Atua? Hane holo ki mua nakai e puhala tali haaku? Kua taute fakamakai nakai e au e tau kotofaaga ne tuku mai he tau motua ki a au?’ (2 Timo. 4:5) Lata ke manamanatu fakahokulo ke he tau hūhū ia.

6. Ko e heigoa e matapatu pauaki ke latatonu ma e tau matagahua he fakapotopotoaga?

⁶ Taha puhala ke latatonu mo e tau matagahua he fakapotopotoaga ko e ‘fakamalolo ke he malolō he agaga he Atua ke he tagata i loto.’ (Efeso 3:16) He eke mo fekafekau lagomatai po ke motua i loto he fakapotopotoaga Kerisiano kua nakai ko e matakupu he vili ke he feua. Kua moua e kotofaaga nei ha ko e tupu fakaagaaga. Moua fēfē e tupu fakaagaaga? Taha puhala ma haau ke ‘mahani ke lata mo e agaga’ mo e fakatupu e fua he agaga ia. (Kala. 5:16, 22, 23) He kitia haau a tau mahani fakaagaaga kua lata ke taute e falu kotofaaga foki mo e he fakagahua e koe e fakatonuaga ke holo ki mua, to “kitia ai he tau tagata oti hāu a mafiti.”—1 Timo. 4:15.

Lata mo e Aga Foaki Noa

7. Ko e heigoa ne putoia he fekafekau ke he falu?

⁷ He fekafekau ke he falu kua putoia e gahua lahi ti lata mo e aga foaki noa. Ha ko e tau leveki Kerisiano ko e tau leveki mamoe fakaagaaga, kua manamanatu fakahokulo a lautolu ke he tau lekua he fuifui. Mailoga e puhala ne lauia e aposetolo ko Paulo ha ko e tau matagahua he haana gahua leveki. Ne tala age a ia ke he tau matakainaga haana i Korinito: “Ko e matematekelea lahi mo e fakaatukehe he loto ne tohi atu ai au kia mutolu mo e tau hihina mata loga; nakai pihia kia momoko ai a mutolu, ka kia iloa ai e mutolu haku a fakaalofa kua lahi ue atu kia mutolu.” (2 Kori. 2:4) Maaliali ai, ne loto katoa a Paulo ke he gahua haana.

8, 9. Talahau e tau fakataiaga he Tohi Tapu ne fakakite e puhala ne leveki he tau tagata taane e tau manako he falu.

⁸ Ko e aga foaki noa ko e fakamailoga tumau he tau tagata taane ne gahua fakalahi ke lata mo e tau fekafekau a Iehova. Ma e fakatai, nakai manatu a tautolu kua tala age a Noa ke he falu he magafaoa haana: ‘Fakailoa mai ki a au ka mau e vaka ke fakalataha auloa au mo mutolu.’ Nakai tala age a Mose ke he tau Isaraela i Aikupito: ‘To feleveia au mo mutolu he Tahi Kula. Ō atu he hala ne manako lahi a mutolu ki ai.’ Nakai pehē a Iosua: ‘Fakailoa mai ki a au ka malolo hifo e tau kaupā i Ieriko.’ Ti nakai tuhi a Isaia ke he taha tagata ti pehē: ‘Hai kō a ia! Fakafano atu a ia.’—Isaia 6:8.

⁹ Ko e ha tautolu a fakafifitakiaga mua ue atu he tagata taane ne fakaatā e agaga he Atua ke fakalagalaga a ia ko Iesu Keriso. Ne talia fakamakai e ia e matagahua haana ke eke mo Lukutoto he tau tagata. (Ioane 3:16) Ti nakai kia lata he fakaalofa foaki noa ha Iesu ke omoomoi a tautolu ke foaki noa foki? He fakamaama e tau logonaaga haana ma e fuifui, ne pehē taha motua ne kua leva: “Ko e tau kupu ha Iesu ki a Peteru—leveki haaku a tau mamoe—ne lauia lahi au. He tau tau kua mole, ne loto fakaaue au ke he puhala ne fakamalagaki hake e agaaga he tagata ha ko e tau kupu gahoa ofania po ke mukamuka ke mahani totonu. Fiafia lahi mahaki au ke he gahua leveki.”—Ioane 21:16.

10. Ko e heigoa ka omoomoi e tau tagata taane Kerisiano ke muitua e fakafifitakiaga ha Iesu he fekafekau ke he falu?

¹⁰ Ke lata mo e fuifui he Atua, kua manako mooli e tau tagata taane tukulele he fakapotopotoaga ke fakakite e aga ha Iesu, ne pehē: “Ko au foki ke okioki ai a mutolu.” (Mata. 11:28) Ko e tua ke he Atua mo e fakaalofa ma e fakapotopotoaga ne omoomoi e tau tagata taane Kerisiano ke foli atu ke he gahua mitaki nei, ti nakai manamanatu kua lahi mahaki e mena ke taute po ke uka foki. Ka e kua ka nakai manako pauaki a ia ke foli atu? Maeke nakai he matakainaga taane ke feaki e manako ke fekafekau he fakapotopotoaga?

Feaki e Manako ke Fekafekau

11. Maeke fēfē he tagata ke feaki e manako ke fekafekau ke he falu?

¹¹ Ka taofi he tau logonaaga maimainā a koe he foli atu, kua latatonu ni ke liogi a koe ma e agaga tapu. (Luka 11:13) To lagomatai he agaga a Iehova a koe ke fahia ke he tau tupetupe kua liga logona hifo e koe ke he mena nei. Ko e manako lahi ke fekafekau ko e mena foaki he Atua, ti ko e agaga ha Iehova ne fakaohooho e matakainaga taane ke foli atu ti foaki age e malolō ke taute e fekafekauaga tapu. (Filipi 2:13) Ko e mena ia, kua latatonu ke ole ki a Iehova ke lagomatai a koe ke atihake e manako ke talia e tau kotofaaga he fekafekauaga.—Totou Salamo 25:4, 5.

12. Maeke fēfē he tagata taane ke moua e lahi he iloilo ke taute aki e tau matagahua ne kotofa ki a ia?

¹² He mailoga he Kerisiano kua tuga na uka mo e vihi e tau manako he fuifui, ne liga fifili a ia ke nakai foli atu. Po ke liga logona hifo e ia kua temotemoai e iloilo haana ke taute aki e tau matagahua. Ka tupu e mena nei, liga maeke ia ia ke moua e iloilo he eke mo tagata fakaako makutu lahi ke he Kupu he Atua mo e tau tohi faka-Tohi Tapu. Lata ke hūhū hifo ki a ia ni, ‘Kua fai magaaho nakai au ke fakaako e Kupu he Atua, ti liogi nakai au ma e iloilo?’ Ne tohi he aposetolo ko Iakopo: “Kaeke ha ha ia mutolu taha kua nakai fai iloilo, kia ole atu a ia ke he Atua; ko ia kua foaki mai mo e totonu ke he tau tagata oti mo e nakai tauage; ti foaki mai ai kia ia.” (Iako. 1:5) Talitonu nakai a koe ke he talahauaga omoomoi nei? He tali ke he liogi a Solomona, ne foaki he Atua ki a ia “e pulotu mo e loto matala” ke maeke ia ia ke iloa e mitaki mo e kelea ka taute e fakafiliaga. (1 Patu. 3:7-14) Mooli, kehe pauaki e tuaga ha Solomona. Ka e, maeke ia tautolu ke mauokafua to foaki he Atua e iloilo ke he tau tagata taane ne kotofa ki ai e tau matagahua he fakapotopotoaga ke maeke ia lautolu ke leveki fakamitaki e tau mamoe haana.—Fakatai 2:6.

13, 14. (a) Fakamaama e puhala ne lauia a Paulo “he fakaalofa a Keriso.” (e) Kua lata fēfē “he fakaalofa a Keriso” ke lauia a tautolu?

¹³ Taha lagomatai foki he feaki e manako ke fekafekau ke he falu ko e manamanatu fakahokulo ke he tau mena oti ne taute e Iehova mo e Tama haana ma tautolu. Ma e fakatai, fakatutala ke he 2 Korinito 5:14, 15. (Totou.) Puhala fe kua “omoomoi a [t]autolu he fakaalofa a Keriso”? Ko e fakaalofa ne fakakite e Keriso he foaki e moui haana ke lata mo tautolu he fakatatau ke he finagalo he Atua kua mua ue atu, ati tupu e loto fakaaue ha tautolu, ti lauia lahi e tau loto ha tautolu. Ne omoomoi he fakaalofa he Keriso a Paulo. Ne taofi ai a ia he mahani lotokai mo e lagomatai a ia ke tumau ke he tau foliaga haana ke fekafekau ke he Atua mo e tau matakainaga haana i loto mo fafo he fakapotopotoaga.

¹⁴ He manamanatu fakahokulo ke he fakaalofa he Keriso ma e tau tagata ne fakatupu e loto fakaaue ha tautolu. Ko e fua, ne mailoga e tautolu kua nakai latatonu ki a tautolu ke ‘mahani ke gana e tau mena ke lata mo e tino’ he tutuli e tau foliaga lotokai mo e momoui ke fakafiafia ni he tau manako ha tautolu. Ka e hikihiki e tautolu e tau momoui ha tautolu ke tuku fakamua e gahua he Atua ne foaki ki a tautolu ke taute. Kua omoomoi a tautolu ke “fekafekau” ke he tau matakainaga ha tautolu mai he fakaalofa. (Totou Kalatia 5:13.) Ka mailoga e tautolu ko e tau fekafekau a tautolu hane gahua fakatokolalo ke lata mo e tau fekafekau tukulele ha Iehova, to taute fakalilifu e tautolu a lautolu. Mooli, to nakai fifitaki e tautolu e aga tuhituhi mo e fakafili tagata ne fakaohooho e Satani.—Fakakite. 12:10.

Laliaga he Magafaoa

15, 16. Ko e heigoa e matagahua ka taute he tau tagata he magafaoa ke maeke he tagata taane ke latatonu mo e kotofaaga ko e fekafekau lagomatai po ke motua?

¹⁵ Ka fai hoana ti fai fanau e matakainaga taane, kia manamanatu ke he tuaga he magafaoa haana he magaaho ka fifili kua lata nakai a ia ke eke mo fekafekau lagomatai po ke motua. Mooli, ko e tuaga fakaagaaga mo e aga he magafaoa haana kua lauia mooli e kotofaaga haana. Kua peehi he mena nei e aoga he matagahua he magafaoa he lalago e taane mo e matua taane he lali a ia ke fekafekau ke he tau mena he fakapotopotoaga he eke mo fekafekau lagomatai po ke motua.—Totou 1 Timo. 3:4, 5, 12.

¹⁶ Kua fiafia a Iehova ka kaufakalataha e tau tagata i loto he magafaoa Kerisiano. (Efeso 3:14, 15) Kua lata ke lagotatai e ulu he magafaoa he taute e tau matagahua he fakapotopotoaga mo e leveki e magafaoa haana ke he ‘puhala mitaki.’ Ti aoga lahi ma e motua po ke fekafekau lagomatai ke fakaako e Tohi Tapu mo e hoana mo e fanau haana ke aoga oti a lautolu mai he Tapuakiaga he Magafaoa he tau faahi tapu takitaha. Kua lata a ia ke gahua tumau mo lautolu he fonua. Ma e kakano ia foki, kua aoga lahi ma e tau tagata he magafaoa ke kaufakalataha mo e tau laliaga he ulu he magafaoa.

To Liu Nakai a Koe ke Fekafekau?

17, 18. (a) Kaeke kua nakai latatonu e matakainaga taane mo e kotofaaga, ko e heigoa kua maeke ke taute? (e) Ko e heigoa e onoonoaga mitaki kua lata ke moua he matakainaga taane ne fekafekau ko e motua po ke fekafekau lagomatai he magaaho fakamua?

¹⁷ Liga ko e motua po ke fekafekau lagomatai a koe he taha magahala ka kua nakai fekafekau ke he tuaga ia mogonei. Kua fakaalofa a koe ki a Iehova ti maeke foki ke iloa kua leveki agaia e ia a koe. (1 Pete. 5:6, 7) Fai nakai ne tala atu ki a koe kua lata ia koe ke taute e falu hikihikiaga? Kia talahau fakamakai e tau hehē ti gahua ki ai fakalataha mo e lagomatai he Atua. Kalo kehe mai he loto mamahi lahi mahaki. Kia iloilo, mo e fakakite e aga mitaki. Ko e motua ne totou tau he fekafekauaga ka kua utakehe e tau kotofaaga ia ia, ne talahau: “Ne eketaha au ke fakatumau e fano ke he tau feleveiaaga, gahua he fonua, mo e totou e Tohi Tapu tuga he fekafekau au ko e motua—ko e foliaga ne maeke ia au ke moua. Ne iloa e au ke mahani fakauka ha kua manatu au to liu au ke moua e tau kotofaaga haaku ka mole taha po ke ua e tau, ka kua teitei fitu e tau ato liu au ke fekafekau ko e motua. He magahala ia ko e fakamalolōaga ke nakai fakalolelole ka e fakatumau ke foli atu ne lagomatai lahi ki a au.”

¹⁸ Kaeke ko e matakainaga taane a koe he tuaga ne kua fakamaama, kia nakai fakalolelole. Manamanatu ke he puhala kua fakamonuina e Iehova e fekafekauaga haau mo e magafaoa haau. Atihake fakaagaaga e magafaoa haau, ahiahi a lautolu ne gagao, mo e fakamalolō a lautolu ne lolelole. Mua atu ai, tokiofa e kotofaaga haau ke fakaheke e Atua mo e fakapuloa e tala mitaki he Kautu ko e taha he Tau Fakamoli a Iehova.a—Sala. 145:1, 2; Isaia 43:10-12.

Liu Onoono Fakamitaki

19, 20. (a) Ko e heigoa nukua tomatoma ke he tau tagata taane oti kua papatiso ke taute? (e) Ko e heigoa ka fakatutala ki ai he vala tala ka mui mai?

¹⁹ Lahi mahaki e manako ma e tau leveki mo e tau fekafekau lagomatai he magaaho nei. Ko e mena ia kua tomatoma a mautolu ke he tau matakainaga taane oti kua papatiso ke liu onoono fakamitaki ke he tau tuaga ha lautolu ti hūhū hifo, ‘Ka nakai ko e fekafekau lagomatai po ke motua au, kua lata nakai au ke kumikumi e kakano ne nakaila hoko ia au ke he fekafekauaga ia?’ Kia fakaatā e agaga he Atua ke lagomatai a koe ke moua e onoonoaga hako ke he manatu uho nei.

²⁰ To aoga oti e tau tagata he fakapotopotoaga mai he tau laliaga foaki noa he mahani Atua he tau matakainaga talitonu ha lautolu. Ka taute e tautolu e tau gahua totonu mo e nakai lotokai, to helehele ai e tautolu e olioli mai he fekafekau ke he falu mo e gana e tau mena ke lata mo e agaga. To fakakite ai he vala tala ka mui mai mogoia e latatonu ha tautolu ke nakai fakahukia e agaga tapu he Atua. Maeke fēfē ke kalo mai he mena ia?

[Matahui Tala]

To Tali Fēfē e Koe?

• Ko e heigoa ne fakamafana mai ki a tautolu he perofetaaga ia Mika 5:5?

• Fakamaama e mena ne putoia he aga foaki noa.

• Maeke fēfē e tagata ke feaki e manako ke fekafekau ke he falu?

• Aoga fēfē e kaufakalataha he magafaoa ka latatonu e tagata taane ke eke mo fekafekau lagomatai po ke motua?

[Tau Fakatino he lau 25]

Ko e heigoa haau ka taute ke foli atu?